Estere 5 - Tonga Bible 1986

Estere wasere ku karonga kumpempha iyo ndi Hamani kurgha nayo

¹ Pazuŵa la chitatu Estere wanguvwara vya ufumukazi, wanguma mu luluwa la mukati la nyumba ya karonga, kulazga ku chipinda chakuwunganamo; ndipo karonga wanguja pa chitengo chake cha ufumu mu nyumba ya ufumu, kurazga ku likomo la nyumba:

² ndipo wanguti wawona Estere fumukazi wama mu luluwa wangusaniya wezi mu maso ghake ndipo wangumutambaruliya nthonga ya golide Estere yo yenga mu janja lake. Viyo Estere wangundere kufupi, ndikukwaska songo ya nthonga ya karonga.

³ Ndipo karonga wanguti kwaku iyo, “Kumbi unkhumba chine Estere fumukazi? Pemphu lako ndakuti uli? Nadi likapaskikanga kwako chingana nchigaŵa chimoza cha vigaŵa viŵi vya ufumu.”

⁴ Ndipo Estere wanguti, “Asani nchamampha ku karonga, karonga wazi ndi Hamani msana uno wale ku dghera lo ndamlongosoriyani, imwe karonga.”

⁵ Penipo karonga wanguti, “Kamutoni Hamani ruŵi kuti tichite nge ndimo Estere wakambiya.” Viyo karonga ndi Hamani ŵanguza ku dghera lo Estere wangulongoso.

⁶ Ndipo ŵachimwa vinyo, karonga wanguti kwaku Estere, “Kumbi pemphu lako ndakuti uli? Likapaskikanga kwaku iwe? Cho unweka nchine? Chingana nchigaŵa chimoza cha vigaŵa viŵi vya ufumu wangu chichitikenge.”

⁷ Viyo Estere wanguti, “Rombu langu ndi khumbu langu ndi ivi:

⁸ Asani ndasaniya wezi pa maso pa karonga, asani chikondweskenge karonga kundipaska cho ndirombenge ndi kufiska khumbu langu, wazenge karonga ndi Hamani ku dghera lo ndiŵalongosoriyenge, ndichitenge la mawa nge ndimo karonga wakambiyenge.”

⁹ Ndipo Hamani wangutuwa wakuzaza likondwa ndi chimwemwe mu mtima: kweni Hamani wanguti wawona Mordikayi mu likomo la karonga kwambura kusoka pamwenga kumtumbika, wanguzazika ndi ukari chifukwa chaku Mordikayi.

¹⁰ Kweni Hamani wangujitintha: ndipo wanguti waruta kwake wangutuma ŵanthu kwachidana mabwezi ghake ndi muwoli wake Zeresi.

¹¹ Ndipo Hamani wanguŵakonkhome kuzirwa kwa usambasi wake ndi unandi wa ŵana ŵake ndi vyose vyo karonga wangumtumbika navyo, ndimo karonga wangumkwezge pachanya pa mafumu ndi ŵanthu ŵa karonga.

¹² Hamani wangulutiriya wanguti, “Chingana ndi fumukazi Estere walivi kuzomerezgapo munyake so kuza ku dghera lo walongoso kweni ine pe. Ndipo mawa ndadanika so ndi iyo pamoza ndi karonga.

¹³ Chingana kwe viyo, vyose ivi kuti vitindanduliya kanthu cha penipo ndeche kumuwona Mordikayi mu Yuda kuja pa likomo la karonga.”

¹⁴ Ndipo Zeresi muwoli wake, ndi mabwezi ghake ghose ŵanguti kwaku iyo, “Muti wakupayikapo ŵanthu uchitike wa mikono machumi gha nkhonde (50) utali wake, ndipo mawa ukambe ku karonga kuti Mordikayi wapayikike pakuweniwo; iwe ukasere ku dghera wakukondwa pamoza ndi karonga.” Chinthu ichi chingumkondweska Hamani, ndipo wangulangula kuti muti wo ulongosoreke.