Chiyambo 35 - Tonga Bible 1986

Yakobe wazenga ku Betele

¹ Chiuta wanguti kwaku Yakobe, “Soka, rutanga ukwere ku Betele, ndipo ukajenge kweniko; ndipo ukachiteko jochero lakusopiyapo Chiuta yo wangukuwoneke penipo unguthaŵa ku muku wako Esau.”

² Viyo Yakobe wanguti ku ŵamu nyumba yake ndi kwaku wose ŵeniwo ŵenga nayo, “Tayani ŵachiuta ŵalendo wo ŵe mukati mwinu, ndipo mujiphoto, ndipo musinthe vyakuvwala vinu;

³ po ndipo tisokenge tirutenge ku Betele, kuti nkhachite kwenikuwa jochero lakusopiyapo Chiuta mweniyo wangundamuka mu zuŵa la suzgu yangu ndipo waŵa nane kweniko kosendinguya.”

⁴ Viyo ŵangupereka kwaku Yakobe ŵachiuta wose ŵachilendo ŵeniwo ŵenga nawo, ndi ndeŵeleŵe zo zenga mu makutu ghawo; ndipo wangubisa kusi ku chimuti cha nthunthu cho chenga pafupi ndi Shekemu.

⁵ Ndipo penipo ŵarutanga wofi wakutuwa kwaku Chiuta unguŵa pa misumba yo yenga kwakuzunguliya iwo, viyo kuti ŵengavi kundondoloska ŵana ŵaku Yakobe.

⁶ Ndipo Yakobe wanguza ku Luzi (ndiyo Betele), yo wemu charu cha Kanani, iyo ndi ŵanthu wose ŵeniwo ŵenga nayo,

⁷ ndipo pa wanguzengapo chiguŵa cha kusopiyapo ndi wangudana malo gho Ele-betele, chifukwa penipa Chiuta wangujirongo kwaku iyo po wanguthaŵa ku muku wake.

⁸ Ndipo Debora, mulezi waku Rebeka wangufwa, ndipo wanguŵikika kusi ku muti wa nthunthu pa sendemu la Betele; viyo zina lake lingudanika Aloni-bakutu.

⁹ Chiuta wanguwoneke so Yakobe, wanguti wawe ku Padani-aramu, ndi wangumutumbika.

¹⁰ Ndipo Chiuta wanguti kwaku iyo, “Zina lako ndiwe Yakobe, kuti ukadanikanga so Yakobe cha, kweni Yisraele ndilo zina lako.” Viyo zina lake lingudanika Yisraeli.

¹¹ Ndipo Chiuta wanguti kwaku iyo, “Ndine Chiuta wanthazizose: upapane ndiwandane; mtundu ndi mpingu wa mitundu ukatuwanga mwako, ndipo ŵakaronga ŵakatuwanga mwako.

¹² Charu chenicho ndingupaska Abrahamu ndi Yisaki ndikapaskanga iwe, ndipo ndikapaskanga charu cho ku mphapu yako pavuli pako.”

¹³ Sono Chiuta wangukwera kutuwako kwake mu malo ghenigho wangukamba nayo.

¹⁴ Ndipo Yakobe wangumika chichiri thopu mu malo ghenigha, chichiri cha mwa; ndipo wangudira mpasko wakumwa paku cho, ndi wangudira mafuta paku cho.

¹⁵ Viyo Yakobe wangudana zina la malo penipo Chiuta wangukamba nayo, Betele.

Rakelo watufwa pakupapa Benjamini

¹⁶ Pavuli wangwenda lwendo kwamba pa Betele, ndipo penipo wenga weche patali ku Efrata, Rakelo nthumbo yake yinguyuka ndipo wenga ndi unonono.

¹⁷ Ndipo penipo wenga mu unonono wake, muzamba wanguti kwaku iyo, “Ungopanga cha, pakuti ukaŵanga ndi mwana munthurumi munyake.”

¹⁸ Ndipo penipo mzimu wake warutanga (pakuti wangufwa) wangudana zina lake Benono; kweni wiske wangumudana Benjamini.

¹⁹ Viyo Rakelo wangufwa ndipo wanguŵikika pa nthowa yakuya ku Efrata (yo ndi Betele),

²⁰ ndipo Yakobe wangumika chichiri pa muunda wake; chichiri cha muunda waku Rakelo, cho che penipa kufika msana wale.

²¹ Yisraele wangurutiliya ku nthazi ndi lwendo, ndi wangujintha hema lake kurutiliya pa nthazi pa sonjo wa Edere.

²² Penipo Yisraele wajanga mu charu chiya Rubene wanguruta ndi wangula ndi Biliha mbiligha ya awiske; ndipo Yisraele wanguvwa ichi. Sono ŵana ŵanthurumi ŵaku Yisraele ŵenga chumi ndi ŵaŵi (12).

Ŵana ŵanthurumi ŵaku Yisraele

²³ Ŵana ŵaku Leya: Rubene (waumwali waku Yakobe), Simeoni, Levi, Yuda, Isakara, ndi Zebuluni.

²⁴ Ŵana ŵanthurumi ŵaku Rakelo: Yosefe ndi Benjamini.

²⁵ Ŵana ŵanthurumi ŵaku Biliha mwali waku Rakelo: Dani ndi Naftali.

²⁶ Ŵana ŵanthurumi ŵaku Zilpa, mwali waku Leya: Gadi ndi Ashere. Yaŵa ndiwo ŵenga ŵana ŵanthurumi ŵaku Yakobe wo ŵangupapika kwaku iyo mu Padani-aramu.

²⁷ Ndipo Yakobe wanguza ku wiske Yisaki pa Mamre pamwenga Kiriatarba (yo ndi Hebroni), penipo Abrahamu ndi Yisaki ŵanguja.

²⁸ Sono mazuŵa ghaku Yisaki ghenga virimika machumi pe chumi pachanya machumi ghankhonde ndi ghatatu (180).

²⁹ Ndipo Yisaki wangututa kwakumariya; ndi wangufwa ndi wangutoreke ku ŵanthu ŵake, wakukota ndi wa mazuŵa ghanandi; ndipo ŵana ŵake Esau ndi Yakobe ŵangumuŵika.