Chituwa 14 - Tonga Bible 1986

Farao warondo ŵaYisraele

¹ Sono Ambuya anguti kwaku Mosese,

² “Ŵanene ŵaYisraele kuwere vuli ndi kwachigoŵa ku maso Pihahiroto, pakati pa Migidolo ndi nyanja ku maso kwa Balizefoni; mwamugoŵa kuthuŵezgana nagho, pafupi pa nyanja.

³ Pakuti Farao wakakambanga kuti ŵaYisraele ‘Ŵawira mu charu; bozwa laŵajariya mukati.’

⁴ Ndipo ndikanonopaskanga mtima waku Farao ndipo wakaŵandondoloskanga, ndipo ine ndirondenge unkhankhu paku Farao ndi liŵanja lake lose; ndipo ŵaEgipiti ŵakaziŵanga kuti Ndine Ambuya.” Ndipo ŵanguchitade viyo.

⁵ Penipo wangumunene karonga wa Egipiti kuti ŵanthu ŵa ŵathaŵa, maghanaghano ghake ndi gha ŵaŵanda ŵake ghangusintha pa ŵanthu ŵa; ndipo wanguti, “Nchine chenicho tachita, po tazomerezga ŵaYisraele kuruta ndi kureka kutiteŵete?”

⁶ Viyo wangurongoso gareta lake ndi wanguruta ndi ŵankhondo ŵake pamoza nayo,

⁷ ndipo wanguto magareta ghake ghakusankhika machimi pe chumi ghankhonde ndi limoza (600) ndi magareta ghose ghanyake gha Egipiti ndi ŵara ŵankhondo ŵakutufuliya wo.

⁸ Ndipo Ambuya angunonopeska mtima waku Farao karonga wa Egipiti ndipo wangundondoloska ŵaYisraele ŵachiruta ndi kugiya.

⁹ ŴaEgipiti ŵanguŵandondoloska, ŵakavalo wose ndi magareta ghose ghaku Farao ŵankhondo ŵapa ŵakavalo ndi liŵanja lake la nkhondo ndipo wanguŵasaniya ŵakugoŵa pa nyanja, pa Pihahiroto ku maso kwa Balizefoni.

¹⁰ Penipo Farao wangundere pafupi, ŵaYisraele ŵanguyinuska maso ghawo, ndipo ŵanguwona ŵaEgipiti ŵazanga kurondo iwo; ndipo ŵangutenthema ukongwa. Ndipo ŵaYisraele ŵanguliriya ku Ambuya;

¹¹ ndipo ŵanguti kwaku Mosese, “Kumbi nchifukwa chakuti mulivi miunda mu Egipiti, po watituzgamo kuzachifwiya mu bozwa? Nchine cho wachita kwaku ifwe, pakutituzga mu Egipiti?

¹² Ichi si ndichu tingukamba kwaku iwe mu Egipiti? ‘Utireke, titataliyenge ŵaEgipiti,’ pakuti kutataliya ŵaEgipiti nkhwamampha kwakuruska kufwiya mu bozwa.”

¹³ Ndipo Mosese wanguti ku ŵanthu, “Rekani kopa, mani gwa, ndipo muwonenge utaski wa Ambuya weniwo akamuchitiyaninga msana wale; pakuti ŵaEgipiti wa muwona msana wale kuti, mukaŵawonango so cha.

¹⁴ Ambuya akakurwiyaninga, ndipo imwe muje ŵaka chisisi.”

ŴaYisraele ŵalowoka pa yumu

¹⁵ Ambuya anguti kwaku Mosese, “Chifukwa chine uliriya kwaku ine? Wanene ŵaYisraele kuti ŵarutiriyenge.

¹⁶ Soska ndodo yako ndi utambaruliye janja lako kurazga ku nyanja ndi uyigaŵe pakati alinga kuti ŵaYisraele ŵarutenge pa mtunda uyumu kuporota mu nyanja.

¹⁷ Ndipo ndikanonopeskanga mitima ya ŵaEgipiti kuti ŵaseremo kuŵandondoloska, ndipo ine ndirondenge unkhankhu paku Farao ndi liŵanja lake lose, magareta ghake, ndi ŵankhondo ŵapa ŵakavalo ŵake.

¹⁸ Ndipo ŵaEgipiti ŵakaziŵanga kuti ndine Ambuya, nditakuti ndaronda unkhankhu paku Farao magareta ghake, ndi ŵankhondo ŵapa ŵakavalo ŵake.”

¹⁹ Sono mungelo waku Chiuta yo wendanga paurongo pa liŵanja la ŵaYisraele wangundere ndi wanguja kuvuli kwawo; ndipo chiguŵa cha mtambo chingutuwako kuurongo kwawo ndi chinguma kuvuli kwawo.

²⁰ Kuza pakati pa liŵanja la ŵaEgipiti ndi liŵanja la ŵaYisraele. Ndipo penga mtambo ndi mdima; ndipo usiku ungukapo wambura liŵanja limoza kuŵandika pafupi pa linyake usiku wose.

²¹ Sono Mosese wangutambaruliya janja lake pa nyanja; ndipo Ambuya angudikiskiya vuli nyanja ndi mphepo ya nthazi yaku vuma usiku wose, ndipo nyanja anguyisanduska mtunda uyumu ndipo maji ghangugawukana.

²² Ndipo ŵaYisraele ŵangusere mukati mu nyanja pa mtunda uyumu, maji ghanguŵa chimati kwaku wo ku marghe ghawo ndi ku maze ghawo.

²³ ŴaEgipiti ŵangundondoloska ndi ŵanguweremo pavuli pawo mukati mu nyanja, ŵakavalo wose ŵaku Farao magareta ghake, ndi ŵankhondo ŵapa ŵakavalo ŵake.

²⁴ Ndipo kumatandakucha Ambuya mu mzati wa moto ndi mu mtambo ŵangulereska pasi pa liŵanja la ŵaEgipiti, ndi kofya liŵanja la ŵaEgipiti.

²⁵ Kuphatizga kukoroŵeka mawilo gha magareta viyo kuti ŵaghaguguzanga ndi unonono ukuru; ndipo ŵaEgipiti ŵanguti, “Tiyeni tithaŵe ku ŵaYisraele pakuti Ambuya atuŵarwiya paku ifwe.”

ŴaEgipiti ŵabira mu Nyanja Yiyera

²⁶ Sono Ambuya anguti kwaku Mosese, “Tambaluriya janja lako pa nyanja kuti maji ghawere vuli pa ŵaEgipiti, pa magareta ghawo, ndi pa ŵankhondo ŵapa ŵakavalo ŵawo.”

²⁷ Viyo Mosese wangutambaluriya janja lake pa nyanja, ndipo nyanja yo yinguwere mu malo ghake wati wawoneka mlenji; ndipo ŵaEgipiti ŵanguthaŵiya mwenimo, ndipo Ambuya angupunda ŵaEgipiti mukati mu nyanja.

²⁸ Maji ghanguwe ndi ghangukuka magareta gho ndi ŵankhondo ŵapa ŵakavalo ndi liŵanja la nkhondo lose laku Farao lo linguŵarondo mu nyanja, kuti kungujapo nanga njumoza waku wo cha.

²⁹ Kweni ŵaYisraele ŵangwenda pa mtunda uyumu mukati mu nyanja, maji ghenga chimati kwaku wo, ku janja lawo la marghe ndi ku maze kwawo.

³⁰ Viyo ndimu Ambuya angutaskiya ŵaYisraele zuŵa liya ku janja la ŵaEgipiti; ndi Yisraele wanguwona ŵaEgipiti ŵakufwa pa likumba la nyanja.

³¹ Ndipo ŵaYisraele ŵanguwona nchitu yikuru yo Ambuya anguchita pa ŵaEgipiti, ndipo ŵanthu ŵangopa Ambuya ndipo ŵanguvwana mu Ambuya ndi mu muŵanda wawo Mosese.