Chivumbuzi 2 - Tonga Bible 1986

Uthenga ku ŴaEfeso

¹ “Ku mungelo wa mpingu wamu Efeso lembapo: ‘Vyenivi watiti yo ngwakukoreze mu janja lake lamarghe nyenyezi zo nkhonde ndi ziŵi, yo watenda mukati mu vikoleru-nyali vyo vinkhonde ndi viŵi vya golide.

² “ ‘Ndiziŵa nchitu zako, kutakataka kwako ndi unkhunthiya, ndiziŵa kuti ungakunthiyapo ndi ŵanthu ŵaheni cha, ndi kuti unguŵesa wo ŵatijitamula ŵakutumika, kweni kuti mbaviyo cha, ŵabowozgeka kuti mbatesi;

³ ndiziŵa kuti unkhunthiya we nawo, ndi kuti wavwiyapo suzgu yikuru chifukwa cha zina langu, kweni kuti wagongowa cha.

⁴ Kweni cho ndimikana ndi iwe nchakuti wareka chanju chako chakudanga.

⁵ Viyo kumbuka ko wapaghamuka, ndipo ng'anamuka, ndi chitanga nchitu zako zakudanga. Vinu ndingaza ndi kutuzgapo chikoleru-nyali chako pa malo ghake, asani ureka kupe.

⁶ Kweni nadi ichi we nacho, chakuti utinkha nchitu za ŵaNikolau, Zenizo ine nane so nditinkha.

⁷ Mweniyo we ndi gutu, wavwenge cho Mzimu ukamba ku mipingu. Kwaku yo wapunda, nkhapaskanga kurghapo vyapa muti wa umoyo, wo wemu Paradiso waku Chiuta.’

Uthenga ku Smurna

⁸ “Ndipo ku mungelo wa mpingu wamu Smurna lembapo: ‘Vyenivi watiti wakudanga ndi wakumariya yo, yo wanguŵa wakufwa ndipo wanguwere ku umoyo.

⁹ “ ‘Ndiziŵa suzgu yako ndi ukavu wako (kweni ndiwe msambasi!) ndiziŵa mtonyoro wa ŵakujitamula kuti mbaYuda, po kuti mbaviyo cha, kweni mbampingu waku Satana.

¹⁰ Ungopanga cha vyo ukomwenge. Awonani, diabolo yo wakhumba kupong'a ŵanyake ŵa mwaku imwe mu ulinda, alinga kuti mweseke; ndipo mukasuzgikanga mazuŵa chumi. Uŵe wamagomekezgeka mpaka nyifwa, ndipo nkhakupaskanga ndumbu ya umoyo.

¹¹ Mweniyo we ndi gutu, wavwenge cho Mzimu ukamba ku mipingu. Yo wapunda kuti wakapwetekekanga kose cha ndi nyifwa yo yachiŵi.’

Uthenga ku Pergamo

¹² “Ndipo ku mungelo wa mpingu wamu Pergamo lembapo: ‘Vyenivi watiti mweniyo we ndi lipanga lauyi, la vyepe kosekose.

¹³ “ ‘Ndiziŵa po uja, nadi po pe chitengu-chaufumu chaku Satana, ndipo ukoreska ndi nthazi Zina langu, kuti wakana cha chivwanu changu, chingana ndi mu mazuŵa ghaku Antipase, kaboni wangu wamagomekezgeka, mweniyo wangubayika mukati mwinu, ko waja Satana.

¹⁴ Kweni nde navyo vyawida kukususka iwe pakuti we nawo kweniko ŵanyake wo ŵakoreska chisambizgu cho chaku Balamu, yo wangusambizga Balaki kupong'a chiguŵisku paurongo pa ŵana ŵaku Yisraele, kurgha vinthu vyakubayikiya vyangoza, ndi kuchita ureŵi.

¹⁵ Viyo iwe nawe we nawo wo ŵakoreska kwakukozgana chisambizgu chaku Nikolau.

¹⁶ Viyo ng'anamuka, vinu ndingaza kwako ruŵi, ndikurwana nawo ndi lipanga la mlomo wangu.

¹⁷ Yo we ndi gutu wavwenge cho Mzimu ukamba ku mipingu. Ku wakupunda yo nkhampaskangapo vya mana gho ghakubisika, ndipo nkhampaska nga mwa utuŵa, ndi pa mwa wo zina lifya lakulembekapo, lenilo palive yumoza watiliziŵa, kweni yo waronda pe ndiyo.’

Uthenga ku Thiatira

¹⁸ “Ndipo ku mungelo wa mpingu wamu Thiatira ulembe: ‘Vyenivi watiti Mwana waku Chiuta, mweniyo we ndi maso ulaka nge ndi mlipu wa moto, ndi marundi ghake ghakukozgana ndi mkuŵa wakugabuka.

¹⁹ “ ‘Ndiziŵa nchitu zako, chanju chako, ndichivwanu, ndi uteŵete, ndi unkhunthiya, ndiziŵa kuti nchitu zako zakumariya ziruska zakudanga zo.

²⁰ Kweni nde nako kakukususka iwe, kakuti utumulereska ŵaka munthukazi yo Yezebelu mweniyo watijitamula mchimi-munthukazi; ndipo wasambizga ndi warandizga ŵateŵeti ŵangu, kuti wachitenge ureŵi ndi kurgha vinthu vyakubayikiya vyangoza.

²¹ Ndipo ndingumpaska nyengo yakuti wang'anamuke; ndipo kuti wakhumba cha kung'anumuka, kutuwako ku ureŵi wake.

²² Awona, nkhamlarikanga pa chita chaurwali, ndipo wo mbakureŵana nayo ndikaŵapong'anga mu suzgu yikuru, asani ŵareka kung'anamukako ku machitidu ghake.

²³ Ndipo ŵana ŵake nkhaŵabayanga ŵakafwanga; ndipo yiziŵenge mipingu yose kuti ndine ndipenjapenja zeru ndi mtima: ndipo nkhakupaskaninga munthu we yose kwakulingana ndi machitidu ghinu.

²⁴ Kweni, ndikambiya imwe mwaŵakujapo, ŵamu Thiatira, wo wose ŵalive kukoreska chisambizgu ichi, wo ŵalive kuviziŵa vyandimba vyaku Satana, kwaku imwe ndititi, kuti nkhapong'anga paku imwe chizitu chinyake so cha.

²⁵ Mbwenu, cho mwenacho, koreskani mpaka ndizenge.

²⁶ Ndipo yo wapunda, ndi yo wasunga nchitu zangu mpaka ku umari, kwaku iyo nkhapaskanga mtufu pa mitundu yo,

²⁷ ndipo wakayiwusanga ndi ndodo ya chisulo, uli ndimo viyaŵi vya dongo viphwanyikiya, nge ndimo ine nane ndarondere mazaza ku Ada:

²⁸ ndipo nkhampaskanga thondo lo la mlenji.

²⁹ Mweniyo we ndi gutu, wavwenge cho Mzimu ukamba ku mipingu.’