Chituwa 22 - Tonga Bible 1986

¹ “Asani munthu waba ng'ombe pamwenga mberere ndipo wayibaya ndi kuyiguliska, wakalipanga ng'ombe zinkhonde pa ng'ombe yimoza ndi mberere zinayi pa mberere yimoza. Wakalipiyangapo; asani walivi kanthu, wakajiguliskanga mweneko pa unkungu wake.

² Asani nyama yakubika yasanirika yamoyo we nayo ndiyo, manyi ndi ng'ombe, pamwenga mbunda, pamwenga mberere wakalipanga ziŵi.

³ “Asani munkhungu wasanirika wachiswa nyumba kuti wasere ndipo wakosoreka ndi kufwa, paulengevi kalema ka ndopa chifukwa chaku iyo,

⁴ kweni asani lumwi latuliyako paku iyo, pakaŵanga kalema ka ndopa chifukwa chaku iyo.

⁵ “Asani munthu wachita uliska mu munda pamwenga munda wa mphereska, pamwenga wataya chiŵetu chake ndipo chitachirgha mu munda wa munthu munyake, wakalipanga vyamampha ukongwa vyamu munda wake ndi mu munda wa mphereska wa mweneko.

⁶ “Asani kwe lufya ndipo litachiko ku minga viyo kuti vyakurgha vyapa ndundu pamwenga vyakuma wima, pamwenga munda wafya, mweniyo wangukozga moto walipiyengepo vyose kwakufikapo.

⁷ “Asani wapaska munyake ndrama pamwenga vyuma kumusungiya ndipo vyabika mu nyumba yaku yawa munthu, sono asani munkhungu wasanirika wakalipiyangapo vya kaŵi.

⁸ Asani munkhungu walivi kusanirika, mweneko wa nyumba wakazanga kufupi kwaku Chiuta kuzachirongo kuti vinu pamwenga walivi kukopu janja pa vinthu vya munyake.

⁹ “Pa kulakwa kose kwambura magomezgeka, manyi nkhwa ng'ombe nkhwa mbunda, nkhwa mberere, nkhwa vyakuvwara, pamwenga nkhwa kanthu ke kose kakusoŵa, ko yumoza watiti, ‘Ndi aka,’ mrandu waku wose ŵaŵi ukazanga paurongo paku Chiuta: mweniyo Chiuta wakasuskanga wakalipanga vya kaŵi ku munyake.

¹⁰ “Asani munthu wapereka ku munyake mbunda pamwenga ng'ombe pamwenga mberere pamwenga nyama ye yose kumusungiya ndipo yitufwa pamwenga yapwetekeka pamwenga yakhwemeke kunyake kwambura kuyiwona nanga njumoza,

¹¹ rapu lapa Ambuya likaŵanga pakati paku wose ŵaŵi wo kuti kuwoneke vinu walivi kuŵikapo janja lake pa vinthu vya munyake; ndipo mweneko wakazomerezganga rapu lo; ndipo kuti wakalipanga cha.

¹² Kweni asani vyabika kwaku iyo wakalipanga ku mweneko.

¹³ Asani vyaparulika ndi vikoko, watenere kuza ndi ukaboni, kuti wakalipanga cha paku cho chaparulika.

¹⁴ “Asani wabwereka ke kose ka munyake, ndipo kapwetekeka pamwenga kafwa, ndipo kuti ke ndi mweneko cha, wakalipanga kwakufikapo.

¹⁵ Asani mweneko wenga nako, kuti wakalipanga cha; asani kangubwerekeka, kanguziya mphoto yake.

Marangu ghakupambana gha mukati mu ŵanthu

¹⁶ “Asani munthurumi wanyenga mwali wambura kuŵa ndi bwezi la nthengwa, ndipo wara nayo, wakaperekanga chilowola paku iyo, ndi wakamutonga nthengwa.

¹⁷ Asani awiske ŵakaniska kumupaska mwali yo, wakalipanga ndrama zachilowola mwenimo ŵalowole ŵamwali.

¹⁸ “Mungazomerezganga chanusi kuŵa wamoyo cha.

¹⁹ “We yose wakura ndi nyama wakabayikanga.

²⁰ “We yose wakupereka chisopo kwaku chiuta we yose, kwambura nge nkhu Ambuya, wakaphwanyikanga kwambura kujako.

²¹ “Munganangiyanga mlendo pamwenga kumuyuzga, pakuti imwe mwenga ŵalendo mu charu cha Egipiti.

²² Mungayuzganga choko che chose cha, pamwenga wamasiya.

²³ Asani mukaŵayuzganga ndipo ŵatindiliriya ine, kwakuneneska ndikavwanga nkhuta yawo;

²⁴ ndipo ukari wangu ukakolenga, ndipo ndikakubayaninga ndi lipanga, ndipo ŵawoli ŵinu ŵakajanga vyoko ndi ŵana ŵambura auskeu.

²⁵ “Asani mukongoleska ndrama kwaku we yose wa ŵanthu ŵangu yo mwe nayo mweniyo ndi musauchi, mungaŵanga kwaku iyo nge ngwakuteuliska cha, ndipo mungarondagako chipambi.

²⁶ Asani uto chirundu cha munyako ngendi ndindira umuwezgiyenge chirundu cho lumwi lenga lindasere;

²⁷ pakuti nchenicho pe chakuvwinkha chake, nchivwalo cha liŵavu lake na wakavwinkhanganji wachigona? Ndipo asani wakaliriyanga kwaku ine, ndikavwanga, pakuti nde wachitima.

²⁸ “Ungatukanga Chiuta cha, chingana nkhutemba mweruzgi wa ŵanthu ŵako.

²⁹ “Ungaswereskanga kupereka vya uzari wa vuna wako ndi ku vyakukumphiya vya kufinya kwa mphereska zako. “Waumwali wa ŵana ŵako ŵanthurumi ukapaskanga ine.

³⁰ Ng'ombe zako nazo ukachitanga kwakukozganga ndi mberere nazo viyo pe; mazuŵa ghankhonde ndi ghaŵi yikaŵanga ndi nyina; pa zuŵa la chinkhonde ndi chitatu ukayipaskanga kwaku ine.

³¹ “Mukaŵanga ŵanthu ŵakupaturikiya ine; chifukwa cho kuti mukarghanga nyama yakuparurika ndi chikoko cha mu dondo cha, muyitayiyenge ŵagaru.