Chiyambo 48 - Tonga Bible 1986

Yakobe watumbika ŵana ŵaku Yosefe

¹ Pavuli paku ichi ŵangumunene Yosefe, “Ehe, ausu ŵatama,” viyo wanguruta ndi ŵana ŵake ŵanthurumi ŵaŵi, Manase ndi Efraimu.

² Ndipo ŵangumunene Yakobe, “Mwana wako Yosefe waza kwako”; sono Yisraele wangujikhomeska ndi wanguja songa pa chita.

³ Ndipo Yakobe wanguti kwaku Yosefe, “Chiuta Wanthazi zose wangundiwoneke pa Luzu mu charu cha Kanani ndi wangunditumbika,

⁴ ndipo wanguti kwangu, ‘Ehe, ndikakupaskanga mphapu, ndi kukwandaniska, ndipo ndikakuchitanga makhamu gha ŵanthu, ndipo ndikapaskanga charu ichi ku mphapu yako ya pavuli pako kuŵa chihara cha muyaya.’

⁵ Ndipo sono ŵana ŵako ŵanthurumi ŵaŵi wo ŵangupapika kwako mu charu cha Egipiti ndenga ndindaze ine kwako mu Egipiti, mbangu: Efraimu ndi Manase ŵakaŵanga ŵangu mwenimo ŵalili Rubene ndi Simeoni.

⁶ Ndipo mphapu yo yikaŵangako pavuli pawo ŵakaŵanga ŵako; ŵakadanikanga ndizina la ŵana ŵanyawo mu chihara chawo.

⁷ Pakuti penipo ndingutuwa mu Padani, Rakelo ku chitima changu wangufwa mu charu cha Kanani pa nthowa penipo penga peche mtunda wakuya ku Efrata; ndipo ndingumuŵika penipa pakuya ku Efrata (ndiyo Betelehemu).”

⁸ Penipo Yisraele wanguwona ŵana ŵanthurumi ŵaku Yosefe wanguti, “Mbayani yaŵa?”

⁹ Yosefe wanguti ku wiske, “Yaŵa mbana ŵangu wo Chiuta wakundipaska kuno.” Ndipo iyo wanguti, “Yiza nawo kwangu, nditukupempha, alinga ndiŵatumbike.”

¹⁰ Sono maso ghaku Yisraele ghanguchita ndandi chifukwa cha ukhongwe, viyo wanguziŵa kuwona cha. Viyo Yosefe wanguza nawo pafupi pake; ndipo wanguŵafyofyontha ndi wanguŵafukatiya.

¹¹ Ndipo Yisraele wanguti kwaku Yosefe, “Ndengavi ghanaghanu lakuti ndiwonenge chisku chako; ndipuuli chiuta wandirongosole kuwona ŵana ŵako ŵanthurumi nawo so.”

¹² Sono Yosefe wanguŵatuzgapo pa makongono ghake, ndipo wangukotama kurazga chisku chake pasi.

¹³ Ndipo Yosefe wahguŵato ŵaŵi viyo, Efraimu mu janja lake lakurghiya kumutole ku janja la maze laku Yisraele, ndipo Manase mu janja lake la maze kumutole ku janja lakurghiya laku Yisraele ndi wanguza nawo pafupi pake.

¹⁴ Ndipo Yisraele wangutambaruwa janja lake lakurghiya ndi wanguliŵika pa mutu waku Efraimu yo wenga mumana, ndipo janja lake lamaze pa mutu waku Manase, kupambaniskana manja ghake, pakuti Manase ndiyo wenga wa umwali.

¹⁵ Ndipo wangutumbika Yosefe ndi wanguti, “Chiuta paurongo paku mweniyo ada Abrahamu ndi Yisaki wangwenda, Chiuta mweniyo wandirongozga mu umoyo wangu utali kufika ku zuŵa lino,

¹⁶ mungelo wa Ambuya mweniyo wandiwombo ku masoka ghose, watumbike ŵanyamata yaŵa: ndipo mwaku iwo zina langu likiyikiye, ndipo zina la ŵada Abrahamu ndi Yisaki, ndipo ŵakuwe ŵakwandana mu charu chapasi.”

¹⁷ Penipo Yosefe wanguwona kuti awiske ŵaŵika janja la marghe pa mutu waku Efraimu chingumukarariska: ndipo wanguto janja la awiske kulituzgapo pa mutu waku Efraimu kuliŵika pa mutu Manase.

¹⁸ Ndipo Yosefe wanguti ku awiske, “Viyo cha ada, pakuti ndiyu waumwali; ŵikani janja linu lakurghiya pa mutu wake.”

¹⁹ Kweni awiske ŵangukana, ndi ŵanguti, “Ndiziŵa wa mwana wangu, ndiziŵa, iyo nayo wakaŵanga mtundu, ndipo nayo so wakaŵanga mukuru; ndipuuli mhurwa wake wakaŵanga kwakuruska iyo, ndipo mphapu yake yikaŵanga mitundu yinandi.”

²⁰ Viyo wanguŵatumbika zuŵa leniliya wanguti, “Mwaku iwe Yisraele ŵakataulanga vitumbiku vyakuti, ‘Chiuta wakuchite uli ndi Efraimu uli ndi Manase’ ” ndipo viyo wanguŵika Efraimu ku urongo kwaku Manase.

²¹ Sono Yisraele wanguti kwaku Yosefe, “Ehe, nde pafupi kufwa, kweni Chiuta wakaŵanga nawe, ndipo wakakuwezgiyanga so ku charu cha auskemwe.

²² Ndipo so ndakupaska iwe kwakuruska ku ŵana ŵanyako sendemu limoza la phiri lo ndingukwamphuwa ku janja la Amori ndi lipanga langu ndi uta wangu.”