Chitenje 5 - Tonga Bible 1986

Ŵadandauliya Ambuya pa soka la uŵanda wawo

¹ Kumbukani, Ambuya cho chatiwiya; teskani, ndi wonani kulengeskeka kwidu!

² Chihara chidu chang'anamulikiya ku ŵalendo, nyumba zidu ku ŵamwenda nthowa.

³ Taŵa ŵana ŵaranda, ŵamburawuskeu, ŵanyinafwe ŵenge ndi vyoko.

⁴ Tilipila maji ghenigho titumwa, nkhuni zo tideŵa tigula.

⁵ Tidikiskika ukongwa ndi gori pa makhosi ghidu tavuka tilivi kupumuzgika.

⁶ Tichita kuko rundi ku ŵaEgipiti ndiku Asiriya, kuti tiŵe ndi kurgha kwakuguta.

⁷ Auskefwe ndiwo ŵangulakwa, ndipo sono kuti mbamoyo cha kweni ifwe tinyamuwa uheni wawo.

⁸ Ŵaŵanda ndiwo ŵatitiusa; palivi nanga njumoza wakutiwombo ifwe ku janja lawo.

⁹ Tisaniya kurgha kwidu muunonono wa nyifwa, chifukwa cha lipanga mu bozwa.

¹⁰ Khungu lidu ndamoto nge mpha chipa, chifukwa chakuŵaŵa kwa nja.

¹¹ Ŵanthukazi ŵati ŵakwala mu Zioni, ŵamwali mu misumba yaku Yuda.

¹² Ŵana ŵa mafumu ŵati ŵapayika ndi manja ghawo; ulemu kuti ulongoreka cha ku ŵaraŵara.

¹³ Ŵanyamata ŵachichizgika kupera pa mphe; ndipo ŵana ŵahurwa ŵazendazenda ndi mitolo ya nkhuni.

¹⁴ Madoda ghareka kuja pachipata chamsumba ŵanyamata ŵareka kumba sumu zawo.

¹⁵ Likondwa la mitima yidu lamara; kuvina kwidu kwasanduka chitenje.

¹⁶ Chifuku cha ufumu chambotokako ku mutu widu; Owe! Soka ifwe, pakuti talakwa!

¹⁷ Chifukwa chaku ichi mtima widu watama chifukwa cha vinthu ivi maso ghidu ghachita ndandi.

¹⁸ Chifukwa cha phiri Zioni lo ndauyiku; ŵakambwe ŵatendatenda paku lo.

¹⁹ Kweni imwe, Ambuya, muwusa muyaya; chitengo chinu chikiyakiya ku migonezi yose.

²⁰ Chifukwa chine mutitiruwa muyaya, chifukwa chine mwatijowo nyengo yitali?

²¹ Tiwezgiyeni kwaku mwaŵeni Ambuya, alinga kuti tiwezgeke! Nozgani so mazuŵa ghidu nge ndimo ghanguŵiya kale!

²² Pamwenga kumbi mwatipatiya limu? Kumbi mwakaripiya limu paku ifwe?