2 ŴaKorinte 2 - Tonga Bible 1986

¹ Kweni ndingujiteme chenichi, kuti pakuza so kwinu ureke kuŵa ulendo wa chitima.

² Chifukwa asani ine ndimkwininskani na njani yo wangandikondweska, asi ndimweniyo wakwininiskika ndi ine?

³ Ichi ndicho chifukwa ndingulembe, mwakuti vinu nditakuti ndaza, ndingazachiŵa ndi chitima chakutuliya kwaku ŵeniwo ŵangwenere kundikondweska, ndawakugomekezge mose kuti chimwemwe changu nchimwemwe chaku mose.

⁴ Ndingumlembiyani mu suzgu yeni yikuru, mu urwirwi wa mtima ndi mu masozi ghanandi; kuti ndakhumbanga kumukwininiskani cha, kweni kuti muchiziŵe chanju chakuzara cho nde nacho mwaku imwe.

⁵ Kweni asani yumoza wakwininiska, walive kukwininiska ine, kweni kurwandi imwe mose (alinga ndingarutiliyako cha).

⁶ Ku munthu waviyo nchakwenere chilangu cho chaŵikika paku ndi urapasi wa mpingu wo;

⁷ viyo kuti kuchiri kunyake mujiwezge mumugowoke ndi kumsangaruska, vinu kokuli wangakoleka ndi chitima chakuruska

⁸ Chifukwa chenichi ndikuŵeyereni rongoni ndi kukhozga chanju chinu paku iyo.

⁹ Ichi ndichu chifukwa ndingulembe alinga kuti ndiziŵe ndikupanikizga vinu mwe ŵakuvwiya mu vinthu vyose.

¹⁰ Kwaku mweniyo yose mugowoke kanthu ine nane so ndimugowokiyenge. Chifukwa asani ine nane so ndimugowokiyenge. Chifukwa asani ine nane, ndimugowoke, ndamugowoke chifukwa chinu pa maso ghaku Kristu;

¹¹ mwakuti tireke kupundika ndi Satana yo; chifukwa tireka kuziŵa cha fuzi yake.

Chigowoke kwaku yo waguŵiska ŵanyake

¹² Kweni ndati ndaza mu Troa kwachimemeza evangeli waku Kristu, nanga khomo lingundijurikiya mu Mbuya;

¹³ kweni ndengavi chipumulu mu mzimu wangu, chifukwa chakureka kumsaniya mwenimuwa Tito mbali wangu; viyo pakurayirana nawo ndingurata ku Makedonia.

¹⁴ Kweni chiwongu chiŵiye Chiuta, mweniyo watipundiskiya nyengo zose mwaku Kristu, ndi wasapatiskiya mu malo ghose fungu la chiziŵisku chake mwaku ifwe.

¹⁵ Pakuti te chema chaku Kristu kwaku Chiuta, mu ŵakutaskika ndi mu ŵakutayika;

¹⁶ kwaku yaŵa fungu la nyifwa ku nyifwa; ku ŵanyake wo fungu la umoyo ku umoyo. Ndipo wakukwaniya vyenivyo njani?

¹⁷ Chifukwa kuti te nge mbanandi wo cha, ŵakukazuzga mazu ghaku Chiuta: kweni nge mbanthu ŵaneneska, ŵakupakika ndi ŵakupatulika ndi Chiuta, mu maso ghaku Chiuta, tirongorore mwaku Kristu.