2 ŴaKorinte 12 - Tonga Bible 1986

Chiwona chaku Paulo ndi uvumbuzi wake

¹ Nditenere kutumbwa inya; ndipo kuti kutovya kanthu cha; kweni ndirutiriyenge kukamba ndi viwona ndi mauvumbuzi gha Mbuya.

² Ndiziŵa munthu mwaku Kristu, mweniyo mu virimika chumi ndi vinayi vyo vyarutapo, (manyi ndi mu liŵavu, pamwenga kubwaro ku liŵavu, kuti ndiziŵa cha; Chiuta waziŵa) munthu uyu wangukwamphulikiya mpaka kuchanya kwachitatu.

³ Ndipo ndiziŵa kuti munthu uyu (manyi ndi mu liŵavu, pamwenga kubwaro kwa liŵavu, kuti ndiziŵa cha; Chiuta waziŵa), wangukwamphulikiya ku Paradiso,

⁴ ndipo wanguvwa makani ghambura makonkhomeka, ghenigho munthu kuti wangaghakamba cha.

⁵ Pa chifukwa cha munthu uyu nkhatumbwanga; kweni pa chifukwa chaku ndamweni kuti nditumbwenge cha, kweni iku mu maunthomboru ghangu.

⁶ Chifukwa chingana ndingakhumba kutumbwa, kuti ndiŵenge muzereza cha; chifukwa ndikambenge uneneska. Kweni ndituwako ku karusu yaka vinu yumoza wangandipimiya kwakuruska mowatindiwone, pamwe wavwiya kwangu.

⁷ Ndipo chifukwa cha mtaruliro wa mauvumbuzi gho, mwakuti ndireke kujikwezge pachanya ndi kujikuzga, kungupaskika kwaku ine urwirwi wakupweteka mu liŵavu, nthumi yaku Satana yingundipuma, kuti ndireke kutumphulika ukongwa.

⁸ Pa chifukwa chaku chenichi ndinguŵeyere Ambuya katatu, kuti ŵatuweko kwangu.

⁹ Ndipo andinene, “Ngwakukwana wezi wangu: chifukwa nthazi yangu yifiskikiya mu unthomboro.” Viyo nkhajikuzgiyanga kwakukondwa mbwenu mu maunthomboru ghangu, alinga kut nthazi yaku Kristu yigoŵiyenge paku ine.

¹⁰ Viyo ndikondwere mu maunthomboru, mu matozu, mu mauzitu, mu viŵembu, mu masoka, chifukwa chaku Kristu: chifukwa penipo nde wakutomboroka, po ndipo nde wanthazi.

¹¹ Ndaŵa mzereza; ndimwe mwandikakamizga; chifukwa ndingwenere ine kuchichizgika ndi imwe: chifukwa kuti ndapereŵeko kanthu cha ku ŵakutumika ŵara limu wo, chingana kuti nde kanthu cha.

¹² Nadidi visimisimi vya utumiki vingutatalikiya mwinu mu unkhunthiya wose, mu visimikizgu ndi so minthondwi ndi nchitu zanthazi.

¹³ Chifukwa awonani nchine cho imwe mungupereŵeko ku mipingu yinyake, asi nchenichi chakuti ndamweni ndengavi kumzitiskani? Mundigowoke kunanga uku!

¹⁴ Awonani kachitatu yaka ndirongosole kuza kwinu. Ndipo kuti nkhamzitiskaninga cha, chifukwa kuti ndipukwa vinu cha, kweni ndipukwa imwe: chifukwa kuti kuyiyamu ŵana kuŵikiya ŵapapi ŵawo mbiku cha, kweni ŵapapi ku ŵana.

¹⁵ Ndipo kwakukondwere limu ine ndimarenge vyo ndenavyo ndipo ndimarizgikenge pa chifukwa cha mizimu winu. Kumbi asani nako nditukwanjani ukongwa, kumbi ine ndanjiwenge kamanavi?

¹⁶ Nanga kunguŵaviyo, ine kuti ndingumzitiskani cha; kweni pakuŵa muchenjezi ndingukukoleni mu uchenjezi!

¹⁷ Kumbi kwe yumoza mwaku wo ndingumutumiyani, mwaku yo ndingwanduliya kwinu chanduwu?

¹⁸ Ndingufumba Tito kuti wazi kokwinu ndipo pamoza nayo ndingutuma mbali widu yo. Kumbi Tito wangwanduwako kanthu kwinu? Asi tingutakataka ndi Mzimu umoza pe? Asi tingwende mu mendedu ghakulingana?

¹⁹ Kumbi mughanaghana kuti nyengo yose iyi mbwenu tarongoroliyanga kupenja kujivikiriya kwaku imwe? Paurongo paku Chiuta tirongorole mwaku Kristu, ndipo vyenivyo, vyose, mwaŵakwanjiwa, vye pa chifwa chakuzenga imwe.

²⁰ Chifukwa nditopa kuti vinu ndichiza, ndingasaniya imwe nge ndimo kuti ndikhumbiya cha, ndipo ine ndingasanirika namwe nge ndimo kuti mukhumbiya imwe cha; vinu kokuli pangaŵa ndeu, sanji, vikwiya, magaukanu, kusuza, mitokutoku, matukutuku, vimtimbaheka.

²¹ Nditopa kuti vinu, ndichiza so ine, Chiuta wangu wangandiyuyuska paurongo pinu, ndipo ndingatenjere ŵanandi ŵaku wo ŵalakwa kali, ndi ŵandajipezge pa chifukwa cha ukazuzi wo ndi ureŵi ndi uyaya wo ŵanguchita.