Chiyambo 7 - Tonga Bible 1986

Nowa ndi mbumba yake ŵasere mu ngaraŵa

¹ Ambuya anguti kwaku Nowa, “Ghe mu chombo ŵamu nyumba yako wose, pakuti ndawona kuti wemukongolekwa paurongo pangu mu mgonezi uwu.

² Usere pamoza ndi nyama ziŵiziŵi zinkhonde ndi ziŵi zakuphotoka, yinthurumi ndi yinthukazi yake; ndi nyama ziŵi zamu nyama zo zambura kuphotoka; yinthurumi ndi yinthukazi;

³ ndi viyuni vya mude, viŵiviŵi vinkhonde ndi viŵi vyo navyo, chinthurumi ndi chinthukazi, kusunga yamoyo mitundu yawo pa charu.

⁴ Pakuti ghatakuti ghakapo mazuŵa ghankhonde ndi ghaŵi ndikatumanga vuwa pa charu mazuŵa machumi ghanayi ndi mausiku machumi ghanayi (40); ndipo chamoyo chose cho ndikuchita ndikasisitanga kutuwapo pa charu.”

⁵ Ndipo Nowa wanguchita vyose vyenivyo Ambuya angumulanguliya.

⁶ Nowa wenga wamoya virimika machumi pe chumi ghankhonde ndi limoza (600) penipo zandi wa maji wanguza pa charu.

⁷ Ndipo Nowa, ŵana ŵake ŵanthurumi, ndi muwoli wake, ndi ŵawoli ŵa ŵana ŵake pamoza nayo ŵangusere mu ngaraŵa, kuthaŵa maji gha zandi.

⁸ Mu nyama zakuphotoka, ndi mu nyama zambura kuphotoka, ndi mu viyuni ndi vyakukwaŵa pa charu,

⁹ vye vyose viŵiviŵi chinthurumi ndi chinthukazi, vingusere mu ngaraŵa pamoza ndi Nowa, uli ndimo Chiuta wangulanguliya Nowa.

¹⁰ Ndipo pavuli pa mazuŵa ghankhonde ndi ghaŵi maji gha zandi ghanguza pa charu.

Zandi mukuru

¹¹ Mu chirimika cha machumi pe chumi ghankhonde ndi limoza (600) cha umoyo waku Nowa, mu mwezi wa chiŵi, pa zuŵa la chumi ndi ghankhonde ndi ghaŵi (17) la mwezi wo, pa zuŵa liya visima vya ndimba zikuru vinguphulika, ndi madangazi gha machanya ghangujurika.

¹² Ndipo vuwa yingung'a pa charu mazuŵa machumi ghanayi ndi mausiku machumi ghanayi (40).

¹³ Pa zuŵa lenilo Nowa ndi ŵana ŵake ŵanthurumi, Shemu ndi Hamu ndi Yafete, ndi muwoli waku Nowa, Ndi ŵawoli ŵatatu ŵa ŵana ŵake ŵangusere nawo mu ngaraŵa.

¹⁴ Iwo ndi nyama yose kwakuyana ndi mtundu wake, ndi viŵetu vyose kwakuyana ndi mitundu yake, ndi chinthu chose chadukwaŵa pa charu kwakuyana ndi mtundu wake, ndi chiyuni chose cha kaŵiro kose, ndi mtundu wake, chiyuni chose cha mitundu yose.

¹⁵ Vingusere mu ngaraŵa pamoza ndi Nowa, viŵiviŵi vya nyama zose mwaku vyo mwenga mvuchi wa umoyo.

¹⁶ Ndipo vyo vingusere chinthurumi ndi chinthukazi vya nyama zose, vingusere uli ndimo Chiuta wangulanguliya; ndipo Ambuya angumujariya mukati.

¹⁷ Zandi wangukiyakiya mazuŵa machumi ghanayi (40) pa charu; ndipo maji ghanguchapaliya ndi ghangunyamuliya pachanya ngaraŵa yo, ndipo yingukwere panchanya ukongwa pa charu.

¹⁸ Maji ghanguruska ndi ghanguzaza ukongwa pa charu; ndipo ngaraŵa yingusewa pa maji.

¹⁹ Maji ghanguruska ndi nthazi pa charu, viyo kuti mapiri ghose ghatali ghangubisika;

²⁰ maji ghanguŵa pachanya pa mapiri kwakukwana mikono chumi pachanya yinkhonde (15);

²¹ Ndipo nyama yose yingufwa yo yayinganga pa charu, viyuni, viŵeto, nyama, vyose vyo vitapata pa charu, ndi munthu yose;

²² chinthu chose pa charu chiyumu, cho mu mphunu mwake mwenga mvuchi wa umoyo, chingufwa.

²³ Wamusisita chinthu chose chamoyo cho chenga pa charu, munthu ndi nyama ndi vyakukwaŵa ndi viyuni vya mude; vingusisitika pa charu. Wangujako Nowa pe, ndi wo ŵenga nayo pamoza mu ngaraŵa.

²⁴ Ndipo maji ghanguruska pa charu mazuŵa machumi pe chumi pachanya machumi ghankhonde (150).