Amosi 7 - Tonga Bible 1986

Chiwona cha ŵazombe

¹ Viyo ndimo Ambuya Chiuta wangundiwoneske: wonani, walongosonga ŵazombe mu nyengo yakwamba kubuka kwa uteka wakukuwa pavuli; ndipo ehe, wenga wakukuwa pavuli po karonga wanguti wasengamo wake.

² Ndipo po zombe wangumara kurgha uteka wa charu, ndinguti, “Ambuya Chiuta, gowokani, ndi kuŵeyani! Kumbi Yakobe wangama uli? Ndimumana limu!”

³ Ambuya angugowoka paku ichi; “Kuti kukaŵanga viyo cha,” atiti Ambuya.

⁴ Viyo ndimo Ambuya Chiuta wangundiwoneske: wonani, Ambuya Chiuta wangudana cheruzgu cha moto, ndipo ungocha ndimba yikuru ndi warghanga charu.

⁵ Viyo ndinguti, “Ambuya Chiuta, rekani, ndikuŵeyani! Kumbi Yakobe wangaziŵa kuma uli? Ndimumana limu!”

⁶ Ambuya angugowoka paku ichi; “Ichi nacho chikaŵangako cha,” anguti Ambuya Chiuta.

⁷ Wangundiwoneska; wonani, Ambuya amanga pa chiliŵa cho chinguzengeka ndi chingwe chakunyoloske mu wima, ndi chingwe chakunyoloske wima mu janja la wo.

⁸ Ndipo Ambuya anguti kwaku ine, “Amosi, uwonanji?” Ndingwamuka kuti, “Chingwe chakunyoloske-wima.” Viyo Ambuya anguti, “Awona ndiŵika chingwe chakunyoloske-wima mukati mu ŵanthu ŵangu ŵa Yisraele; kuti ndiŵajumphenge so cha;

⁹ malo gha pachanya ghaku Yisaki ghakapasukanga, ndi malo ghakupaturika ghaku Yisraele ghakanangikanga, ndipo ndiyukiyenge nyumba yaku Yeroboamu ndi lipanga.”

¹⁰ Penipo Amaziya mzukuru mura waku Betele wangutuma kwaku Yeroboamu, karonga waku Yisraele; kuti, “Amosi watukuŵemba mukati mu nyumba yaku Yisraele; charu kuti chingaziŵa kuronde mazu ghake ghose cha.

¹¹ Chifukwa Amosi wakamba viyo, ‘Yeroboamu wakafwanga ndilipanga, ndipo Yisraele wakalutanga ku umkoli kutali ndi charu chake!’ ”

¹² Ndipo Amaziya wangukamba so kwaku Amosi, “Iwe muwona, ruta thaŵiya ku charu cha Yuda, ndi ukarghe chiŵande kwenikuwa ndi kuchima kwenikuwa;

¹³ kweni ungachimanga so cha ku Betele chifukwa ndi malo ghakupaturika gha karonga, ndipo ndi kasopi wa ufumu.”

¹⁴ Viyo Amosi wangwamuka Amaziya wanguti, “Kuti ndine mchimi cha chingana nkhuŵa mwana wa mchimi; kweni ndine mliska wa ng'ombe, ndi wakupontho nkhuyu,

¹⁵ ndipo Ambuya angundidana kutuwa ku uliska wangu wa mskambu, ndi anguti kwaku ine, ‘Ruta, ukachimi ku ŵanthu ŵangu ŵaYisraele!’

¹⁶ Viyo sono, uvwi mazu gha Ambuya. Iwe utiti, ‘Ungachimanga cha ku mikana ndi Yisraele, ndi ungasambizganga cha kususka nyumba yaku Yisaki.’

¹⁷ Viyo mu chifukwa ichi atiti Ambuya: ‘Muwoli wako waŵenge mureŵi mu msumba, ndipo ŵana ŵako ŵanthurumi ndi ŵana ŵako ŵanthukazi ŵakabayikanga ndilipanga, ndi charu chako chamugaŵika ndi chipimo cha chingwe, ndipo wamweni wamufwiya mu charu cha ukazuzi; ndipo Yisraele wakarutanga nadi ku uŵanda kutali ndi charu chake!’ ”