Chiyambo 16 - Tonga Bible 1986

Sarai ndi Hagara

¹ Sono Sarai, muwoli waku Abramu wengavi kumupapiya ŵana. Wenga ndi muŵanda munthukazi muEgipiti yo zina lake lenga Hagara.

² Ndipo Sarai wanguti kwaku Abramu, “Awona, Ambuya andikanizga kupapa ŵana; sere mu muŵanda munthukazi wangu: pamwenga ndikalondiyanga ŵana mwaku yo.” Ndipo wanguvwiya mazu ghaku Sarai.

³ Viyo, pavuli Abramu wati wajamo virimika chumi mu charu cha Kanani, Sarai, muwoli waku Abramu, wanguto Hagara muEgipiti yo, muŵanda munthukazi wake, ndi wangumupaska kwaku Abramu murumi wake kuŵa muwoli wake.

⁴ Ndipo wangusere mwaku Hagara ndi wanguzuwuka, ndipo penipo wanguwona kuti wanguzuwuka wangulereska mbuyake ndi myuyu.

⁵ Ndipo Sarai wanguti kwaku Abramu, “Ubudi weniwo wachitikiya paku ine uŵe paku! Ndingukupaska muŵanda munthukazi wangu mu chifukwa chako, kweni wanguti wawona kuti wazuwuka, wangundilereska ndi myuyu. Ambuya ŵeruzge pakati paku iwe ndi ine!”

⁶ Kweni Abramu wanguti kwaku Sarai, “Ehe, muŵanda munthukazi wako wemu nthazi yako; uchite nayo chenicho ungakhumba iwe.” Sono Sarai wangumusuzga ndipo wanguthaŵa kwaku iyo.

⁷ Mungelo wa Ambuya wangumusaniya pa chisime cha maji mu bozwa; chisima chapa nthowa yakuya ku Shuru.

⁸ Ndipo iyo wanguti, “Hagara, muŵanda munthukazi waku Sarai, watuwa pani, ndipo utiya pani?” Iyo wanguti, “Ndithaŵa ku mbuyangu Sarai.”

⁹ Mungelo wa Ambuya wanguti kwaku iyo, “Uwere ku mbuyako, ndi ukajithereske kwaku iyo.”

¹⁰ Mungelo wa Ambuya wanguti so kwaku iyo, “Ndikandaniskanga ukongwa limu mphapu zako zo zikaŵanga zambura kuŵerengeka”.

¹¹ Ndipo mungelo wa Ambuya wanguti kwaku iyo, “Iwe wendi nthumbo, ndipo ukapapanga mwana munthurumi, umudanenge zina lake Yishumaele; chifukwa Ambuya awona suzgu yako.

¹² Iyo wakaŵanga munthu nge ndi mbunda yamu dondo, janja lake lirwanenge ndi muthu yose ndipo janja la muthu yose lirwanenge ndi iyo; ndipo wakapindikananga ndi ŵabali ŵake wose.”

¹³ Viyo wangudana zina la Ambuya wo angurongoro nayo, “Ndimwe Chiuta wakuwona”; pakuti wanguti, “Kumbi ndamuwonadi Chiuta ndipo ndajaliriya wamoyo pavuli pakumuwona?”

¹⁴ Viyo chisima chingudanika Bere-lahai-roi, che pakati pa Kadeshe ndi Berede.

¹⁵ Ndipo Hagara wangupapiya Abramu mwana munthurumi ndipo Abramu wangudana zina la mwana wake, Yishumaele mweniyo wangupapa Hagara.

¹⁶ Abramu wenga wa virimika machumi ghankhonde ndi ghatatu pachanya vinkhonde ndi chimoza (86) pa nyengo yo Hagara wangupapiya Yishumaele.