Chiyambo 5 - Tonga Bible 1986

Mbumba yaku Sete

¹ Ili ndi buku la mphapu zaku Adamu. Penipo Chiuta wangulenga munthu, wangumuchita muchikozgu chaku Chiuta.

² Munthurumi ndi munthukazi wanguŵalenga, ndipo wanguŵatumbika, ndi wanguŵadana Munthu penipo ŵangulengeka.

³ Penipo Adamu wanguŵa wa virimika machumi pe chumi pachanya machumi ghatatu (130) wangupapa mwana munthurumi wakukozgana nayo, wachikozgu chake, ndi wangumudana zina Sete.

⁴ Mazuŵa ghaku Adamu pavuli wati wapapa Sete ghenga virimika machumi pe chumi ghankhonde ndi ghatatu (800) ndipo wenga ndi ŵana ŵanthurumi ŵanyake ndi ŵana ŵanthukazi.

⁵ Viyo mazuŵa ghose gho Adamu wanguŵa wamoyo ghenga virimika machumi pe chumi ghankhonde ndi ghanayi pachanya machumi ghatatu (930); ndi wangufwa.

⁶ Penipo Sete wanguŵa wa virimika machumi pe chumi ndi vinkhonde (105) wangupapa Enoshe.

⁷ Sete wanguŵa wamoyo pavuli pa kawi kaku Enoshe virimika machumi pe chumi ghankhonde ndi ghatatu pachanya vinkhonde ndi viŵi (807), ndipo wenga ndi ŵana ŵanthurumi ŵanyake ndi ŵana ŵanthukazi.

⁸ Viyo mazuŵa ghose ghaku Sete ghenga virimika machumi pe chumi ghankhonde ndi ghaŵi pachanya chumi ndi viŵi (912); ndipo wangufwa.

⁹ Penipo Enoshe wanguŵa wa virimika machumi ghankhonde ndi ghanayi (90) wangupapa Kenani.

¹⁰ Enoshe wanguŵa wamoyo pavuli pa kawi kaku Kenani virimika machumi pe chumi ghankhonde ndi ghatatu pachanya chumi ndi vinkhonde (815) ndipo wenga ndi ŵana ŵanthurumi ŵanyake ndi ŵana ŵanthukazi.

¹¹ Viyo mazuŵa ghose ghaku Enoshe ghenga virimika machumi pe chumi ghankhonde ndi ghanayi pachanya vinkhonde (905); ndipo wangufwa.

¹² Penipo Kenani wenga wa virimika machumi ghankhonde ndi ghaŵi (70); wangupapa Mahalalele.

¹³ Kenani wanguŵa wamoyo pavuli pa kawi kaku Mahalalele virimika machumi pe chumi ghankhonde ndi ghatatu pachanya machumi ghanayi (840), ndipo wenga ndi ŵana ŵanthurumi ŵanyake ndi ŵana ŵanthukazi.

¹⁴ Viyo mazuŵa ghose ghaku Kenani ghenga virimika machumi pe chumi ghankhonde ndi ghanayi, pachanya chumi limoza (910); ndipo wangufwa.

¹⁵ Penipo Mahalalele wanguŵa wa virimika machumi ghankhonde ndi limoza pachanya vinkhonde (65) wangupapa Yarede.

¹⁶ Mahalalele wanguŵa wamoyo pavuli pa kawi kaku Yarede, virimika machumi pe chumi ghankhonde ndi ghatatu pachanya machumi ghatatu (830), ndipo wenga ndi ŵana ŵanthurumi ŵanyake ndi ŵana ŵanthukazi.

¹⁷ Viyo mazuŵa ghose ghaku Mahalalele ghenga virimika machumi pe chumi ghankhonde ndi ghatatu ndi machumi ghankhonde ndi ghanayi, pachanya vinkhonde (895); ndipo wangufwa.

¹⁸ Penipo Yarede wanguŵa wa virimika machumi pe chumi ndi machumi ghankhonde ndi limoza pachanya viwi (162) wangupapa Enoke.

¹⁹ Yarede wanguŵa wamoyo pavuli pa kawi kaku Enoke virimika machumi pe chumi ghankhonde ndi ghatatu (800), ndipo wenga ndi ŵana ŵanthurumi ŵanyake ndi ŵana ŵanthukazi.

²⁰ Viyo mazuŵa those ghaku Yarede ghenga virimika machumi pe chumi ghankhonde ndi ghanayi ndi machumi ghankhonde ndi limoza, pachanya viŵi (962); ndi wangufwa.

²¹ Penipo Enoke wanguŵa wa virimika machumi ghankhonde ndi limoza ndi vinkhonde (65) wangupapa Metusele.

²² Enoke wangwenda ndi Chiuta pavuli pa kawi kaku Metusele virimika machumi pe chumi ghatatu (300) ndipo wenga ndi ŵana ŵanthurumi ŵanyake ndi ŵana ŵanthukazi.

²³ Viyo, mazuŵa ghose ghaku Enoke ghenga virimika machumi pe chumi ghatatu ndi machumi ghankhonde ndi limoza, pachanya vinkhonde (365).

²⁴ Enoke wanguti wenda ndi Chiuta, kuti wanguwoneka so cha, chifukwa Chiuta wangumuto.

²⁵ Penipo Metusele wenga wa virimika machumi pe chumi ndi machumi ghankhonde ndi ghatatu, pachanya vinkhonde ndi viŵi (187) wangupapa Lameke.

²⁶ Metusele wanguŵa wamoyo pavuli pa kawi kaku lameke virimika machumi pe chumi ghankhonde ndi ghaŵi ndi machumi ghankhonde ndi ghatatu pachanya viŵi (782), ndipo wenga ndi ŵana ŵanthurumi ŵanyake ndi ŵana ŵanthukazi.

²⁷ Viyo mazuŵa ghose ghaku Metusele ghenga virimika machumi pe chumi ghankhonde ndi ghanayi, ndi machumi ghankhonde ndi limoza, pachanya vinkhonde ndi vinayi (969); ndipo wangufwa.

²⁸ Penipo Lameke wenga wa virimika machumi pe chumi ndi machumi ghankhonde ndi ghatatu, pachanya viŵi (182) wangupapa mwana munthurumi,

²⁹ ndi wangudana zina lake Nowa, ndi wanguti, “Kutuwa mu nyata yeniyo Ambuya akutemba, uyu wakatitoliyanga ifwe chisangarusku ku nchitu zidu ndi kukutakataka kwa manja ghidu”.

³⁰ Lameke wanguŵa wamoyo pavuli pa kawi kaku Nowa virimika machumi pe chumi ghankhonde ndi machumi ghankhonde ndi ghanayi pachanya vinkhonde (595), ndipo wenga ndi ŵana ŵanthurumi ŵanyake ndi ŵana ŵanthukazi.

³¹ Viyo mazuŵa ghose ghaku Lameke ghenga virimika machumi pe chumi ghankhonde ndi ghaŵi ndi machumi ghankhonde ndi ghaŵi pachanya vinkhonde ndi viŵi (777); ndipo wangufwa.

³² Pavuli penipo Nowa wenga wa virimika machumi pe chumi ghankhonde (500), Nowa wangupapa Shemu, Hamu, ndi Yafete.