Chituwa 31 - Tonga Bible 1986

Ŵakuchita nchitu iyi

¹ Ambuya anguti kwaku Mosese,

² “Awona, ndadana zina laku Bezalele mwana munthurumi waku Uru, mwana munthurumi waku Huru, wa mtundu waku Yuda;

³ ndipo ndamuzaza ndi Mzimu waku Chiuta, ndi mziŵiru ndi chinjeru, ndi kuziŵa ndi umisiri,

⁴ kuziŵiska Wamisiri machitidu, kuchita mu golide, siliva ndi mkuŵa,

⁵ pakusema mya ndi kuyimika, ndi mukusema miti, ya mlombwa mu vyakuchita vyose.

⁶ Ndipo awona, ndamika pamoza nayo Oholiaba mwana munthurumi waku Ahisamaka, wa mtundu waku Dani, ndipo ndapaska mziŵiru ku ŵanthu wakwenere, alinga kuti wachite vyose vyenivyo ndakulanguliya:

⁷ Hema lakuwunganamo, ndi bokosi la phanganu, ndi chitengo cha lisungu cho che pachanya pake, ndi vyamu hema,

⁸ gome ndi viyaŵi vyake ndi chakumikapo nyali chakutowa ndi viyaŵi vyake,

⁹ ndi jochero la mpasku wakocha ndi viyaŵi vyake vyose, ndi chakusambiyamo ndi pasi pake,

¹⁰ vivwalo vyakuchitika kwa manyanda, vivwalo vyakupaturika vyaku Aroni mzukuru yo ndi vivwalo vya ŵana ŵake ŵanthurumi penipo ŵateŵeta nge mbazukuru,

¹¹ ndi mafuta ghakupaka ndi vyakununkhira vya chema vya malo ghakupaturika. Wakachitanga kwakuyana ndi vyose vyo ndakulanguliya.”

¹² Ndipo Ambuya anguti kwaku Mosese,

¹³ “Ukambe ku ŵaYisraele, ‘Mukasunganga masabata ghangu, pakuti ichi nchisimikizgu pakati pangu ndi imwe, mu migonezi yinu yose, alinga kuti muziŵe kuti ine, Mbuya nditumupatuwani.

¹⁴ Mukasunganga sabata, chifukwa ndakulanguliyani kuti ndakupaturika, we yose wakulikazuzga wakabayikanga; we yose wakuchita mlimu mwaku lo, wakadumulikangako ku ŵanthu ŵake.

¹⁵ Milimu yikachitikanga mu mazuŵa ghankhonde ndi limoza, kweni zuŵa la chinkhonde ndi chiŵi ndi sabata la chipumulo pe, lakupaturika ku Ambuya; we yose wakuchita mlimu we wose pa zuŵa la sabata wakabayikanga.

¹⁶ Viyo ŵaYisraele ŵakasunganga zuŵa la sabata, kuliphwere sabata mu migonezi yawo yose, nge nchipanganu cha muyaya.

¹⁷ Nchisimikizgu cha muyaya pakati pangu ndi ŵaYisraele kuti mu mazuŵa ghankhonde ndi limoza Ambuya angulenga kuchanya ndi charu chapasi ndipo pa zuŵa la chinkhonde ndi chiŵi angupumuwa, ndi anguyuyuka.’ ”

¹⁸ Ndipo angupaska kwaku Mosese, ŵati ŵamala kukamba nayo pa phiri la Sinai, magome ghaŵi gha mapanganu, magome gha mwa, gha kulembeka ndi munwi waku Chiuta.