2 ŴaKorinte 6 - Tonga Bible 1986

¹ Ndipo taŵakutakatakiya pamoza nayo, tikuŵeyereni karonde wezi waku Chiuta kwaumbughuya cha.

² Chifukwa watiti, “Mu nyengo yakurondeka ndingutegherezga kwako, ndipo mu zuŵa la utanski ndingukovya.” Onani, sono ndi nyengo yamarondeka; onani, sono ndi zuŵa la utaski.

³ Taŵa kuchitiya chingana njumoza guŵisku mu kanthu kose, cha, alinga kuti uteŵeti widu ureke kususkika;

⁴ kweni mu chinthu chose taŵakujipereka ngembateŵeti ŵaku Chiuta mu unkhunthiya ukuru ukongwa, mu masuzgu, mu malikwaŵezeka, mu malifyeku,

⁵ mumalikwechu, mu maulinda, mu vivurupi, mu mautakataka, mu macherezgu, mu kufunga;

⁶ mu ukhovu, mu mziŵiru, mu chilekerezga, mu ulemu mu Mzimu Wakupaturika, mu chanju chakuwura-ufyali,

⁷ mu mazu gha uneneska, mu nthazi yaku Chiuta, ndi vidya vya urunji ku marghe ndi ku maze,

⁸ mumarumbu ndimu muyuyu, mu thenthe liheni ndi thende limampha. Tichitika nge mbarandizgi, kweni te ŵaneneska;

⁹ nge mbambura kuziŵika, kweni ŵakuziŵikwadi; nge mbakuziririka, ndipo, wonani, te ŵamoyo; nge mbakulangika, kweni ŵakubayika cha;

¹⁰ nge mbachisungu, kweni ŵakukondwere nyengo zose; nge mbakusauka, kweni ŵakusambisiska ŵanandi; nge mbakuuravi kanthu, kweni te ŵakusakata vyose.

¹¹ Mlomo widu wajurikiya imwe, mwaŵaKorinte; mtima widu ngwakutandaulika.

¹² Kuti mufinyikizgika mwaku ifwe cha, kweni mufinyikizgika mu mitima yinu.

¹³ Pavuli pake (ndikamba nge nkhu ŵana ŵangu), namweso mutandaulike mitima.

Chenjezgu ndi kunyenga kwa ŵanthu ŵambura kuziŵa Chiuta

¹⁴ Mungaŵanga ŵakumangirizgana ndi ŵambura chivwanu cha: chifukwa usangana chine urunji ndi uchikana-marangu? Pamwenga ngune wanase wa ukweru ndi mdima?

¹⁵ Ndipo ŵayana uli Kristu ndi Beliale? Pamwenga ngane masanga gha ŵachivwanu ndi ŵambura chivwanu?

¹⁶ Ndipo ndine yanu lapa kasopi waku Chiuta ndi vyangoza? Chifukwa ndifwe kasopi waku Chiuta wamoyo; nge ndimo Chiuta wanene, “Nkhajariyanga mwaku wo, ndipo nkhendeyanga mwaku wo, ndipo nkhaŵanga Chiuta wawo, ndipo iwo ŵakaŵanga khamu langu.

¹⁷ Chifukwa chenichi tuwanimo mukati mwawu, ndi mupatukemo, watiti Mbuya, ndipo chambura kutowa mungachikwaska cha; ndipo ine nkhamrondeninga imwe,

¹⁸ ndipo nkhaŵiyanga imwe Dada, ndipo imwe mwamkundiŵiya ŵana ŵanthurumi ndi ŵana ŵanthukazi, watiti Mbuya Wanthazizose.”