2 ŴaKorinte 11 - Tonga Bible 1986

Paulo ndi ŵakutumika ŵatese

¹ Mphanyi mungakunthiyapo nane mu kupusa kumanavi. Nadi kunthiyanipo nane.

² Chifukwa ndikunwekiyani ndi linweka lauchiuta; chifukwa ndingumtoreskiyani ku mrumi yumoza, kwachipereke imwe nge ndi mwali mkhovu kwaku Kristu.

³ Kweni nditopa vinu uli ndimo njoka yo yingumunyenge Eva mu uchenjezi wake, vinjeru vinu vinganangika kulekana ndi uneneska ndi ukhovu wa mwaku Kristu.

⁴ Chifukwa asani mlendo ngana wamemeza Yesu munyake, mweniyo tengavi kumemeza ifwe pamwenga asani muronde mzimu wamwenga, yo mwengavi kuronde, pamwenga evangeli wamwenga, wo mwengavi kuronde, mukunthiyapo urusuvi.

⁵ Chifukwa nditijipimiya wambura kupereŵeko kanthu ku wakutumika wapachanya limu.

⁶ Ndipo asani nde mujira mu kakambidu, ndikweni kuti nde mujira mu mziŵiru cha; kweni chenichi takurongoleni limu mu vinthu vyose.

⁷ Pamwenga ndingulakwa kumbi pakujiyuyuwa ine ndi kuti imwe mukuzgike, pakuti ndingugozge imwe evangeli waku Chiuta mweniyo imwe kuti mungutayapo kanthu cha?

⁸ Mipingu yinyake ndiyo yingundipaska mphotu yo yingundovya kuzachiteŵete imwe; ndipo po ndinguŵa pamoza namwe mu kusauka kwangu kuti ndingumuzitiska yumoza cha; chifukwa ŵabali wo, ŵangutuliya ku Makedonia, ŵangugutiska usauchi wangu;

⁹ ndipo mu chinthu chose ndingujisunga ndamweni, kuti ndireke kuŵa munononu kwaku imwe, ndipo viyo pe nkhajisunganga.

¹⁰ Po nadi uneneska waku Kristu we mwangu, palivi cho chindikanizgenge kujikuzga uku mu vigaŵa vyaku Akhaia.

¹¹ Chifukwa chine? Chifukwa ndirive kumwanjani kumbi? Awa Chiuta waziŵa!

¹² Kweni chenicho ndichita, ndicho ndikachitanga, mwakuti ndidumuweko fundu kwaku wo ŵakhumba kujimemeza mu kujikuzga ndikutumika kwawo kuti ŵateŵeta nge ndifwe.

¹³ Chifukwa ŵaviyo mbakutumika ŵatesi, ŵanchitu ŵakufuvya ŵakujisanduska ŵeneko kuŵa nge mbakutumika ŵaku Kristu.

¹⁴ Ndipo kuti nchakuziziswa cha; chifukwa chingana ndi Satana nayo watijisanduska kuŵa mungelo wa ukweru.

¹⁵ Viyo kuti nchilendu cha, asani ŵateŵeti ŵake nawo Watijisanduska nge mbateŵeti ŵa urunji. Waku ŵeniwo umari ukaŵanga wakulingana ndi nchitu zawo.

Maukomwa ghaku Paulo chifukwa cha utumike wake

¹⁶ Ndiwerezgapo, munthu wangandipimiya kuŵa mzira-chinjeru cha; kweni chingana kwe viyo, ndirondeni nge ndi mzira-chinjeru alinga kuti nane so ndijikuzge kamanavi.

¹⁷ (Cho ndirongoro, kuti ndirongorole mu mazaza gha Mbuya cha, kweni ulaka ngwa kupusa, mu chiganga ichi cha kutumbwa.

¹⁸ Po ŵatumbwa ŵanandi uli nkhu liŵavu nane so nkhatumbwanga.)

¹⁹ Chifukwa, pakuŵa ŵavinjeru mwaŵeni, mukunthiyapo kwakufwasa ndi ŵazira-vinjeru.

²⁰ Chifukwa mukunthiyapo, asani munthu wakusanduskani ŵaŵanda, asani munthu wakumezani, asani munthu wakukoleni urghargha, asani munthu wajitumphuska, asani munthu wakupamanthani ku maso.

²¹ Ndikamba kwalilengu; kuti takhwimapo viyo cha! Kweni mwaku chenicho munthu wagangiya kujikuzga nacho (ndikamba nge ngwakupusa), nane so ndigangiya kujikuzga mwakuchenicho!

²² Kumbi mbaHebere? Nane so viyo. MbaYisraele kumbi? Nane so viyo. Kumbi mba mbeu yaku Abrahamu? Nane so viyo.

²³ Kumbi mbateŵeti ŵaku Kristu? (Ndirongoro nge ngwauzereza) ine kwakuruska; mu mautakataka kwakuruska, mu magoŵa kwakuruska, mu malikwechu kwambura kupendeka, mu zinyifwa panandi.

²⁴ Ku ŵaYuda ndinguronde kankhonde vikoti machumi ghatatu pachanya vinkhonde ndi vinayi,

²⁵ katatu ndingupumika ndi michiza, kamoza ndingupong'eka mya, katatu ndingubira mu kusweka kwa ngaraŵa, ndaswa usiku ndi msana kusambira mu ndimba ya nyanja.

²⁶ Mu marwendu panandi, mu maurwani gha misinji, mu maurwani gha ŵankhungu, mu maurwani ku ŵafuku langu, mu maurwani ku ŵaMitundu, mu maurwani ghamu muzi, mu maurwani gha mu bozwa, mu maurwani ghamu nyanja, mu maurwani gha mu ŵabali ŵatesi;

²⁷ mu katatalidu ndi kavukidu, mu macheruzgu panandi, mu nja ndi nyota, mu kuuravi kurgha panandi, mu kuzizira ndi nkhuli.

²⁸ Pade paku vyo vyakubwaro, kwe nthangwamika zakundiŵiya zuŵa ndi zuŵa, zakuphwerere mipingu yose.

²⁹ Njani watomboroka, ndipo ine ndirive kutomboroka? Njani waguŵiskika, ndipo ine ndirive kufya mtima?

³⁰ Asani nditenere kutumbwa, nditumbwiyenge paku vyo virongo unthomboru wangu.

³¹ Chiuta ndi Wiske wa Mbuya Yesu, mweniyo ngwakutumbikika muyaya, waziŵa kuti ndirive kuteta.

³² Mu Damasko nduna yaku Areta karonga yo yingukhazgiya msumba wa Damasko, pakukhumba kundiko,

³³ ndipo porotu mu dangazi mu linga ndingusiskikiya pasi mu chitete, ndipo ndingupozomoka ku manja ghake.