Amosi 9 - Tonga Bible 1986

Ambuya akawezganga ŵanthu ŵawo

¹ Ndinguwona Ambuya kuma mumphepete mu jochero, ndipo anguti, “Puma miti ya nchingamilo zapa khomo mpaka mizati yisukunike, ndipo uyipong'i pa mitu ya ŵanthu wose; ndipo wo ŵajengeko ndiŵabayenge ndi lipanga; pakaŵangavi yumoza wakathaŵanga, chingana njumoza wakuti wapozomoke.

² “Chingana ŵangakumba kusi kumuunda, janja langu lakuŵato kweniko; chingana ŵangakwere kuchanya, ndakuŵasiskiya pasi kweniko.

³ Chingana ŵangabisama pa phiri pachanya pa Karmele, ndakuŵapenja kwenikuwa ndi kuŵato; ndipo chingana ŵangabisama ku maso ghangu kusi ku nyanja, nkhalanguliyanga njoka, ndipo yikaŵarumanga kweniko.

⁴ Chingana ŵangaruta ku umkoli pamaso gha ŵarwani ŵawo, ndamulanguliya lipanga, ndipo lakuŵabaya kweniko; ndipo ndilereskenge maso ghangu paku iwo, kuŵachitiya uheni, kweni kuŵachitiya umampha cha.”

⁵ Ambuya, Chiuta wa maŵanja, yo wakwaska charu chapasi ndipo chisongonoka, ndi wose wo ŵaja mwaku cho ŵatenje, ndipo chose chiyuka nge ndi Nile ndipo chibila so, nge ndi Nile waku Egipiti;

⁶ yo wazenga vipinda vyake vyapachanya mu machanya, ndi wazenga chipinda chake chapasi pa charu; yo wadana maji gha mu nyanja, ndi kughapunguliya pa chisku cha charu chose. Ambuya ndilo zina lawo.

⁷ “Kumbi kuti mwenge mbaEtiopia cha kwaku ine, imwe mwa ŵanthu ŵaku Yisraele?” atiti Ambuya. “Kumbi kuti ndinguŵatuzga cha ŵaYisraele mu charu cha Egipiti, ŵaFilisti ku Kafitoro; ndi ŵaSiriya ku Kiri?

⁸ Wonani, maso gha Ambuya Chiuta ghe pa ufumu wa kwananga, ndipo nkhawubwangandu wanga pa chisku cha charu, kweni nyumba yaku Yakobe pe kuti ndibwanganduliyengelimu cha,” atiti Ambuya.

Ŵanyake ŵasiyika ndi ŵawezgeka

⁹ “Chifukwa ehe, ndilangulenge, ndikusukuniska nyumba yaku Yisraele mukati mu mitundu yose, nge ndimo munthu wapepete ndi lipalu, kweni mbeu chingana njimoza yakuwa pasi.

¹⁰ Ŵakulakwa wose ŵa ŵanthu ŵanguŵambubayika ndi lipanga ŵeniwo ŵatiti, ‘Uheni kuti ungatisaniya cha chingana nkhukumana nafwe.’

¹¹ “Mu zuŵa lo ndamuyuska msasa waku Davidi wo ukuwa ndi kulongoso madangazi ghake; ndi kuyuska vyakubwanganduka vyake, kuwuzenga so nge ndi mu mazuŵa ghakali;

¹² mwakuti ŵaronde ŵakujako ŵaEdomu, ndi mitundu yose yo yidanika ndi zina langu,” atiti Ambuya wo achita ichi.

¹³ “Wonani, mazuŵa ghatuza,” atiti Ambuya, “mwaku ghenigho mulimi wasaniyenge wakuvuna, ndi wakukanya mphereska wakasaniyanga wakumija mbeu. Mapiri ghakanthonyanga vinyo wakunowa, ndipo mapiri ghamanaghamana ghose ghazazikenge ndi iyo.

¹⁴ Ndituzgengepo umagoŵa wa ŵanthu ŵaYisraele, ndipo ŵazamuzenga so mizi yakupasuka ndi ŵazamujamu; ŵazamulima minda ya mphereska ndi kumwa vinyo wawo, ŵakalimanga minda ndi kurgha vipasi vyawo.

¹⁵ Ndiŵapandenge pa charu chawo, kuti ŵakazuwikanga so cha mu charu cho ndaŵapaska,” atiti Ambuya Chiuta winu.