2 ŴaKaronga 21 - Tonga Bible 1986

Muwusu uheni waku Manase

¹ Manase wenga wa virimika chumi ndi viŵi pa umoyo wake wachamba kuwusa, ndipo wanguwusa virimika machumi ghankhonde mu Yerusalemu. Zina la nyina lenga Hefziba.

² Ndipo wanguchita cho chenga chihene mu maso gha Ambuya, kwakuyana ndi machitidu gha ukazuzi wa mitundu yo Ambuya angudikiskamo paurongo pa ŵaYisraele.

³ Pakuti wanguzenga so malo gha pachanya gho awiske Hezekiya ŵangubwanganduwa, ndipo wanguzenga majochero ghaku Bala ndi wangupanga Ashera, uli ndimo wanguchitiya Ahabu karonga wa waYisraele, ndipo wangusopa maŵanja ghose gha kuchanya, ndi kughateŵete.

⁴ Ndipo wanguzenga majochero mu nyumba ya Ambuya gho Ambuya anguti, “Mu Yerusalemu ndikaŵikangamo zina langu.”

⁵ Wanguzenge maliŵanja ghose ghakuchanya majochero mu maluluwa ghaŵi gha nyumba ya Ambuya.

⁶ Ndipo wangocha mwana wake uli ndi mpasku, ndipo so wachitanga uchanusi ndi kombeza, wanguwukwa ku viŵanda ndi ufwiti. Wanguchita viheni vinandi mu maso gha Ambuya, kuŵasosomole ku ukari.

⁷ Ndipo ngoza wakusema waku Ashera, yo wangupanga wangumumika mu nyumba yeniyo Ambuya angukamba kwaku Davidi ndi kwaku Solomoni mwana wake, “Mu nyumba iyi ndimu Yerusalemu, yo ndasankha mu makhamu ghose gha Yisraele, ndikaŵikangamo zina langu muyaya,

⁸ ndipo kuti ndikachitanga so cha kuti marundi gha waYisraele ghayingayingenge kutuwa mu charu ichicho ndingupaska ku auskeu asani ŵaphwere pe kuchita kwakuyana ndi vyose vyo ndaŵalanguliya, ndi kwakuyana ndi dangu lose lo mteŵeti wangu Mosese wakuŵalanguliya.”

⁹ Kweni kuti ŵangutegherezga cha, ndipo Manase wanguŵarongozga kuchita uheni wakuruska wo mitundu yo Ambuya anguphwanya paurongo pa ŵaYisraele yinguchita.

¹⁰ Ndipo Ambuya angukambiya mu ŵamchimi, kuti,

¹¹ “Chifukwa Manase karonga waku Yuda wachita maunyakazi ghose yagha, ndipo wachita uheni ukuru ukongwa kuruskako wo Amori ŵakuchita, weniwo wengapo paurongo pake, ndipo wachitiska ŵaYuda kuti ŵalakwe ndi ŵangoza ŵake,

¹² chifukwa cho, viyo atiti Ambuya, Chiuta waku Yisraele, ‘Ehe, ndikatolenga pa Yerusalemu ndi paku Yuda uheni wakuti makutu ghaku yose wakuwuvwa ghakazenenekanga.

¹³ Ndipo ndikatambalikanga pa Yerusalemu chingwe chakupimiya cha Samaria, ndi thabwa la kupimiya la nyumba yaku Ahabu, ndipo ndikapuputanga Yerusalemu nge ndimo munthu wapuputiya mbali, kupuputa pavuli wavunika.

¹⁴ Ndipo ndikadikiskanga ŵakujapo wo ŵa ŵanthu ŵangu, ndi kuŵapereka mu janja la ŵakupindikana ŵawo, ŵakaŵanga nyama ndi vyakuskoŵa ku ŵakupindikana ŵawo wose,

¹⁵ chifukwa ŵachita cho nchiheni mu maso ghangu ndipo ŵandisosomole ku ukari, kwamba zuŵa auskeu ŵangutuliya mu Egipiti, kufika zuŵa lino.’ ”

¹⁶ Ndipo so Manase wangudiska ndopa zinandi zambura kafukwa mpaka zinguzaza Yerusalemu kwamba ku chisongo ichi mpaka kuchisongo chiya, pamoza ndi ulakwi wo wangulakwiska nawo Yuda viyo kuti wanguchita uheni mu maso gha Ambuya.

¹⁷ Sono machitidu ghanyake ghaku Manase, ndi vyose vyo wanguchita, asi vikulembeka mu Buku la Machitidu gha ŵaKaronga ŵaku Yuda?

¹⁸ Ndipo Manase wangula pamoza ndi awiske, wanguŵikika mu munda wapa nyumba yake, mu munda waku Uza, ndipo Amoni mwana wake wanguwusa mu malo ghake.

Amoni karonga wa ŵaYuda

¹⁹ Amoni wenga ndi virimika machumi ghaŵi pachanya viŵi wachamba kuwusa, ndipo wanguwusa virimika viŵi mu Yerusalemu. Zina la nyina lenga Meshuleme mwana munthukazi waku Haruzi waku Jotba.

²⁰ Ndipo wanguchita uheni mu maso gha Ambuya, uli ndimo awiske Manase wanguchitiya.

²¹ Wangwenda mu nthowa zose zo awiske wangwendamo, wanguteŵete ŵangoza wo awiske ŵanguteŵete ndi wanguŵasopa,

²² wangujowo Ambuya Chiuta wa ŵambuyake, ndipo wengavi kwenda mu nthowa ya Ambuya.

²³ Ndipo ŵateŵeti ŵaku Amoni ŵangumuyukiya, ndi ŵangumubaya mu nyumba yake.

²⁴ Kweni ŵanthu ŵa charu cho ŵangubaya wose wo ŵanguyukiya karonga Amoni, ndipo ŵangumika Josiya mwana wake kuŵa karonga mu malo ghake.

²⁵ Sono machitidu ghose ghaku Amoni gho wanguchita, ghakulembeka mu Buku la Machitidu gha ŵaKaronga ŵaku Yuda?

²⁶ Ndipo wanguŵikika mu muunda wake mu munda waku Uza, ndipo Josiya mwana wake wanguwusa mu malo ghake.