Chiyambo 22 - Tonga Bible 1986

Yisaki waperekeka sembe

¹ Pavuli pa vinthu ivi, Chiuta wangwesa Abrahamu, ndi wanguti kwaku iyo, “Abrahamu!” Ndipo iyo wanguti, “Nde pano.”

² Wanguti, “To mwana wako yumoza pe, Yisaki yo utanja, ndipo urute ku charu cha Moriya, ndipo ukamupereke iyo kwenikuwa kuŵa sembe yakocha pa limoza la mapiri lo ndikakuneniyanga.”

³ Viyo Abrahamu wanguyuka ndi mlenji-lenji wangulongoso mbunda yake, ndipo wangutopo ŵaŵi ŵa ŵanyamata ŵake pamoza nayo, ndi, mwana wake Yisaki; ndipo wangudumuwa nkhuni za sembe yakocha, ndipo wangusoka ndi wanguruta ku malo gho Chiuta wangumunene.

⁴ Pa zuŵa la chitatu Abrahamu wanguyinuska maso ghake wangughawona malo gho patali.

⁵ Sono Abrahamu wanguti ku ŵanyamata ŵake, “Muje penipano ndi mbunda; ine ndi mhurwa uyu tikayanga kuwa kunthazi kwachisopa, ndipo tazamuwere so kwaku imwe.”

⁶ Ndipo Abrahamu wanguto nkhuni za sembe yakocha wangupingizga Yisaki mwana wake; ndipo wangupinga moto mu janja lake ndi chimayi. Viyo ŵaŵi ŵangurongozgana.

⁷ Yisaki wanguti ku awiske Abrahamu, “Ada!” Ndipo iwo ŵanguti, “Nde pano, wa mwana wangu.” Iyo wanguti, “Awonani moto ndi nkhuni, kweni mberere ye pani ya sembe yakocha?”

⁸ Abrahamu wanguti, “Chiuta wakapaskanga mberere ya sembe yakocha, wa mwana wangu.” Viyo ŵanguruta ŵaŵi viyo pamoza.

⁹ Penipo wanguza pa malo ghenigho Chiuta wangumunene, Abrahamu wanguzengapo jochero penipa, ndipo wanguyalikapo nkhuni umampha-umampha, ndi wangumanga Yisaki mwana wake, ndi wangumularika pa jochero pa nkhuni pachanya.

¹⁰ “Sono Abrahamu wangutambaruwa janja lake, ndi wanguto chimayi kuti wabaye mwana wake.”

¹¹ Kweni mungelo waku Chiuta wangudanirizga kwaku iyo kuturiya kuchanya, ndi wanguti, “Abrahamu, Abrahamu!” Ndipo iyo wanguti, “Nde pano!”

¹² Wanguti, “Reka kumubaya mwana yo, chingana nkhuchita nayo kanthu kanyake cha; pakuti sono ndiziwa kuti utopa Chiuta, pakuti wakaniliya mwana wako cha, mwana wako yumoza pe, kwaku ine.”

¹³ Ndipo Abrahamu wangulereska, ndi wanguwona, ku msana kwake phongo, wanguwira masengwi ghake mu thundu; ndipo Abrahamu wanguruta ndi wanguto phongo, ndipo wangumupaska kuŵa sembe yakocha mu malo gha mwana wake.

¹⁴ Viyo Abrahamu wangudana zina la malo gha, “Ambuya akapaskanga,” uli ndimo kukambikiya mpaka zuŵa lino, “Pa phiri la Ambuya chikapaskikanga.”

¹⁵ Ndipo mungelo waku Chiuta wangudanirizga kwaku Abrahamu kachiŵi kuturiya kuchanya,

¹⁶ wanguti, “Ndajirapizga ndamwene, atiti Ambuya, chifukwa chakuti wachita ichi, ndipo ulivi kukaniliya mwana wako, mwanawako yumoza pe,

¹⁷ kwakuneneska ndikakutumbikanga ndipo ndikandaniskanga mphapu yako uli ndi nyenyezi za kuchanya, ndipo uli ndi muchenga wo wepa likumba la nyanja. Mphapu yako yikaharanga malikomo gha ŵakupindikana nayo.

¹⁸ Ndipo mu mphapu yako mitundu yose ya charu chapasi yitumbikikenge chifukwe wavwiya mazu ghangu.”

¹⁹ Viyo Abrahamu wanguwere ku ŵanyamata ŵake, ndipo ŵangusoka ŵangulongozgana kuya ku Beresheba; ndipo Abrahamu wanguja pa Beresheba.

²⁰ Vinguti vyaŵapo vinthu ivi Abrahamu wanguvwa kuti, “Ehe, Milka nayo wapapa ŵana ku mwana munyako Nahoro:

²¹ Uzu wa umwali, Buzu mhurwa wake, Kemuele awiske ŵaku Aramu,

²² Chesede, Hazo, Pildasha, Jidlapa, ndi Betuele.”

²³ Betuele wangupapa Rebeka. Yaŵa ŵankhonde ndi ŵatatu Milka wangupapa kwaku Nahoro, mwana munyake waku Abrahamu.

²⁴ Ndipo so chidandanu chake, yo zina lake wenga Rauma, wangupapa Teba, Gahama, Tahasha, ndi Maka.