Chiyambo 34 - Tonga Bible 1986

Dina ndi ŵaShekemu

¹ Sono Dina mwana munthukazi waku Leya yo wangupapiya Yakobe, wanguruta kwachichezga ndi ŵanthukazi ŵa charu cho;

² ndipo penipo Shekemu mwana waku Hamoro muHivi, nduna ya charu cho, yingumuwona, yingumuko ndi kula nayo, yingumuyuyuwa.

³ Ndipo mzimu wake unguya kwaku Dina mwana munthukazi waku Yakobe; wangwanja mwali yo ndipo wangukamba nayo kwakoloŵa.

⁴ Shekemu wangukamba ndi wiske Hamoro, wanguti, “Munditole mwali uyu waŵe muwoli wangu.”

⁵ Sono Yakobe wanguvwa kuti wakazuzga mwana wake Dina; kweni ŵana ŵake ŵanthurumi ŵenga ndi ng'ombe mu dondo, viyo Yakobe wanguja chisisi mpaka penipo ŵanguwe.

⁶ Ndipo Hamoro wiske waku Shekemu wanguruta kwaku Yakobe kwachikamba nayo.

⁷ Ŵana ŵanthurumi ŵaku Yakobe ŵanguza kutuwa ku dondo penipo ŵanguvwa ndi ichi; ŵana ŵa ŵanthurumi ŵangukaripa ndi ŵangukwiya ukongwa, chifukwa wanguŵikamo ukazuzi mu Yisraele pakugona ndi mwana waku Yakobe, pakuti chinthu chaviyo chingwenere kuchitika cha.

⁸ Kweni Hamoro wangukamba nawo, kuti, “Mtima wa mwana wangu Shekemu unweka mwana winu; nditukuŵeyereni, mupaskeni ŵatolane.

⁹ Mutolanenge nafwe, mutipaskenge ŵana ŵinu ŵanthukazi ndipo imwe mutonge ŵana ŵanthukazi ŵidu kuŵa ŵawoli ŵinu.

¹⁰ Mukajanga nafwe, ndipo charu chikajurikiyanga imwe: mujenge ndi muchite malonda mwaku cho, ndipo muwoniyemo vinthu mwenimo.”

¹¹ Shekemu wangukamba so ku awiske ndi ku ŵazichi ŵake, “Ndisaniye wezi mu maso ghinu, ndipo chenicho mukakambanga kwaku ine ndikaperekanga.

¹² Mundipemphe vinandi nge vyawezi vya ukwati ndi vyaulera, ndipo ndikaperekanga uli ndimo mukambiyenge kwangu; ine mundipaske mwali yo pe kuŵa muwoli wangu.”

¹³ Ŵana ŵanthurumi ŵaku Yakobe ŵangwamuka Shekemu ndi wiske Hamoro kwakupusika, chifukwa wangukazuzga mzichi wawo Dina.

¹⁴ Ŵanguti kwaku wo, “Tingachita cha chinthu ichi, kupaska mzichi widu kwaku yo ngwambura kuchinjika, pakuti chaviyo nchilengesku kwaku ifwe.

¹⁵ Pa nthowa iyi yimoza pe tikazomerezganga imwe; yakuti mukaŵanga uli ndimo tilili ifwe kuti munthurumi we yose waku imwe wachinjike,

¹⁶ Sono po ndipo tikakupaskaninga ŵana ŵidu ŵanthukazi, ndipo ifwe tikatonga ŵana ŵinu ŵanthukazi kuŵa ŵidu, ndipo tikajanga namwe ndi tikaŵanga ŵamoza.

¹⁷ Kweni asani kuti mukativwiyanga cha ndi kuchinjika, iku tikatuzgangako mwana widu ndi tikarutanga.”

¹⁸ Mazu ghawo ghangukondweska Hamoro ndi mwana wake Shekemu.

¹⁹ Ndipo munyamata kuti wanguswera cha kuchichita cho chinthu, chifukwa wenga walikondwa mu mwana waku Yakobe. Iyo wenga wakulonde ulemu kwakuruska wose pa nyumba yake.

²⁰ Viyo Hamoro ndi mwana wake Shekemu ŵanguza ku likomo la msumba wawo ndi wangukamba ndi ŵanthurumi ŵa msumba wawo,

²¹ “Yaŵa ŵanthu ndi mabwezi ghidu; ŵazomerezgeke kuja mu charu ndi kuchitamo malonda, pakuti, ehe, charu nchikuru kukwana kwaku wo, tiyeni titonge ŵana ŵawo ŵanthukazi kuŵa ŵawoli, ndipo tiyeni tiŵapaskenge ŵana ŵidu ŵanthukazi.

²² Pa chinthu ichi pe ndipo ŵangazomere kuja nafwe, kuti tiŵe mtundu umoza: kuti munthurumi we yose mukati mwidu wachinjike mo iwo ŵalili ŵakuchinjika.

²³ Kumbi ng'ombe zawo, vyuma vyawo, ndi vyakuŵeta vyawo kuti viŵenge vidu cha? Tizomerezgane nawo ŵaka, ndipo ŵakajanga nafwe.”

²⁴ Ndipo wose ŵeniwo ŵangutuliya kubwalo pa likomo la msumba wake ŵangutegherezga kwaku Hamoro ndi mwana wake Shekemu; ndipo munthurumi yose wanguchinjika, wose ŵeniwo ŵangutuliya kubwalo pa likomo la msumba wuwa.

²⁵ Pa zuŵa la chitatu penipo ŵenga ndi urwirwi, ŵaŵi ŵa ŵana ŵaku Yakobe, Simeoni ndi Levi, ŵazichi ŵaku Dina, ŵanguto malipanga ghawo ndi ŵangubaya ŵanthurumi wose.

²⁶ Ŵangubaya Hamoro ndi mwana wake Shekemu ndi lipanga, ndipo ŵangutuzga Dina mu nyumba yaku Shekemu ndipo ŵanguruta.

²⁷ Ndipo ŵana ŵaku Yakobe ŵanguza pa ŵakubayika wo, ndi ŵanguyora vya mu msumba, chifukwa mzichi wangukazuzgika,

²⁸ Ŵanguto viŵetu vyawo ndi nyama, mbunda zawo, ndi chinthu chose cho chenga mu msumba ndi munda;

²⁹ uromba wawo wose, ŵana ŵawo wose, ndi ŵawoli ŵawo, wo ŵenga mu zinyumba, ŵanguyora ndi ŵangusanduska muskowo wawo.

³⁰ Sono Yakobe wanguti kwaku Simeoni ndi Levi, “Mwatole suzgu paku ine pakundisanduska wakuŵembeka ku ŵakuja mu charu ichi ŵaKanani ndi ŵaPeresi; ine ndendi ŵamanavi, ndipo asani ŵawunganirana pamoza paku ine ndi kupong'ana nane ndikanangikanga, ine pamoza ndi nyumba zangu.”

³¹ Kweni iwo ŵanguti, “Kumbi wachitenge ndi mzichi widu ulaka ndi mureŵi?”