2 ŴaKorinte 7 - Tonga Bible 1986

¹ Viyo pakuŵa ndi mapanganu ghenagha, mwaŵakwanjiwa, tijitozge ku ukazuzi wose wa liŵavu ndi mzimu, ndipo tiŵe ŵakhovu mu chopu chaku Chiuta.

Likondwa laku Paulo

² Tijuriyeni mitima yinu: tirive kumubudiya yumoza, tirive kumgorole munthu.

³ Kuti ndikamba kususka imwe cha; chifukwa ndanena, kali kuti, mwe mu mitima yidu, tikafwiyanga pamoza namwe ndi kujariya ŵamoyo pamoza namwe.

⁴ Nde nacho chigomezgu chikuru kuchiri kwinu, kujikuzga kwangu nkhukuru paku imwe; ndazara sangarusku. Ndifurwa ndi chimwemwe mu suzgu yidu yose.

⁵ Chifukwa nadi tati tazamo mu Makedonia, maliŵavu ghidu ghengavi kutuna, kweni kosekose tingusuzgika; kubwaro kwenga kurwana mukati mwenga vitenthe.

⁶ Kweni Chiuta, mweniyo wasangaruska ŵakujiyuyuwa, wangutisangaruska chifukwa cha kuza kwaku Tito;

⁷ ndipo ndi uzi wake pe cha, kweni so ndi sangarusku mwaku lo wangusangaruskikiya mwaku imwe, pakutitauliya linweka linu, chitenje chinu, rwana linu lapa chifwa changu; viyo kuti ndingukondwa ukongwa kwakuruska.

⁸ Pakuti chingana ndingumusuzgani ndi chisungu ndi kalata wangu kweni kuti ndichita chitima cha (chingana nadi ndinguŵa ndi chitima), chifukwa ndithoŵa kuti kalata yuwa wangumupwetekani mtima kwa nyengo.

⁹ Sono ndikondwa, chifukwa mungulengeka chisungu waka cha, kweni chifukwa mungulengeke chisungu chakurata ku chipe: chenga chitima cha kwaku Chiuta, viyo kuti mungutayapo kanthu cha pa chifwa chidu.

¹⁰ Chifukwa chitima chakuchiri kwaku Chiuta chitata chipe chakurata ku utaski, chenicho kuti chilengeska cha kweni chitima cha charu chibara nyifwa.

¹¹ Chifukwa, wonani vyo rwana la chisungu cha uchiuta charongo mukati mwinu, chingutataliya mwinu phamphu lakutinji, ndi chikwiya chakutinji, ndi wofi wakutinji, ndi linweka lakutinji, ndi rwana lakutinji, ndi thayu lakutinji! Mwaku chose mungujisimikiya kuŵa ŵakhovu mu nkhani yo.

¹² Viyo chingana ndingumlembiyani, kuti kwenga pa chifukwa chaku yo wangutokota cha, chingana nchifukwa chaku yo wangumutokote cha, kweni mwakuti (iwoneke kwaku mwaŵeni pamphu linu lapa chifwa chidu paurongo paku Chiuta.)

¹³ Chifukwa chinichi tasangaruskika. Mukati mu sangarusku lidutingukondwa ukongwako pa chimwemwe chaku Tito, chifukwa mzimu wake wajarikika pasi ndi imwe mose.

¹⁴ Pakuti asani kwaku iyo ndatumbwiyapo kakuti pa chifukwa chinu, kuti ndalengeka soni cha; kweni uli ndimo tingumkambiyani vyose mu uneneska, viyo so chitumbwa chidu cha paurongo paku Tito chaŵa chakuneneska.

¹⁵ Ndipo chitima chake viŵiviŵi che kuchiri kwinu, pakukumbuka muvwiyu waku mose, mwenimo ndi chopu ndi chitenthe mungumrondere.

¹⁶ Ndikondwere kuti mu chinthu chose nde ndi chigomekezgu mwinu.