2 ŴaKorinte 1 - Tonga Bible 1986

¹ Kalata wakutuwa kwaku Paulo, wakutumika waku Kristu Yesu mu khumbu laku Chiuta, ndi Timote mbali widu, ku mpingu waku Chiuta wamu Korinte, pamoza ndi ŵakupaturika wose ŵamu Akhaia yose.

² Wezi kwaku imwe ndi chimangu chakutuwa kwaku Chiuta Auskefwe ndi ku Ambuya Yesu Kristu.

Paulo wawonga Chiuta

³ Watumbikike Chiuta ndi Wiske wa Ambuyafwe Yesu Kristu, Wiske wa malisungu ndi Chiuta wasangarusku lose;

⁴ mweniyo watitisangaruska mu suzgu yidu yose, kuti tiziŵe ifwe kuŵasangaruska wo ŵemu suzgu ye yose, ndi sangarusku mwaku lenilo tisangaruskikiya taŵeni ndi Chiuta.

⁵ Pakuti uli ndimo malikomwa ghaku Kristu ghafurwiya mwaku ifwe, viyo mwaku Kristu lifurwiya sangarusku lidu nalo.

⁶ Asani ifwe tisuzgika, mpha chifukwa cha chisangarusku; ndi chipozomosku chinu; ndipo asani tisangaruskika, iku mpha chifukwa cha sangarusku linu, lenilo litataliya mu kukunthiyapo malikomwa ghenigho ifwe nafwe tikomwa.

⁷ Ndipo chigomekezgu chidu kuchiri kwaku imwe nchakukho, pakuziŵa kuti, uli ndimo muliri ŵasangazi mu malikomwa ghidu viyo so mwe ŵasangazi ŵa sangarusku lidu nalo.

⁸ Chifukwa kuti tikhumba cha mureke kuziŵa, mwa ŵabali, ndi suzgu yidu yo yingutiŵiya mu Asia. Pakuti tinguzitiskika ukongwa limu, kwakuruska nthazi yidu, mwakuti chingana nchigomezgu cha maumoyo ghidu nacho chingumara.

⁹ Inya, tingufikapo mtima kuti nadi tatemeke ku nyifwa. Ichi chingutiŵiya alinga kuti tireke kugomekezga mwaku taŵeni, kweni mwaku Chiuta mwaniyo wayuska ŵakufwa;

¹⁰ Yo ku nyifwa yeni yikuru yaviyo wangutitaska, ndipo wamkutitaska: mwaku mweniyo tagomekezga kuti wakatitaskanga so.

¹¹ Namwe so mutenere kutovya mu marombo, alinga kuti kuporote mwaku ifwe Chiuta wawongeke ndi ŵanandi pa chifwa cha vitumbiku vyo vikupaskika kwaku ifwe mukwamuka marombo gha ŵanandi; alinga kuti chifukwa cha chawezi chakupaskikiya ifwe pa chifwa cha ŵanandi, wawongeke ndi milomo yinandi chifukwa chinu.

¹² Chifukwa chitumbwa chidu nchenichi, chisimisimi icho cha njuŵi zidu, kuti mu charu ukongwako mwaku imwe tajijariya mu ukhovu ndi uneneska waku Chiuta, mu zeru ya ŵanthu cha, kweni mu wezi waku Chiuta.

¹³ Chifukwa kuti tikulembiyani vinyake cha, kweni vyo wungaŵerenga ndi vyo mungawamo; ndipo ndigomekezga mukawangamo umamphavi mpaka umari,

¹⁴ uli ndimo so mungutizomerezge mwaŵanyake, kuti te chitumbwa chinu, ulaka nge ndimwe namwe mwe chitumbwa chidu, mu zuŵa lo la Ambuya Yesu.

¹⁵ Ndipo ndaneneskanga kuti ndakhumbanga kuza kwinu danga, alinga kuti muŵe ndi chimwemwe chachiŵi;

¹⁶ ndakhumbanga kwazichezga namwe pose paŵi pakuruta ndi pakuwe ku Makedonia, ndi kuti muzindiperekezge pakuya ku Yuda.

¹⁷ Viyo pakukhumba ichi, kumbi ndachitiyanga mu kuwura kuziŵa, pamwenga vyo ndipima, ndipimiya kwakulingana ndi munthu wa charu ichi kumbi, mweniyo watiti Inya kweni pa nyengo yeniyo pe watiti Awa?

¹⁸ Kweni ngwamagomekezgeka Chiuta, viyo kuti mazu ghidu kwaku imwe kuti ngakuti Inya! ndi Awa! cha.

¹⁹ Chifukwa Mwana waku Chiuta, Yesu Kristu, wakumemezeke mwinu ndi ifwe, nadi ndi Silvano, Timote ndi ine, kuti wenga Inya ndi Awa cha; kweni mwaku iyo nyengo yose waŵa Inya.

²⁰ Chifukwa mapanganu ghose ghaku Chiuta, ghasaniya inya wawo mwaku iyo, muchifukwa ichi tikamba, Ameni, mwaku iyo, tichikambiya ku unkhankhu waku Chiuta.

²¹ Ndipo ndi Chiuta yo watikhozge pamoza namwe mwaku Kristu, watipaska kutipatuwa;

²² ndipo watizighiriya, Yo so watipaska chamatomi cha Mzimu mu mitima yidu.

²³ Kweni ndidana Chiuta ndi kaboni pa umoyo wangu, kuti pakopa kumsuzgani ndingureka kuza ku Korinte,

²⁴ kuti nchakuti titufuliyenge pa chivwanu chinu cha, kweni titataliye ifwe pamoza namwe chimwemwe chinu; pakuti mu chivwanu chinu mutuma gwa!