Amosi 4 - Tonga Bible 1986

Chiuta warutiriya kuchenjezga ŵanthu

¹ “Vwani mazu yagha, imwe mwa ng'ombe zinthukazi za Bashani, zo zemu phiri la Samaria, zo zikandirizga ŵakavu, ndi kupweteka ŵaranda, zo sititi ku ŵarumi ŵawo, ‘Zani nacho, timwe!’

² Ambuya Chiuta warapa ndi utuŵa wake kuti, wonani, mazuŵa ghatuza, mwaku gho wamutuzgiyeningipo ndi chakukolowole, ndipo ŵakumariya ŵaku imwe ŵakatuzgikangapo ndi mbeja.

³ Ndipo mwamuturiya mu madangazi, we yose paku lo lepafupi nayo; ndipo mwamupong'eka ku Harmoni,” atiti Ambuya.

⁴ “Zani ku Betele, muzachilakwa; ndipo ku Gilgala, mwandaniske maulakwi; zani ndi sembe zinu, mlenji we wose, ndi vigaŵa vya chichumi paziŵa le lose la chitatu;

⁵ mupereke sembe zakocha zakuwonge za mtupu, ndi mpaskuwa wanangwa, ndipo muwuwandiske; chifukwa mutanja kuchita viyo, mwa ŵanthu ŵaku Yisraele!” atiti Ambuya.

⁶ “Ndikumpaskani kuphotoka kwaminyu mu misumba yinu yose, ndi kusoŵa kwa chiŵande mu malo ghinu ghose, ndipuuli, mulivi kuwere kwaku ine,” atiti Ambuya.

⁷ “Ndipo so ndakunorani vuwa, po yingujako mwezi yitatu kufika ku vuna, ndingutuma vuwa pa msumba umoza ndipo ndengavi kutuma vuwa pa msumba unyake; yingung'a pa munda umoza, ndipo munda wo yingureka kung'apo ungufota;

⁸ viyo misumba yiŵi pamwenga yitatu yinguja ku msumba umoza kwachimwa maji, kweni kuti yingukhorwa cha; ndipuuli kuti munguwere kwaku ine cha,” atiti Ambuya.

⁹ “Nkhakulanganinga ndi kachamba ndi kodi-kodi; minda yinu ndi minda ya mphereska ndayisanduska masara; miti yinu ya mkuyu ndi miti yinu ya maolivi yarghika yose ndi zombe; ndipuuli kuti munguwere kwaku ine cha,” atiti Ambuya.

¹⁰ “Ndingutuma mukati mwinu chideru nge ndimo kunguŵiya ku Egipiti; ndingubaya ŵanyamata ŵinu ndi lipanga; ndinguto ŵakavalo ŵinu; ndipo ndingupereka fungu liheni mu misasa yinu kuti likwere mu mphunu zinu; ndipuuli kuti munguwere kwaku ine cha,” atiti Ambuya.

¹¹ “Ndinguwanganduwa ŵanyake ŵaku imwe nge ndimo Chiuta wangubwanganduliya Sodomu ndi Gomora, ndipo mwenga nge nchisindi chakubulika ku moto wakunyeka; ndipuuli kuti munguwere kwaku ine cha,” atiti Ambuya.

¹² “Chifukwa ichi ndimo ndichitiyenge nawe, Yisraele; ndipo pakuti ndichitenge ichi kwaku iwe, ujinozge kukumana ndi Chiuta wako, iwe Yisraele!”

¹³ Chifukwa ehe, iyo wakuwumba mapiri, watata mphepo; ndi kukamba ku munthu gho ndi maghano-ghano ghake; yo wachita mlenji kuŵa mdima, ndi kukanda pa utali wa charu chapasi Ambuya Chiuta wa maŵanja, ndilo zina lake!