Chiyambo 12 - Tonga Bible 1986

Kudanika kwaku Abramu

¹ Sono Ambuya anguti kwaku Abramu, “Tuwa mu charu chako ndi ku ŵabali ŵako, ndi ku nyumba ya ausu; uye ku charu cho ndikakulongonga.

² Ndipo Ine ndikakuchitanga mtundu ukuru, ndipo ndikakutumbikanga, ndipo ndikachitanga zina lako kuŵa likuru, viyo kuti ukaŵanga chitumbiku.

³ Ndikatumbikanga wo ŵatukutumbika, ndipo yo wakutemba iwe ndikamutembanga; ndipo mwaku iwe mbumba zose zamu charu zikatumbikikanga.”

⁴ Viyo Abramu wanguruta, uli ndimo Ambuya angumunene; ndipo Lote wanguruta nayo. Abramu wenga wavirimika machumi ghankhonde ndi ghaŵi ndi vinkhonde (75) penipo wangutuwako ku Harani.

⁵ Ndipo Abramu wanguto Sarai muwoli wake, ndi Lote mwana munthurumi wa mhurwa wake, ndi usambasi wawo wose weniwo ŵangusambasa, ndi ŵanthu wo ŵanguŵa nawo mu Harani; ndipo ŵangusoka kuruta ku charu cho cha Kanani. Penipo ŵangufika mu charu cha Kakani,

⁶ Abramu wanguporota mu charu cho kuya ku malo gha Shekemu, ku chimuti cha msolo chaku More. Pa nyengo yiya ndipo ŵaKanani ŵemu charu cho.

⁷ Sono Ambuya anguwoneka kwaku Abramu, ndi anguti, “Ndikapaskanga charu ichi ku mbumba zako.” Viyo wanguzenga penipa jochero ku Ambuya ŵeniwo angumuwoneke.

⁸ Kutuwa pa wangundere ku phiri ku vuma kwa Betele, ndi wangujintha hema lake; Betele ku zambwe ndi Ai ku vuma ndipo pa wanguzenga jochero ku Ambuya ndipo wanguromba ku Ambuya.

⁹ Ndipo Abramu wangurutiriya kwenda kulazga ku Negebu mbwenu.

Abramu wasikiya ku Egipiti

¹⁰ Sono kwenga chilala mu charu cho. Viyo Abramu wanguruta ku Egipiti kwachitandara kwenikuwa, pakuti chilala cho chenga chikuru mu charu cho.

¹¹ Penipo wanguŵandika kusere mu Egipiti, wanguti kwaku Sarai muwoli wake, “Ndiziŵa kuti we munthukazi wakutowa pakukuwona;

¹² ndipo asani ŵaEgipiti ŵakuwona ŵatinge, ‘Uyu ndi muwoli wake’; mbwenu ŵandibayenge, kweni iwe ŵakakulekanga wamoyo.

¹³ Unene kuti we mzichi wangu, alinga kuti kundiŵiye umampha ine chifukwa chako, ndi kuti umoyo wangu utaskike chifukwa chako.”

¹⁴ Penipo Abramu wangusere mu Egipiti, ŵaEgipiti ŵanguwona kuti munthukazi yo wenga wakutowa ukongwa.

¹⁵ Ndipo penipo nduna zaku Farao zingumuwona munthukazi, zingumurumba kwaku Farao. Ndipo munthukazi yo wangutoleke ku nyumba yaku Farao.

¹⁶ Ndipo chifukwa chaku iyo wanguchitiya umampha Abramu; ndipo wenga ndi mberere, ng'ombe, mbunda zinthurumi, ŵaŵanda ŵanthurumi, ŵaŵanda ŵanthukazi, mbunda zinthukazi ndi ŵagamila.

¹⁷ Kweni Ambuya angusuzga Farao ndi nyumba yake ndi videru chifukwa chaku Sarai, muwoli waku Abramu.

¹⁸ Viyo Farao wangudana Abramu, ndi wanguti, “Nchine ichi cho wachita iwe kwangu? Chifukwa chine wengavi kundinene kuti ndi muwoli wako?

¹⁹ Chifukwa chine ungunena kuti, ‘Ndi mzichi wangu,’ sono ine ndingumuto kuŵa muwoli? Ehe sono, muwoli wako uyu muto, ndi rutanga.”

²⁰ Ndipo Farao wangulanguliya ŵanthu gha paku iyo; ndipo ŵangwachimulinda ku nthowa ndi muwoli wake, ndi vyose vyo wenga navyo.