Chituwa 6 - Tonga Bible 1986

¹ Kweni Ambuya anguti kwaku Mosese, “Sono ukawonanga chenicho ndikachitanga kwaku Farao pakuti ndi nthazi wakaŵatuzganga, inya ndi nthazi wakaŵadikiskanga mu charu chake.”

² Ndipo Chiuta wanguti kwaku Mosese, “Ndine Ambuya,

³ ndinguwoneka kwaku Abrahamu, kwaku Yisaki, ndi kwaku Yakobe, nge ndi Chiuta Wanthazizose, kweni ndi zina langu la Ambuya ndengavi kujiziŵiska kwaku wo.

⁴ Ndinguchita so phanganu langu ndi iwo, kuŵapaska charu cha Kanani, charu cho ŵangujamo nge mbayinga.

⁵ Ndipo so ndavwa kutamantha kwa ŵana ŵaku Yisraele wo ŵaEgipiti ŵaŵasuzga mu uŵanda, ndipo ndakumbuka phanganu langu.

⁶ Viyo kamba ku ŵaYisraele, ‘Ndine Ambuya, ndipo ndikakutuzganingiko kusi ku mphingu za ŵaEgipiti, ndipo ndikakupozomoskaninga ku uŵanda wawo, ndipo ndikakuwomboninga ndi janja lakutambaruwa ndipo ndi nchitu zikuru za cheruzgu,

⁷ ndipo ndikakuchitaninga kuŵa mtundu wakundamweni, ndipo ndikaŵanga Chiuta winu, ndipo mukaziŵanga kuti ndine Ambuya Chiuta winu, mweniyo wakutuzgani kusi ku mphingu za ŵa Egipiti.

⁸ Ndipo ndikutoliyeninge mu charu cho ndingurapa kuchipaska kwaku imwe kuŵa chihara. Ndine Ambuya.’ ”

⁹ Mosese wangukamba kwakukozgana ku ŵaYisraele, kweni kuti ŵangutegherezga kwaku Mosese cha, chifukwa cha mtima wawo wakusweka ndi uŵanda wawo wakuŵaŵa.

¹⁰ Ndipo Ambuya anguti kwaku Mosese,

¹¹ “Ruta, kasere, ukamunene Farao karonga wa Egipiti wakatuzge ŵaYisraele mu charu chake.”

¹² Kweni Mosese wanguti ku Ambuya, “Awonani, ŵaYisraele kuti ŵatinditegherezga cha, na Farao wanditegherezgenge uli, ine nde munthu wa milomo yambura kuchinjika?”

¹³ Kweni Ambuya angukamba ndi Mosese ndi Aroni, ndi anguŵapaska langulu ku ŵaYisraele ndi kwaku Farao karonga wa Egipiti kuŵatuzga ŵaYisraele mu charu cha Egipiti.

Kapapikidu kaku Mosese ndi Aroni

¹⁴ Yaŵa ndiwo mitu ya nyumba za auskeu; ŵana ŵanthurumi ŵaku Rubene, waumwali yo waku Yisraele, Hanoke, Palu, Hezroni ndi Karimi; izi ndizu mbumba zaku Rubene.

¹⁵ Ŵana ŵanthurumi ŵaku Simeoni: Yemuele, Yamini, Ohada, Yakini, Zohara, ndi Shaulu, ŵana ŵanthurumi ŵa munthukazi mu Kanani, izi ndizu mbumba zaku Simeoni.

¹⁶ Yagha ndighu mazina gha ŵana ŵanthurumi ŵaku Levi kwakulingana ndi migonezi yawo: Gerishoni, Kohata, ndi Merari, Levi wanguŵa ndi virimika machumi pe chumi pachanya machumi ghatatu ndi vinkhonde ndi viŵi (137).

¹⁷ Ŵana ŵanthurumi ŵaku Gerishoni: Libini ndi Shimei mwa mbumba zawo.

¹⁸ Ŵana ŵanthurumi ŵaku Kohata: Amiramu, Yizihara, Hebroni, ndi Uziele, Kohata wanguŵa ndi virimika machumi pe chumi pachanya ghatatu ndi vitatu (133).

¹⁹ Ŵana ŵanthurumi ŵaku Merari: Mahili ndi Mushi. Izi ndi mbumba za ŵaLevi kwakulingana ndi migonezi yawo.

²⁰ Amiramu wanguto kuŵa muwoli Yokebede, mzichi wa awiske ndipo wangumupapiya Aroni ndi Mosese: Amiramu wanguŵa ndi virimika machumi pe chumi pachanya machumi ghatatu ndi Vinkhonde ndi viŵi (137).

²¹ Ŵana ŵanthurumi ŵaku Yizihara: Kora, Nephege, ndi Zichiri.

²² Ndipo ŵana ŵanthurumi ŵaku Uziele: Mishaele, Elizaphana, ndi Zitiri.

²³ Aroni wanguto kuŵa muwoli Elisheba, mwana waku Aminadabu ndi so mzichi waku Nahishoni, ndipo wangumupapiya Nadabu, Abihu, Eliazara, ndi Yitamara.

²⁴ Ŵana ŵanthurumi ŵaku Kora, Asiri, Elekana, ndi Abisafa; izi ndizu mbumba za ŵina Kora.

²⁵ Eleazara mwana munthurumi waku Aroni wangujitore muwoli yumoza wa ŵana ŵanthukazi ŵaku Putiele, ndipo wangumupapiya Finehasi; yaŵa ndiwo mitu ya nyumba za auskeu za ŵaLevi mwa mbumba zawo.

²⁶ Yaŵa ndiwo Aroni ndi Mosese kwaku wo Ambuya anguti: “Tuzgani mtundu waku Yisraele mu charu cha Egipiti mu maŵanja ghawo.”

²⁷ Ŵenga iwo ŵeniwo ŵangukamba kwaku Farao karonga wa Egipiti makani ghakutuzga mtundu wa ŵaYisraele ku Egipiti, Mosese mwenuyu ndi Aroni mwenuyu.

²⁸ Pa zuŵa lenilo Ambuya angukamba ndi Mosese mu charu cha Egipiti.

²⁹ Ambuya anguti kwaku Mosese, “Ndine Ambuya: umunene Farao karonga wa Egipiti vyose vyenivyo ndikamba nawe.”

³⁰ Kweni Mosese wanguti ku Ambuya, “Awonani, nde wa milomo yambura kuchinjika, na wamkunditegherezga uli Farao?”