Danyele 10 - Tonga Bible 1986

Chiwona chaku Danyele cha umari wa mugonezi

¹ Mu chirimika cha chitatu chaku Sirusi karonga waku Perese mazu ghanguvumbulika kwaku Danyele yo wadanikanga Belteshazara. Ndipo mazu ghenga ghakuneneska ndi ghenga nkhondo yikuru. Ndipo wangughaziŵa mazu ndi wenga ndi muziŵiru wa chiwona.

² Mu mazuŵa gho ine, Danyele, ndingutenje kwa ŵasabata ŵatatu.

³ Ndengavi kurgha vyakunowa, chingana ndi nyama ndi vinyo vyengavi kusere mu mlomo wangu, ndengavi chingana nkhujitukutizga mafuta kwa ŵasabata ŵatatu ŵamphumphu.

⁴ Mu zuŵa la machumi ghaŵi pachanya ghanayi (24) la mwezi wakudanga, ndichima pa luwu la msinji ukuru, wo ndi Tigirisi;

⁵ ndinguyunuska maso ghangu ndipo ndinguwona munthu wakuvwara bafuta, yo muchiwunu chake wanguvwara golide wa Ufaza.

⁶ Liŵavu lake lingukozgana ndi mwa wakuzirwa, chisku chake nge nkhawonekedu ka limphezi, maso ghake nge ndi nyali zakukole, manja ghake ndi marundi ghake vingukozgana ndi mkuŵa wakuphotoka ndi kuvwika kwa mazu ghake kwenga nge nchiwawa cha muzinda.

⁷ Ine, Danyele, ndija ndinguwona chiwona, kweni ŵanthu wo ŵenga nane kuti ŵanguchiwona cha chiwona, kweni ŵangukoreka ndi chitenthe chikuru, ndi ŵanguthaŵa kwachibisama.

⁸ Viyo ndingusiyika ndija ndi ndinguwona chiwona chikuru ichi, ndipo kuti ndenga ndi nthazi cha, kawonekedu kangu kakusangaruka kangusanduka kakofya, ndipo ndengavi nthazi.

⁹ Viyo ndinguvwa kayowozi ka mazu ghake, ndipo ndinguti ndavwa kayowozi ka mazu ghake ndinguwa pasi kavunama, ndingukoreka ndi tulo tuzitu.

¹⁰ Ndipo janja lingundikwaska ndi lingundijarika wakumbwambwantha muvikufi vyangu ndi mu makongono ghangu.

¹¹ Wanguti kwaku ine, “Danyele, wa munthu wakwanjiwa ukongwa, vwiska mazu yagha ndikamba nawe, yima, chifukwa ndatumika kwaku iwe sono.” Ndipo wanguti wandikambiya mazu yagha, ndinguma wima wakopa.

¹² Ndipo wanguti, “Ungopanga, Danyele, chifukwa kutuwa zuŵa lakudanga lo ungunweke mtima wako kuziŵa, ndi ungujiyuyuliya paurongo paku Chiuta wako, mazu ghako ghavwika, ndipo ndaza chifukwa cha mazu ghako.

¹³ Karonga wa ufumu waku Perese wangumikana nane mazuŵa machumi ghaŵi pachanya limoza (21), kweni Mikaeli, yumoza wa ŵakaronga ŵara, wanguza kundovya, ndipo ndingumureka kwenikuwa ndi karonga waku Perese,

¹⁴ ndipo ndaza kuno kuzachimuziŵiskani cho chiŵiyenge ŵanthu mu mazuŵa ghakumariya. Pakuti chiwona ncha mazuŵa gha kunthazi.”

¹⁵ Wanguti wakamba nane mazu nge ndi yagha, ndingusindama chisku changu pasi, ndipo ndinguja chisisi.

¹⁶ Ndipo ehe, yumoza wakukozgana ndi mawonekedu gha ŵana ŵa ŵanthu wangukwaska mlomo wangu, ndingukamba ndinguti kwaku yo wanguma paurongo pangu, “Mbuya wangu, chifukwa cha chiwona, maurwirwi ghandiziya, ndipo nthazi zandimariya.

¹⁷ Ndingaziŵa uli ine mteŵeti winu Mbuya kukamba ndi Imwe Mbuya wangu? Chifukwa sono nthazi zose zamara ndi mvuchi nawo wamara.”

¹⁸ Ndipo so munyake yumoza wakuŵa ndi kawonekedu nge nkha munthu wangundikwaska ndi wangundikhwimiska.

¹⁹ Ndipo wanguti, “Iwe wa munthu wakwanjiwa ukongwa, ungopanga, chimangu chiŵi nawe; khwima, uŵe wachiganga.” Ndipo wanguti wakamba nane, ndingukhwimiskika ndinguti, “Mbuya wangu wakambenge chifukwa wandikhwimiska.”

²⁰ Ndipo wanguti, “Kumbi uziŵa cho ndaziya kwaku iwe? Kweni sono ndiwere vuli kwachirwa ndi karonga waku Perese, ndipo ndamkuti ndamara kurwa nayo, karonga wa ŵaGirisi wakazanga.

²¹ Kweni ndikuneniyenge cho chikulembeka mu buku la uneneska; ndipo kulivi yumoza yo ngwakulimba pamoza nane mukususka ivi, kweni Mikaeli pe karonga winu.”