Chituwa 40 - Tonga Bible 1986

Mosese wasoska hema lo

¹ Ambuya anguti kwaku Mosese,

² “Pa zuŵa lakudanga la mwezi wakudanga mukazenganga hema lakupaturika, hema lakuwunganamo.

³ Ndipo mukaŵikangamo bokosi la ukaboni, ndipo mukachinganga bokosi ndi chivwinkhu.

⁴ Ndipo mukaserezgangamo gome, ndi kuyalika umampha; ndipo mukaserezganga chakuŵikapo nyali, ndi kuŵikapo nyali zake.

⁵ Ndipo mukaŵikanga jochero la sembe za vyachema cha golide, paurongo pa bokosi la ukoboni, ndi kumika chakuchinga cha khomo la hema lakupaturika.

⁶ Mukamikanga jochero la sembe yakocha paurongo pa khomo la hema lakupaturika, hema lakuwunganamo,

⁷ ndi muŵike chakusambiyamo pakati pa hema lakuwunganamo ndi jochero la sembe, ndi muŵikemo maji.

⁸ Ndipo mukamikanga bwalo kwakuzunguliya kose, ndi kupayika chakuvwinkha cha likomo la bwalo lo.

⁹ Sono mukatonga mafuta ghakupaka ndi hema lakupaturika ndi vyose vyamukati mwake, ndi kuripatuwa ndi vyakujarika mukati, ndipo likaŵanga lakupaturika.

¹⁰ Mukapakanga so guŵa la sembe yakocha ndi viyaŵi vyake, ndi kupatuwa chiguŵa cha sembe, ndipo jochero la sembe liŵenge lakupaturika kwakuruska.

¹¹ Mukapakanga so chakusambiyamo ndi chiŵanja chake, ndi kuchipatuwa.

¹² Sono mukazanga ndi Aroni ndi ŵana ŵake ŵanthurumi ku khomo la hema lakuwunganamo, ndipo muŵasambikenge ndi maji,

¹³ ndi mukavwarikanga Aroni vivwalo vyakupaturika ndipo mukamupakanga ndi kumupatuwa, alinga kuti wanditeŵete nge ndi mzukuru.

¹⁴ Mukazanga so ndi ŵana ŵake ŵanthurumi ndi muŵavwarikenge maraya,

¹⁵ ndi kuŵapaka uli ndimo mungupakiya wiskeu, alinga kuti ŵanditataliyenge nge mbazukuru: ndipo kupakika kwawo kukaŵarondiyanga ku uzukuru wambura kumara mu migonezi yawo yose.”

¹⁶ Viyo ndimo wanguchitiya Mosese, kwakulingana ndi vyose vyo Ambuya angumulanguliya, viyo ndimo wanguchitiya.

¹⁷ Ndipo mu mwezi wakudanga wa chirimika cha chiŵi, pa zuŵa lakudanga la mwezi, hema lakupaturika linguzengeka.

¹⁸ Mosese wanguzenga hema lakupaturika, wanguchita viŵanja vyake, ndi wangumika vikhozgeru vyake, ndi wangujinthamo vyakupingiya vyake ndi wangutumphuska mizati yake;

¹⁹ ndi wangutandazgiyapo chihema pachanya pa hema lakupaturika, ndipo wanguŵikapo chakuvungiya cha chihema pachanya pake, uli ndimo Ambuya angulanguliya Mosese.

²⁰ Ndipo wanguto mya ya ukaboni ndi kuyiŵika mu bokosi, ndi wanguŵikapo vyakupingiya bokosi ndi wangumika chitengo cha lisungu pachanya pa bokosi;

²¹ ndipo wanguza ndi bokosi mu hema lakupaturika, ndi wangumika chivwinkhu cha chakuchinga, ndi wanguchingako ku bokosi laukaboni; uli ndimo Ambuya angulanguliya Mosese.

²² Ndipo wanguŵika gome mu hema lakuwunganamo, kudera la ku nkhonde la hema lakupaturika, kubwalo ku chivwinkhu,

²³ ndipo wanguŵikapo chiŵandi paku lo mwakwene paurongo pa Ambuya; uli ndimo Ambuya angulanguliya Mosese.

²⁴ Ndipo wanguŵika chakuŵikapo nyali mu hema lakuwunganamo kulereskana ndi gome kuchiri ku mwera kwa hema lakupaturika,

²⁵ ndi wanguŵika nyali paurongo pa Ambuya; uli ndimo Ambuya angulanguliya Mosese.

²⁶ Ndipo wanguŵika jochero la sembe la golide mu hema lakuwunganamo paurongo pa chivwinkhu,

²⁷ ndi wangochiyapo sembe yakununkhira, uli ndimo Ambuya angulanguliya Mosese.

²⁸ Ndipo wanguŵika mu malo ghake chakuchinga cha khomo la hema lakupaturika.

²⁹ Ndipo wanguŵika jochero la sembe yakocha pa khomo la hema lakupaturika lamu hema lakuwunganamo ndi wangusaska pakulo sembe yakocha ndi sembe ya ufwa; uli ndimo Ambuya angulanguliya Mosese.

³⁰ Ndipo wangumika chakusambiyamo pakati pa hema lakuwunganamo ndi jochero la sembe ndi wanguŵikamo maji ghakusamba mwaku cho,

³¹ mwaku gho Mosese ndi Aroni ndi ŵana ŵake ŵanthurumi ŵangusamba manja ghawo ndi marundi ghawo;

³² ŵangusamba penipo ŵaserenga mu hema lakuwunganamo, ndi penipo ŵazanga ku jochero la sembe, uli ndimo Ambuya angulanguliya Mosese.

³³ Ndipo wanguzenga bwalo kwakuzunguliya hema lakupaturika ndi jochero la sembe, ndi wangumika chakuchinga cha likomo la bwalo lo. Viyo Mosese wangumarizga nchitu yo.

Mtambo pachanya pa chihema chakuwunganamo

³⁴ Sono mtambo unguvimba pa hema lakuwunganamo ndi unkhankhu wa Ambuya unguzaza hema lakupaturika.

³⁵ Ndipo Mosese wangutondeka kusere mu hema lakuwunganamo, chifukwa mtambo wajanga paku lo ndi unkhankhu wa Ambuya unguzaza hema lakupaturika.

³⁶ Mu maulendo ghawo ghose, penipo mtambo ungutoreke kuchanya kutuwa pa hema lakupaturika, ŵaYisraele ŵangwenda kuya kunthazi;

³⁷ kweni asani mtambo wengavi kutoleke kuchanya, po kuti ŵangwenda kuya kunthazi cha mpaka zuŵa lenilo ungutoreke kuchanya.

³⁸ Pakuti mu maulendo ghawo ghose mtambo wa Ambuya wenga pachanya pa hema lakupaturika ndi msana, ndi moto wenga mwaku lo ndi usiku, mu maso gha ŵaYisraele wose.