Chiyambo 45 - Tonga Bible 1986

Yosefe watijivumbuwa ku ŵabali ŵake

¹ Sono Yosefe wangutondeka kujiko paurongo paku wose wo ŵanguma pafupi nayo; ndipo wangukambura, “Tuzgani we yose kwaku ine.” Viyo pengavi nanga njumoza wanguŵa nayo pamoza penipo Yosefe wangujivumbuwa mweneko ku ŵana ŵanyake.

² Ndipo wanguliya kwakubangula, mwakuti ŵa Egipiti ŵanguvwa kuliya ko, ndi ŵa nyumba yaku Farao ŵanguvwa nawo.

³ Ndipo Yosefe wanguti ku ŵana ŵanyake, “Ndine Yosefe; kumbi ada ŵeche ŵamoyo?” Kweni ŵana ŵanyake ŵangutondeka kumwamuka, pakuti ŵanguzizwa ndi kuŵapo kwake.

⁴ Viyo Yosefe wanguti ku ŵana ŵanyake, “Zani pafupi pangu, nditukupemphani.” Ndipo ŵanguza pafupi. Ndipo iyo wanguti, “Ndine mwana munyinu, Yosefe, mweniyo munguguliska mu Egipiti.

⁵ Ndipo sono rekani kujisuzga pamwenga kukaripa paku mwaŵeni, chifukwa mungundiguliska kuno; pakuti Chiuta wangundituma kumudanjiriyani kwachitaska umoyo.

⁶ Pakuti chilala ichi chaja virimika ivi viŵi mu charu ichi; ndipo vichalipo virimika vinkhonde mwaku vyo kuti mukaŵanga kulima cha chingana nkhuvuna.

⁷ Ndipo Chiuta wangundituma kumudanjiriyani alinga ndikupozomoskiyeni ŵakusongo mu charu chapasi, ndi kuŵasunga ŵamoyo ŵakujapo.

⁸ Viyo kuti ndimwe cha mungundituma kuno, kweni ndi Chiuta; ndipo iyo wakundisanduska, mpapi kwaku Farao ndi mbuya wa nyumba yake yose ndi mweruzgi pa charu chose cha Egipiti.

⁹ Tinthimikani ndi rutani, ada mukaŵanene kuti, ‘Mwana winu Yosefe watiti, Chiuta wakundimika kuŵa mbuya wa Egipiti yose; sikiyani kunu kwangu, mungasweranga cha;

¹⁰ mwazamuja mu charu cha Gosheni, ndipo mwazamukuŵa pafupi nane, imwe ndi ŵana ŵinu ndi ŵana ŵa ŵana ŵinu, ndi viŵetu vinu, ndi miskambu yinu, ndi vyose vyenivyo mwe navyo;

¹¹ ndipo kwenikuwa ndazakumovyani, pakuti vichaliko virimika vinkhonde vya chilala vyo vituza; kopa kuti vinu imwe ndi ŵamu nyumba zinu, ndi vyose vyo mwe navyo, mungakavuka.’

¹² Ndipo sono maso ghinu ghawona, ndi maso gha mhurwa wangu Benjamini, kuti ndi mlomo wangu weniwo ukamba namwe.

¹³ Kaŵaneniyeni ada gha unozgi wangu mu Egipiti ndi vyose vyenivyo mwawona. Tinthimikani ndi mukazi nawo kuno ada.”

¹⁴ Sono wangukotamiya pa khosi la mhurwa wake Benjamini ndi wanguliya; ndipo Benjamini wanguliya pa khosi lake.

¹⁵ Ndipo wangufyofyontha ŵana ŵanyake wose ndi wanguliya paku wo; ndipo pavuli pake ŵana ŵanyake wangukamba nayo.

¹⁶ Penipo makani ghanguvwika mu nyumba yaku Farao kuti, “Ŵana ŵanyake ŵaku Yosefe ŵaza,” chingumukondweska limu Farao ndi ŵateŵeti ŵake.

¹⁷ Ndipo Farao wanguti kwaku Yosefe, “Uŵanene ŵana ŵanyako, ‘Chitani ichi, mangani katundu pa vinyama vinu ndipo muwere ku charu cha Kanani;

¹⁸ ndipo mukato uskemwe ndi ŵamu nyumba zinu, ndi mukazi kwangu, ndipo ndazakumupaskani charu chamampha kwakuruska mu Egipiti, ndipo mwazamukurgha vya mafuta vya charu ichi.’

¹⁹ Kaŵalanguliyeni so kuti, ‘Chitani ichi, toni magareta gha mu charu cha Egipiti ghakukwerapo malitema ghinu ndi ŵawoli ŵinu, ndipo mukato uskemwe ndi mukazi.

²⁰ Kwachighanaghanako ndi vinthu vinu cha pakuti vyamampha vyakunozga ukongwa vya charu cha Egipiti vinu.’ ”

²¹ Ŵana ŵaku Yisraele ŵanguchita viyo; ndipo Yosefe wanguŵapaska magareta, kwakulingana ndi langulu laku Farao ndipo wanguŵapaska kamba waulendo.

²² Ku yumoza ndi yumoza waku wo wose wangupaska vivwalo vyapa manyanda; kweni kwaku Benjamini wangupaska machumi pe chumi gha ndrama za siliva ndi vivwalo vyapa manyanda vinkhonde.

²³ Ku awiske wangutuma ivi: mbunda chumi zakupingizgika ndi vinthu vyamampha vyamu Egipiti, ndi mbunda zinthukazi chumi zakupingizgika ndi trigu, chiŵande, ndi kamba wapa ulendo wa awiske.

²⁴ Pavuli wanguŵatuma ŵana ŵanyake, ŵanguruta, ndipo ŵachisoka wanguti kwaku wo, “Mungendamubayana cha mu nthowa.”

²⁵ Viyo ŵanguruta ŵangukwera kutuwa mu Egipiti, ndipo ŵangufika ku charu cha Kanani ku uskeu Yakobe.

²⁶ Ndipo ŵangumunene, “Yosefe weche wamoyo, ndipo ndi mweruzgi pa charu chose cha Egipiti.” Ndipo mtima ungufwa chipoyo, pakuti wanguvwana nawo cha.

²⁷ Kweni wanguti ŵamunene mazu ghose ghaku Yosefe, ghenigho wanguŵapangizga, ndipo wanguti wawona magareta ghenigho Yosefe wangumutumiya kwachimunyamuriyapo, mzimu waku Yakobe uskeu unguweremo;

²⁸ ndipo Yisraele wanguti, “Mphenapa, Yosefe mwana wangu ngwamoyo, ndirutenge kwachimuwona, ndenga ndindafwe.”