Chivumbuzi 12 - Tonga Bible 1986

Munthukazi ndi nchalinda mukuru

¹ Munthondwe ukuru unguwoneka kuchanya; munthukazi wakuvwarikika dazi, ndi mwezi pasi pa marwayo ghake, pa mutu pake penga ndumbu ya nyenyezi chumi ndi ziŵi.

² Ndipo pakuŵa ndi nthumbo, wangubongo wachivwa urwirwi ndi kuŵaŵa kwa kupapa.

³ Ndipo unguwoneka munthondwe so unyake kuchanya; onani nchalinda mukuru, muyera wakuti che, wakuŵa ndi mitu yinkhonde ndi yiŵi ndi sengwi chumi, ndi pa mitu yake vifuku vinkhonde ndi viŵi.

⁴ Ndipo mchiya wake waguzanga chigaŵa chachitatu cha nyenyezi za kuchanya, ndipo unguzipong'a pa charu. Ndipo nchalinda yo wanguma paurongo pa munthukazi, yo wakhumbanga kupapa, alinga kuti wachipapa warghe kana kake.

⁵ Ndipo wangupapa mwana munthurumi, mweniyo wakausanga mitundu yose ndi ndodo ya chisulo: ndipo kana kake ko kangukwamphulikiya kwaku Chiuta, ku chitengu-chaufumu chake,

⁶ munthukazi iyo wanguthaŵiya ku bozwa, kweniko wenga ndi malo ghakurongosoleka ndi Chiuta, kuti wamuhiŵiye kweniko mazuŵa chikwi ndi machumi pe chumi ghaŵi ndi machumi ghankhonde ndi limoza (1,260).

⁷ Ndipo yengako nkhondo kuchanya: Mikaele ndi ŵangelo ŵake ŵangurwana ndi nchalinda yo; ndipo wangurwa nchalinda, ndi ŵangelo ŵake.

⁸ Kweni wangupundika; ndipo kuti ghangusanirika so cha malo ghawo kuchanya.

⁹ Ndipo wangupong'eka pasi nchalinda yo mukuru, njoka yo yamwaka, wakuzumbulika Diabolo ndi Satana, murandizgi wa pasi iyo ndi ŵangelo ŵake pamoza nayo.

¹⁰ Ndipo ndinguvwa mazu ghakuru kuchanya, ghakuti, “Sono waŵapo utaski, ndi nthazi, ndi ufumu waku Chiuta widu, ndimtufu waku Kristu wake: pakuti wapong'eka pasi wakutundula yo wa ŵabali ŵidu, mweniyo watuŵatundula paurongo paku Chiuta widu msana ndi usiku.

¹¹ Kweni iwo ŵamupundiya mu ndopa za Mwana-mberere yo, ndi mu mazu gha ukaboni wawo; pakuti ŵengavi kughanja maumoyo ghawo mpaka ku nyifwa.

¹² Kondwereni pa chifwa chenichi, mwamachanya mwe, ndi mwaŵakuja mwenimo! Kweni owe, charu ndi nyanja; pakuti diabolo yo wasikiya kwaku imwe, wakuŵa ndi kandundu kakuru, pakuziŵa kuti nyengo yake njimanavi!”

¹³ Ndipo penipo nchalinda yo wanguwona kuti wapong'eka pasi ku charu, wangundondoloska munthukazi yo wangupapa mwana munthurumi yo.

¹⁴ Ndipo kungupskika ku munthukazi yo mapapiku ghaŵi gha nombo yikuru, kuti waphururukiye ku bozwa, ku malo ghake, kweniko wakalerekanga kwaka nyengo, ndi zinyengo, ndi nusu ya nyengo, kutuwapo pa njoka yo.

¹⁵ Ndipo njoka yo yingudira ku mlomo wake maji, ulaka ndi msinji, kuvuli ku munthukazi, alinga kuti wamkukurwiske ndi mweza.

¹⁶ Ndipo charu chingumovya munthukazi yo chingubanuwa mlomo wake ndi kumeza msinji wo nchalinda wangudira pa mlomo wake.

¹⁷ Ndipo nchalinda wangukaripa pa munthukazi, ndipo wanguruta kurwana ndi ŵakujapo ŵa mbeu yake, ŵeniwo nawo ŵasungirizga marangu ghaku Chiuta, ndipo ŵe ndi chisimisimi chaku Yesu. Ndipo wanguma pa mchenga wapa nyanja.