Chituwa 15 - Tonga Bible 1986

Sumu yakukankhuskiya Ambuya

¹ Sono Mosese ndi ŵaYisraele ŵangumba sumu iyi ku Ambuya, ŵanguti, “Ndikambanga ku Ambuya, pakuti apunda kwakutumbwa; ŵakavalo ndiŵakukwerapo ŵake apong'a mu nyanja.

² Ambuya ndi nthazi yangu ndi sumu yangu, ndipo aŵa iwo utaski wangu: mweniyo ndi Chiuta wangu, ndipo ndikamurumbanga, Chiuta wa ada, ndipo ndikamukuzganga.

³ Ambuya ndi munthu wa nkhondo; Ambuya ndilo zina lawo.

⁴ “Magareta ghaku Farao ndi liŵanja lake la nkhondo ataya mu nyanja; ndipo ŵara ŵake ŵankhondo ŵakusankhika, ŵabira mu Nyanja Yiyera.

⁵ Mweza utiŵavimba; ŵangusere pasi pa ndimba uli ndi mwa.

⁶ Janja linu lakurghiya, Ambuya mwe, lakutumbwa mu nthazi, janja linu lakurghiya liphwanya ŵamawongo, Ambuya mwe.

⁷ Mu ukuru wakutumbwa kwinu kwa ukaronga muphwanya ŵakupindikana ŵinu, mutuma ukari winu, utuŵargha uli ndi mbuwa.

⁸ Ndi mvuchi wa mphunu zinu, maji ghanguwunjikika, ndipo mweza wa maji unguma ndundo; ndimba zingukhoma mukati mwa nyanja.

⁹ Wamawongo wanguti, ‘Ndikandondoloskanga, ndikaŵakonga, ndikagaŵanga vyakuskowa, khumbo langu likagutiskikanga ndi vyenivi, ndikawewepuwanga lipanga langu, janja langu likaŵamaranga.’

¹⁰ Munguphuta ndi mphepo yinu, nyanja yinguŵavimba; ŵangudodome pasi uli ndi ndolo mu maji ghanthazi.

¹¹ “Njani yo we nge ndimwe, Ambuya mwe, mukati mu ŵachiuta? Njani yo we nge ndimwe, wakutumphulika mu utuŵa, wakofya pakuchita unkhankhu, wakuchita vyakuziziswa?

¹² Mungutambaruwa janja linu lakurghiya, ndipo charu chinguŵameza.

¹³ “Mwarongozga ŵanthu ŵinu mu chifundu chinu; ŵanthu ŵeniwo imwe mwawombo, mwaŵarongozga ndi nthazi yinu kuya ku chakujamo chinu chakupaturika.

¹⁴ Makhamu gha ŵanthu ghavwa, ngakutenthema; urwirwi waŵako ŵakuja mu Filistia.

¹⁵ Sono mafumu ghamu Edomu ghadika nthazi: ŵarongozgi ŵa Moabu kwaŵako kunjenjeme, wose ŵakuja mu Kanani ŵasongonoka.

¹⁶ Chofyu ndi chitenthe vyaŵa paku wo; chifukwa cha ukuru wa janja linu, ŵachetama ulaka ndi mwa, mpaka penipo ŵanthu ŵaporotamo Ambuya, mpaka ŵanthu ŵinu ŵaporota wo mwagula.

¹⁷ Imwe mukaŵaserezganga ndi kuŵapanda pa phiri laku mwaŵeni malo gho mwaghachita kuŵa chakujamo chinu, Ambuya mwe, malo ghakupaturika gho manja ghinu ghajarika, Ambuya mwe.

¹⁸ Ambuya akausanga muyaya ndi muyaya.”

¹⁹ Pakuti penipo ŵakavalo ŵaku Farao ndi magareta ghake, ndi ŵakukwera pa ŵakavalo ŵake ŵangusere mu nyanja, Ambuya anguwezge maji gha nyanja paku wo; kweni ŵaYisraele ŵangwenda pa mtunda uyumu mukati mu nyanja.

²⁰ Sono Miriamu mchimi muthukazi mzichi waku Aroni wangutole kang'oma mu janja lake, ndipo ŵanthukazi wose wanguruta pavuli pake ndi tung'oma, ndi kuvina.

²¹ Ndipo Miriamu wanguŵambiya: “Mbaninga ku Ambuya chifukwa apunda ndikutumbwa; kavalo ndi wakukwerapo wake apong'a mu nyanja.”

Maji ghaku Mara

²² Sono Mosese wangurongozga ŵaYisraele kutuwa ku Nyanja Yiyera, ndipo ŵanguruta mu bozwa la Shuru ŵangwenda mazuŵa ghatatu, ndipo kuti ŵangusaniya maji cha.

²³ Ŵanguti ŵaza ku Mara kuti ŵanguziŵa kumwa maji ghapa Mara cha chifukwa ghenga ghakuŵaŵa: chifukwa chenichi zina lake lingudanika Mara.

²⁴ Ndipo ŵanthu ŵangudinginikiya Mosese, ŵanguti, “Tikamwanganji?”

²⁵ Ndipo wanguliriya ku Ambuya, ndipo Ambuya angumurongo muti, ndi wanguupong'a mu maji, ndipo maji ghangusanduka ghakunowa. Penipo Ambuya anguŵachitiya chakukombo ndi dangu ndipo penipo anguŵesa,

²⁶ anguti, “Asani nyengo zose mukavwiyanga mazu gha Ambuya Chiuta winu, ndi kuchita cho nchakurunjika pa maso pake, ndi kuphwere malangulu ghake ndi kusunga vyakukombo vyake vyose kuti ndiŵikengepo nthenda nanga njimoza pinu cha, zenizo ndikuŵika paŵa Egipiti, pakuti ndine Ambuya, ŵakukuchizga.”

²⁷ Sono ŵanguza ku Elimi, penipo penga visima vya maji ghakubwibwituka chumi ndi viŵi (12) ndi miti ya kanchindu machumi ghankhonde ndi ghaŵi (70) ndi ŵangugoŵa penipa pafupi ndi maji.