Chiyambo 23 - Tonga Bible 1986

Nyifwa ndi kuŵikika kwaku Sara

¹ Sara wanguŵa wa virimika machumi pe chumi pachanya machumi ghaŵi ndi vinkhonde ndi viŵi (127); ivi vyenga virimika vya umoyo waku Sara.

² Ndipo Sara wangufwa pa Kiriatarba (yo ndi Hebroni) mu charu cha Kanani; ndipo Abrahamu wanguseremo kwachitenjere Sara ndi kumuliya.

³ Ndipo Abrahamu wangutuwapo paurongo pa wakufwa wake, ndipo wanguti ku ŵaHiti,

⁴ “Ine nde mlendo ndi muyinga mukati mwinu; ndipaskenipo malo mukati mwinu kuŵa malo gha masanu, kuti ndiŵikepo wakufwa wangu kutuzgako ku maso kwangu.”

⁵ ŴaHiti ŵangumwamuka Abrahamu,

⁶ “Titegherezge, mbuya widu, iwe we chilimbi cha nthazi mukati mwidu. Ŵika wakufwa wako mwakusankhika ukongwa mwa miunda yidu; palivi yumoza waku ifwe wakanizgenge iwe muunda wake, pamwenga kukukanizga kuŵika wakufwa wako.”

⁷ Abrahamu wangusoka ndi wangukotama ku ŵaHiti, ŵanthu ŵa charu cho.

⁸ Ndipo wanguti kwaku wo, “Asani mwe ŵakukhumba kuti ine ndiŵike wakufwa wangu kutuwako ku maso ghangu, mundivwe, ndipo ndipemphiyeni kwaku Efroni mwana munthurumi waku Zohara,

⁹ kuti wandipaske mphanji yaku Makipela, yeniyo njake; yepa umari wa munda wake. Wandiguliske pa mtengo wakwenere paurongo pinu, kuŵa chihara changu chakuŵikamo ŵakufwa.”

¹⁰ Sono Efroni wanguja mukati mu ŵaHiti; ndipo Efroni muHiti wangwamuka Abrahamu, ŵachivwa ŵaHiti, ŵeniwo wose ŵanguruta ndi kusere pa likomo la msumba wo,

¹¹ “Awa, mbuya wangu, undivwe; nditukupaska munda wo, ndipo nditukupaska mphanji yo ye mwenimo; pa maso pa ŵana ŵanthurumi ŵa mtundu wangu nditukupaska wo; ŵika wakufwa wako.”

¹² Sono Abrahamu wangukotama pasi paurongo pa ŵanthu ŵa charu chiya.

¹³ Ndipo wanguti kwaku Efroni ŵachitegherezga ŵanthu ŵa charu chiya, “Kweni asani ukhumba, undivwe; ndikapaskanga mtengo wa munda; uwuronde kwangu, alinga ndiŵikemo wakufwa wangu mwenimuwa.”

¹⁴ Efroni wangwamuka Abrahamu,

¹⁵ “Mbuyangu unditegherezge. Kachigaŵa ka charu kakwenere mtengo wa ndrama za siliva machumi pe chumi ghanayi (400), nkhane izi pakati pako ndi ine? Wika wakufwa wako.”

¹⁶ Abrahamu wanguzomerezgana ndi Efroni; ndipo Abrahamu wangumupimiya Efroni siliva mweniyo wanguzumbuwa mu makutu gha ŵaHiti, ndrama za siliva machumi pe chumi ghanayi (400) kwakulingana ndi myeso ya nyengo yo mu ŵamalonda.

¹⁷ Viyo munda waku Efroni mu Makipela wo wenga ku vuma kwa Mamre, munda ndi mphanji yo yenga mwenimo ndi miti yose yo yenga mu munda wo, kosekose mu chigaŵa chose,

¹⁸ unguza kwaku Abrahamu kuŵa chihara pa maso gha ŵaHiti, paurongo paku wose ŵeniwo ŵangusere pa likomo la msumba wake.

¹⁹ Pavuli paku ivi, Abrahamu wanguŵika Sara muwoli wake mu mphanji ya munda wo wa Makipela, ku vuma kwa Mamre (yo ndi Hebroni) mu charu cha Kanani.

²⁰ Munda ndi mphanji yo ye mukati mwake vingupaskika kwaku Abrahamu nge nchihara cha masanu ndi ŵaHiti.