Chiyambo 49 - Tonga Bible 1986

Yakobe watumbika ŵana ŵake

¹ Sono Yakobe wangudana ŵana ŵake ŵanthurumi, ndi wanguti, “Muwunjikike pamoza, alinga ndikuneniyeni vyenivyo vikakuwiyaninga mu mazuŵa gho ghatuza.

² Unganani ndi muvwe, mwa ŵana ŵanthurumi ŵaku Yakobe, ndipo tegherezgani kwaku Yisraele uskemwe.

³ “Rubene, ndiwe waumwali wangu, kulimba kwangu, ndi vipasi vyakudanga vya likongonu langu, wakuziŵikwiya limu mu kujikuzga, wakuziŵikwiya limu mu nthazi.

⁴ Wambura bata ulaka ndi maji, kuti ukaŵanga ndi kuruska cha chifukwa unguruta ndi kukwere ku chita cha ausu viyo unguchikazuzga; iwe ungukwere pa chakurapo changu!

⁵ “Simeoni ndi Levi mbana ndi ŵana, vidya vya ukari ndivyo malipanga ghawo.

⁶ Iwe wa mtima wangu, ungazanga mu fundu yawo cha; iwe wa mzimu wangu, ungajibatikanga ku mpingu wawo cha; pakuti mu kukara kwawo wangubaya ŵanthu, ndipo mu kuwura kujiko kwawo wangupunduwa ng'ombe.

⁷ Kutembeke kukara kwawo, pakuti nkhurwani; ndi ukari wawo pakuti ngwa nkhaza! Ndikaŵagaŵanga mwaku Yakobe, ndi kuŵambininiska mwaku Yisraele.

⁸ “Yuda, ŵana ŵanyako ŵakakuthamikanga; janja lako likaŵanga pa khosi la ŵakupindikana ŵako; ŵana ŵanthurumi ŵa ausu ŵazamukotama paurongo pako.

⁹ Yuda ndi mwana wa nkharamu; ku chakuliwa, wa mwana, wangu watuwako. Wangukotama pasi, wangula pasi uli ndi nkharamu, uli ndi nkharamu yinthukazi; wangaganga njani kumuyuska?

¹⁰ Nthonga ya ufumu kuti yikatuwangako kwaku Yuda cha, chingana ndi nthonga ya mweruzgi kutuwa pakati pa malundi ghake, mpaka wazi mweneko waku yo: ndipo kwaku iyo kwamkuŵa muvwiyu wa ŵanthu.

¹¹ Wakumangiliya mwana wa mbunda wake ku mphereska ndi mwana wambunda yake ku mphereska yakusankhika, wasuka maraya mu vinyo ndi chivwalo chake mu ndopa za vipasi;

¹² maso ghake ghachesamenge ndi vinyo, ndi minyu ghake ghakatuŵanga ndi mukaka.

¹³ “Zebuluni wakajanga palikumba la nyanja; wakaŵanga dowoko la zingaraŵa, ndipo mphaka yake yikaŵanga pa Sidoni.

¹⁴ “Isakara ndi mbunda yanthazi, yakugona pakati pa makhora gha mberere;

¹⁵ wanguwona kuti malo gha chipumulu ghenga ghamampha ndi kuti charu chenga chakukondweska; viyo wanguŵeramiya phewa lake ku chinyama ndipo wangusanduka muŵanda ku nchitu yakuchichizgika.

¹⁶ “Dani weruzgenge ŵanthu ŵake uli njumoza wa mitundu yaku Yisraele.

¹⁷ Dani wakaŵanga njoka mu nthowa, chipi wakuja pa nthowa, yo waluma vitende vya kavalo viyo kuti wakukwerapo watuwa kuvuli.

¹⁸ Ndilindizga utaski winu, Ambuya.

¹⁹ “Wachivwamba wakadumiyanga Gadi, iyo wakadumiyanga vitende vyawo.

²⁰ “Kurgha kwaku Ashere kukazaranga, ndipo wakavunanga kurgha kwa mafumu.

²¹ “Naftali ndi rundi lavuli lakufwaturika lo linyamuwa kana ka nyama umamphaumampha.

²² “Yosefe ndi mphanda yakupakasa pafupi pa chisima, mphanda zake zitambarulika pachanya pa chimati.

²³ Wa mauta wangumuvundumukiya kwakofya, wangumupong'a wangumusuzga ndi kuŵaŵa.

²⁴ Kweni uta wake unguma gwa, manja ghake ghanguchitika ghapusa ndi manja gha wanthazi yo waku Yakobe (ndi zina la mliska, jarawe laku Yisraele),

²⁵ mwaku Chiuta wa ausu mweniyo wakakovyanga, mwaku Chiuta Wanthazi zose mweniyo wakakutumbikanga ndi vitumbiku vya kuchanya, vitumbiku vya ndimba vyenivyo vija pasi, vitumbiku vyamu chifuŵa ndi vya chibali.

²⁶ Vitumbiku vya ausu vyakulimba kujumpha pa vitumbiku vya mapiri gha muyaya, vyawanangwa vya tumapiri twa muyaya; viŵi pa mutu waku Yosefe ndi pa mphumi yaku yo wangumupatuskako ku ŵana ŵanyake.

²⁷ “Benjamini ndi mphumphi yakuŵenkha, ndi mlenji yiturgha nyama, ndipo ndi mazulo wagaŵa vyakuskowa.”

²⁸ Wose yaŵa ndiwo mitundu chumi ndi yiŵi yaku Yisraele; ndipo ichi ndicho wangukamba uskeu kwaku wo wachiŵatumbika wachitumbika yumoza ndi yumoza ndi chitumbiku chakumwenere.

²⁹ Sono wanguŵachinyiya, ndi wanguti kwaku wo, “Ndikaunjikanga ku mtundu wangu, mukandiŵike pamoza ndi ada mu mphanji yeniyo yemu munda waku Efroni muHiti,

³⁰ mu mphanji yeniyo ye mu munda wapa Makipela, kuchiri ku vuma kwa Mamre, mu charu cha Kanani, cho wangugula Abrahamu pamoza ndi munda wo kwaku Efroni muHiti kuŵa chihara cha masanu.

³¹ Muwa ndimu wanguŵikika Abrahamu ndi Sara muwoli wake; muwa ndimu wanguŵikika Yisaki ndi Rebeka muwoli wake, ndipo mwenimuwa ndinguŵika Leya;

³² munda ndi mphanji yo yemwenimo vingugulika ku ŵaHiti.”

³³ Penipo Yakobe wangumara kuchinyiya ŵana ŵake wanguŵika marundi ghake pa chita, ndipo wangututa kwa umari, ndipo wanguunjikika ku mtundu wake.