Amosi 1 - Tonga Bible 1986

¹ Mazu ghaku Amosi, yo wenga yumoza wa ŵaliska ŵaku Tekoa, ghenigho wanguvwa ghakunena Yisraele mu mazuŵa ghaku Uziya karonga waku Yuda, ndi mu mazuŵa ghaku Yeroboamu, mwana waku Yoashi, karonga waku Yisraele. Kunguja virimika viŵi chenga chindazi chidiririzi.

² Ndipo wanguti: “Ambuya abongonge mu Zioni, ndikutuzgiya mazu ghawo mu Yerusalemu; mauliska gha ŵaliska ghatenjenge, ndi pachanya pa Karmele pafotenge.”

Cheruzgu chaku Chiuta pa ŵazengezgani ŵa ŵaYisraele

³ Viyo atiti Ambuya: “Chifukwa cha maulakwi ghatatu ghaku Damasko, ndi wachinayi, kuti ndiwezgenge kulangika kwake cha; chifukwa wangukwechuwa Gileada ndi malikwechu gha chisulu.

⁴ Viyo nditumenge moto pa nyumba yaku Hazaeli, ndipo wamukocha malinga ghaku Benihadada.

⁵ Nkhafyonga mpiringizgu wa Damasko! ndi kuwiska ŵakuja mu chidika cha Avene, ndi yo wakoreze ndodo ya ufumu mu Betedene; ndi ŵanthu ŵaku Siriya ŵakarutanga ku umkoli ku Kiri,” atiti Ambuya.

⁶ Viyo atiti Ambuya: “Chifukwa cha maulakwi ghatatu gha Gaza, ndi wachinayi, kuti ndiwezgenge chilangu cha; chifukwa wangutole ŵanthu wose ku umkoli kuŵapereka ku Edomu.

⁷ Viyo nditumenge moto pa linga la Gaza, ndipo wamukocha malinga ghake.

⁸ Ndiwiskenge ŵakuja mu Ashidodi, ndi yo wakoreze ndodo ya ufumu mu Ashikeloni; ndi ng'anamuwenge janjalangu kumikana ndi Ekroni; ndi ŵakujako ŵa ŵaFilisti ŵakamaranga,” atiti Ambuya Chiuta.

⁹ Viyo atiti Ambuya: “Chifukwa cha maulakwi ghatatu gha Turo, ndi wachinanyi, kuti ndi wezgenge kulangika kwake cha; chifukwa wangupereka ŵanthu wose ku Edomu: ndi kuti wangukumbuka phanganu la ubali cha.

¹⁰ Viyo nditumenge moto pa linga la Turo, ndi wamukocha malinga ghake.”

¹¹ Viyo atiti Ambuya: “Chifukwa cha maulakwi ghatatu gha Edomu, ndi wachinayi, kuti nkhawezganga kulangika kwake cha; chifukwa wangudikiska mbali wake ndi lipanga, ndi kutaya lisungu lose, ukari wake unguparuwa kwambura kulekezga, ndi wangusunga ukari wake muyaya.

¹² Viyo nditumenge moto pa Tamani, ndi ukawochanga malinga ghaku Bozra.”

¹³ Viyo atiti Ambuya: “Chifukwa cha maulakwi ghatatu gha Amoni, ndi wachinayi, kuti ndiwezgenge kulangika kwawo cha; chifukwa ŵangupanguwa ŵanthukazi ŵanthumbu ŵaku Gileada mwakuti ŵakuzgi mphaka yawo.

¹⁴ Viyo ndipembenge moto mu linga la Raba ndi ukawochanga malinga ghake, ndikamphomezi mu zuŵa la nkhondo; ndi chimphupuru mu zuŵa la kanthenga;

¹⁵ ndipo karonga wawo, wakakolekiyanga ku umkoli, iyo pamoza ndi mafumu ghake,” atiti Ambuya.