Danyele 1 - Tonga Bible 1986

ŴaYuda pa bwalo laku Nebukadanezara

¹ Mu chirimika cha chitatu cha muwusu waku Yehoyakimu karonga waku Yuda, Nebukadanezara karonga waku Babiloni wanguza ku Yerusalemu ndi wanguwugoŵe msumba wo.

² Ndipo Ambuya angupereka Yehoyakimu karonga waku Yuda mu janja lake, pamoza ndi viyaŵi vinyake vya nyumba yaku Chiuta. Wanguvitole ku charu cha Shinara, mu nyumba yaku chiuta wake; ndi wanguviŵika viyaŵi mu malo ghakusungiyamo usambasi waku Chiuta wake.

³ Viyo karonga wangulanguliya Ashapenaza mura wa ŵamuthenu ŵake, kuti wazi nawo ŵanyake ŵa ŵaYisraele ŵamu mphapu ya karonga ndi ŵamu mphapu ya ŵanangwa.

⁴ Ŵanyamata ŵambura kalema, ŵakutowa, ŵakuwamo vinjeru vyose, ŵakuzazika ndi mziŵiro, ŵakuwamo visambizgu, ndi ŵakuziŵa kuteŵeta mu nyumba ya karonga, ndi kusambizgika malembo ndi mazu gha ŵaKaldiya.

⁵ Karonga wanguŵagaŵiya chigaŵa cha vyakurgha zuŵa ndi zuŵa vyo iyo warghangapo ndi chigaŵa cha vinyo yo iyo wamwangapo. Watenere kusambizgika kwa virimika vitatu, kuti pakumara kwa nyengo yo ŵamenge paurongo pa karonga.

⁶ Mukati mwaku yaŵa, mwenga Danyele, Hananiya, Mishaele, ndi Azariya ŵa fuku laku Yuda.

⁷ Ndipo mura wa ŵamuthenu, wanguŵadana mazina ghanyake; Danyele wangudanika Belteshazara, Hananiya wangudanika Shadreke, Mishaele wangudanika Mesheke, ndi Azariya wangudanika Abedenego.

⁸ Kweni Danyele kuti wangukhumba cha kujikazuzga ndi kurgha kunandi kwa karonga, pamwenga ndi vinyo yo wamwanga; viyo wanguŵeyere mura wa ŵamuthenu kuti wamuzomerezge kureka kujikazuzga.

⁹ Ndipo Chiuta wangutumbika Danyele kuti wasaniye ulemu ndi chanju mu maso gha mura wa ŵamuthenu;

¹⁰ ndipo mura wa ŵamuthenu wanguti kwaku Danyele. “Nditopa vinu mbuyangu karonga yo wangurongoso vyakurgha vinu ndi vyakumwa vinu, wawonenge kuti mwe ŵakonda kuruska ŵanyamata ŵanyinu namwe mu ura. Viyo mundiŵikenge mu urwani ndi karonga.”

¹¹ Sono Danyele wanguti ku mteŵeti mura wa ŵamuthenu wangumuŵika kuphwere Danyele, Hananiya, Mishaele, ndi Azariya,

¹² “Yesa ŵateŵeti ŵako kuti ŵatipaske munkhwani kurgha ndi maji kumwa kwa mazuŵa chumi limoza (10).

¹³ Pavuli pake pimani kawonekedu kidu ndi kawonekedu ka ŵanyamata wo ŵaturgha chigaŵa cha kurgha kwa karonga, mo mukawoniyanga ndimu mukachitiyanga ndi ŵateŵeti ŵinu.”

¹⁴ Viyo wanguzomerezgana nawo mu makani yagha, ndipo wanguŵayesa kwa mazuŵa chumi limoza (10).

¹⁵ Pa umari wa mazuŵa chumi limoza (10), kungusanirika kuti kawonekedu ka visku vyawo kenga kamampha ndi ŵakututuŵa liŵavu kuruska ŵanyamata ŵanyawo wose wo ŵangurgha kurgha kwa karonga.

¹⁶ Viyo mteŵeti mura wa vyakurgha wangutuzgako chigaŵa cha vyakurgha ndi vinyo yo ŵamwanga, ndi wanguŵapaska sungwi.

¹⁷ Chiuta wanguŵapaska ŵanyamata yaŵa vinjeru ndi mziŵiro mu malembo ghose ndi mu vinjeru; ndipo Danyele wanguŵa ndi mziŵiro wa vinjeru mu chakuwona chose ndi mu maloto ghose.

¹⁸ Pa umari wa nyengo yo karonga wangulangula kuti ŵaserezgeke, mura wa ŵamuthenu wanguŵaserezga paurongo paku Nebukadanezara,

¹⁹ ndipo karonga wangukamba nawo, ndipo mwaku iwo wose mwengavi kusanirika wakuyana ndi Danyele, Hananiya, Mishaele, ndi Azariya, mu chifukwa ichi ŵamanga paurongo pa karonga.

²⁰ Mu makani ghose gha vinjeru ndi ghakukhumba kuwamo gho wanguŵafumba wanguŵasaniya kuti mbavinjeru kuruska ŵaukwi ndi ŵaziŵi nyenyezi wose wo ŵenga mu chigaŵa cha ufumu wake.

²¹ Ndipo Danyele wangurutiriya mpaka mu chirimika chakudanga cha karonga Sirusi.