2 ŴaKorinte 10 - Tonga Bible 1986

Paulo wavikiriya uliska wake

¹ Kweni mu ukhovu ndi mu umampha waku Kristu ndikuŵeyereni ine, nda Paulo, ndawakujiyuyuwa pa maso pinu, kweni pakuŵa kunyake nda wakujitunthwa paku imwe;

² pempho langu ndakuti po ndazamukuŵa pamoza namwe ndireke kwazirongo chiganga mu chigomezgu nge ndi cho nde nacho pa kumikana ndi ŵanyake, ŵeniwo ŵatitipima nge mbakwenda kwakuyana ndi charu.

³ Chifukwa chingana tija mu charu kuti titurwa nkhondo ya charu cha,

⁴ chifukwa vidya vya nkhondo yidu kuti vya charu cha, kweni vyanthazi ya mwaku Chiuta kubwanganduwa malinga;

⁵ chifukwa tibwanganduwa zimphindanu ndi chiguŵisku chose chakujitumphuska kumikana ndi mziŵiru waku Chiuta, ndikuto ghanaghano lose kuligumizgiya mu umkoli waku mvwiyu waku Kristu,

⁶ ndipo te ŵakurongosoleka kwachilanga mtufu wose, asani wafiskika muvwiyu winu.

⁷ Thoŵani vya pa maso pinu. Asani munthu wajigomekezga kuti ngwaku Kristu wajipimiye so kuti mo waliri iyo waku Kristu, ndimo tirire ifwe nafwe.

⁸ Chifukwa chingana ndingajikuzga kamanavi ukongwa pa mtufu widu wo wakutipaska Mbuya kwachizenge imwe, kwachimudengenduwani cha, kuti ndingakanyara cha.

⁹ Kuti ndikamba viyo mwakuti ndiwoneke nge ndikhumba kumtenthemeskani ndi makalata ghangu cha,

¹⁰ pakuti watiti, “Makalata ghake ngazitu ndi ghanononu, kuŵapo kwake mu liŵavu nkhwakutomboroka ndipo mazu ghake ngawaka.”

¹¹ Munthu waviyo waziŵe ichi, kuti mo tirire ifwe mu mazu mu ŵakalata asani te kunyake, ndimo so tirire mu mlimu asani te pamoza namwe.

¹² Chifukwa kuti tigangiya cha kujeruzga mukati mwawo pamwenga kujiringanizga ndi ŵanyake wo mbakujirumba. Ŵeniwo pakujesa mwaku ŵija yumoza ndi munyake ndi kujilinganizga mwaku ŵija yumoza ndi munyake wawoneka kuti mbambura vinjeru.

¹³ Kweni ifwe kuti tijikuzgenge kwakuruska mwesu cha, kweni kwakulingana ndi mwesu wa mvizi weniwo Chiuta watigaŵiya, kwachifika mpaka kwaku imwe.

¹⁴ Chifukwa kuti titijitandazga viŵi cha, ulaka nge tengavi kufika kwinu: pakuti tingudanga ifwe kuzako kwinu ndi evangeli waku Kristu.

¹⁵ Kuti titijikuzga kwakuruska mwesu pa kutakataka kwa ŵanyake cha; kweni pakugomekezga, kuti mo chikuliya chivwanu chinu, kutakataka kwidu mukati mwinu naku so kutenere kukawa;

¹⁶ alinga kuti titauliyenge evangeli ku vigaŵa vya kurweka kwinu, kutumbwiya mu mvizi wa munyake pa milimu yakuchitika kali cha.

¹⁷ “Ndikweni yo ngwakutumbwa, watumbwiye mu Mbuya.”

¹⁸ Chifukwa yo ngwakujirumba yija kuti warumbika cha, kweni munthu yo warumbika ndi Ambuya ndiyo.