Chituwa 21 - Tonga Bible 1986

Dangu lapa muŵanda

¹ “Sono ivi ndi vyeruzgu vyo ukaŵikanga paurongo pawo.

² Asani mugula muŵanda wachiHebere, wakatatanga kwa virimika vinkhonde ndi chimoza ndipo pa chachinkhonde ndi chiŵi wakarutanga mu wanangwa, kwambura kurondapo kanthu.

³ Asani pakuza wenga yija, wakarutanga yija; asani wanguza wakuto, iku muwoli wake wakarutanga nayo.

⁴ Asani mbuyake wakampaskanga munthukazi kuto ndipo wamubaliya ŵana ŵanthurumi pamwenga ŵanthukazi muwoli ndi ŵana ŵakaŵanga ŵambuyake ndipo iyo wakarutanga yija.

⁵ Kweni asani muŵanda wakakabanga pakweru, ‘Nditanja mbuya wangu, ndi ŵana ŵangu; kuti ndikarutanga mu wanangwa cha,’

⁶ sono po mbuyaki wakayanga nayo kwaka Chiuta, ndipo wakazanga nayo ku khomo pamwanga nchindamiru ya pa khomo; ndipo mbuyake wakatoronga makutu ghake ndi zingani; ndipo wakamutataliyanga mpaka nyifwa.

⁷ “Asani munthu wakaguliskanga mwana wake munthukazi kuŵa muŵanda kuti wakarutanga nge ndimo ŵachitiya ŵaŵanda ŵanthurumi cha.

⁸ Asani kuti wakondwereska mbuyake cha yo wamukhumbiya kumuto, iku wakamuzomerezganga kuwomboreka; wakaŵangavi mazaza ghakumuguliskiya ku ŵanthu ŵalendo, pakuwona kuti wachita nayo kuura magomekezgeka.

⁹ Asani wangumukhumbiya nayo mwana wake munthurumi ipu wakamuchitiyanga uli ndi mwana wake munthukazi.

¹⁰ Asani watijitore munthukazi munyake, kuti wapunguwengepo unandi wa chakurgha chake cha, vyakuvwara vyake cha, pamwenga mazaza ghake gha nthengwa cha.

¹¹ Ndipo asani warekenge kumuchitiya vinthu ivi vitatu wakarutanga waka kwambura kulipapo ndrama.

¹² “We yose wakupuma munthu, ndipo watufwa, wakabayikanga.

¹³ Kweni asani kuti wangumukhazga cha, kweni Chiuta ndiyo wamupong'a mu janja lake, po ndipo ndikakutemiyaninga malo kweniko wangathaŵiya.

¹⁴ Kweni asani munthu wakoso munyake yo wamufinganga kale kuti wamubaye, mukamutuzgangako ku chiguŵa changu cha sembe, kuti wafwe.

¹⁵ “We yose wakukoso awiske pamwenga anyina, wabayikenge.

¹⁶ “We yose wakuba munthu, manyi watimuguliska pamwenga wasanirika ndi iyo, wabayikenge.

¹⁷ “We yose wakutemba awiske pamwenga anyina, wabayikenge.

¹⁸ “Asani ŵanthu ŵahohotana, ndipo munyake wakoso munyake ndi mwa pamwenga ndi nkhonyu yake, ndi munthu yo kuti wafwa cha kweni watama pa chita,

¹⁹ ndipo asani yuwa munthu wayuka so ndi watendayenda ndi ndodo yake, yuwa wangumupuma waŵengevi kafukwa; kweni wakalipanga pakumutayiska nyengo pe, ndipo wakamuchizganga kwakufikapo.

²⁰ “Asani munthu wakoso muŵanda wake munthurumi pamwenga munthukazi, ndi ndodo, ndipo muŵanda yo watufwa penipo wakarangikanga.

²¹ Kweni asani muŵanda watuŵa wamoyo zuŵa limoza pamwenga ghaŵi, kuti wakarangikanga cha, pakuti muŵanda yo ndi ndrama zake.

²² “Asani ŵanthu ŵakorana ndi kulimbana ndipo ŵapweteka munthukazi wanthumbu viyo kuti wawere vuli, kweni paulavi so unonono unyake, yuwa wangumupweteka wakalipiskikanga, kwakulingana ndimo murumi waku yuwa munthukazi wakaŵangiyanga kwaku iyo: ndipo wakalipanga nge ndimo ŵeruzgi ŵangalanguliya.

²³ Asani patuzachiŵa unonono sono mukalangulanga kuti umoyo ku umoyo,

²⁴ jiso ku jiso, jinu ku jinu, janja ku janja, rundi ku rundi,

²⁵ kocha ku kocha, bala ku bala, chikukusa ku chikukusa.

²⁶ “Penipo munthu wapuma jiso la muŵanda wake munthurumi pamwenga munthukazi, ndi watilitoro, wakafwatuwanga muŵanda yo kuti waŵe mwanangwa chifukwa cha jiso.

²⁷ Asani wagontho jinu la muŵanda wake, munthurumi pamwenga munthukazi, wakamufwatuwanga muŵanda yo kuti waŵe mwanangwa chifukwa cha jinu.

²⁸ “Asani ng'ombe yagwaza munthurumi ndi sengwe, pamwenga munthukazi, ku mubaya, ng'ombe yipong'eke mya, ndipo nyama yake kurgha cha, kweni mweneko wa ng'ombe wakaulangavi kalema.

²⁹ Kweni asani ng'ombe yo yinguziŵiriya kale kugwaza ndi masengwe; ndipo mweneko waku yo wanguchenjezgeka kweni kuti wayimanga cha, ndipo yibaya munthurumi pamwenga muthukazi, ng'ombe yikadinikanga ndi mya ndipo mweneko waku yo wabayikenge.

³⁰ Asani walangulikiyenge chiwombo, po ndipo wakaperekanga pa chiwombo cha umoyo wake chose cho chalangulika paku iyo.

³¹ Asani yitachigwaza mwana munthurumi pamwenga munthukazi wa munthu, mweneko wakachitikiyanga kwakukozgana ndi langulu lenili.

³² Asani ng'ombe yangwaza muŵanda munthurumi pamwenga munthukazi, mweneko waku yo wakalipanga ku mbuya wawo ndrama machumi ghatatu (30) za siliva, ndipo ng'ombe yidinikenge ndi mya.

³³ “Asani wasiya mbuna ya mwazi, pamwenga asani munthu wakumba mbuna ndipo kuti wavunikapo cha, ndipo ng'ombe pamwenga mbunda yituwa mwenimo,

³⁴ mweneko wa mbuna yo wakalipanga, wakapaskanga ndrama ku mweneko waku yo, ndipo nyama yakufwa yikaŵanga yake.

³⁵ “Asani ng'ombe ya munthu yapweteka ya munyake, ndi kufwa yafwa, sono wakaguliskanga ng'ombe yo njamoyo ndipo ŵakagaŵananga mtengo wake, ndipo nyama yakufwa nayo ŵakagaŵananga.

³⁶ Pamwenga asani kwaziŵikwa kuti ng'ombe yinguziŵiriya kugwaza kale ndipo mweneko waku yo wengavi kuyimanga, wakalipanga ng'ombe pa ng'ombe ndipo nyama yakufwa yikaŵanga yake.