2 ŴaKaronga 12 - Tonga Bible 1986

Yehoyashi karonga waku Yuda

¹ Mu chirimika cha chinkhonde ndi chiŵi chaku Yehu, Yehoyashi wangwamba kuwusa, ndipo wanguwusa virimika machumi ghanayi mu Yerusalemu. Zina la anyina lenga Zibiya waku Beresheba.

² Ndipo Yehoyashi wanguchita cho chenga chakurunjika mu maso gha Ambuya mu mazuŵa ghake ghose, chifukwa Yehoyada mzukuru yo wamusambizganga.

³ Kweni uli malo ghapachanya gha visopo ghengavi kutuzgikamo, ŵanthu ŵangurutiliya kupereka ndi kocha vyachema mu malo ghapachanya.

⁴ Yehoyashi wangunena ndi ŵazukuru, “Toni ndrama zose za vinthu vyakupaturika zo zikutoreke ku nyumba ya Ambuya ndrama zo munthu yose wapereka kwakuyana ndimo wakujiteme mweneko, ndrama zo zikutemeke pa ŵanthu, ndi ndrama zo munthu wapereka ku nyumba ya Ambuya kwakuyana ndimo mtima wake wamupamphuskiya,

⁵ wangulanguliya ŵazukuru, nawo so, kuti yose waperekepo kanthu kutuliya paku vyo wenavyo, ndikuti nyumba yirongosoleke po pose pengakhumbikwa chirongoso.”

⁶ Kweni pa chirimika cha machumi ghaŵi pachanya vitatu cha karonga Yehoyashi ŵazukuru kuti ŵanguchita chirongoso pa nyumba yo cha.

⁷ Chifukwa cho karonga Yehoyashi wangudana Yehoyada mzukuru yo ndi ŵazukuru ŵanyake, wanguŵafumba, “Chifukwa chine mureka kulongoso nyumba yo? Iku sono mungalondanga so ndrama zinyake cha kwaku wo muziŵirizgana nawo, kweni muzipereke ku kurongoso nyumba.”

⁸ Viyo ŵazukuru ŵanguzomera kuti ŵareke kuronda ndrama zinyake ku ŵanthu, ndi kuti ŵareke kurongoso nyumba yo.

⁹ Sono Yehoyada mzukuru wanguto kabokosi ndi wangutoro kakhomo pa chivunikili chake wangukaŵika pafupi ndi jochero kuchiri ku marghe pakusere mu nyumba ya Ambuya, ndipo ŵazukuru wo ŵalondanga pakhomo ŵanguŵikamo ndrama zose zo zingutoreke mu nyumba ya Ambuya.

¹⁰ Ndipo penipo pose ŵanguwona kuti mwe ndrama zinandi mu kabokosi, mulembi wa karonga ndindimzukuru mura ŵanguza ndi kuŵerenga ndipo ŵanguziŵika mu mathumba ndrama zo zingusanirika mu nyumba ya Ambuya.

¹¹ Pavuli ŵaperekanga ndrama zo zingupimika pa mweso mu manja gha ŵateŵeti wo ŵaphwerenga nyumba ya Ambuya, ndipo iwo ŵanguzilipa ku ŵakukhoma ndi ŵakuzenga wo ŵatakatakanga pa nyumba ya Ambuya,

¹² ndi ku ŵakusema ndi ŵakudumuwa mya, ndi kugula so mathabwa ndi mya yakusemeka yakurongosole nyumba ya Ambuya, ndi kugula chose cho chingukhumbikwa pa nchitu yakurongoso nyumba.

¹³ Kweni kuti ŵangupangiyamo cha mu nyumba ya Ambuya mabeseni gha siliva, visunda vya nyale, ŵabakuli, malipenga, pamwenga chiyaŵi che chose cha golide, pamwenga cha siliva, ndi ndrama zo zaperekekanga mu nyumba ya Ambuya,

¹⁴ ziya zalipikanga ku ŵakutakataka pe ŵeniwo ŵarongosonga nyumba ya Ambuya.

¹⁵ Ndipo kuti zingufumbika konkhosko cha kutuliya mu manja ghaku ŵeniwo zingupaskikako kuti ŵalipenge ŵakutakataka, pakuti ŵaziteŵeteskanga mu ukongorekwa.

¹⁶ Ndrama zakutuliya ku mipasku ya pa ulakwi ndi mipasku yapa uheni kuti zingutoleke mu nyumba ya Ambuya cha, iyi yenga ya ŵazukuru.

¹⁷ Pa nyengu yiya Hazaeli karonga wa Siriya, wangukwera kwachirwana ndi Gata, ndipo wanguwulonda. Kweni po Hazaeli wangung'anamukiya chisku chake kwachirwana ndi Yerusalemu,

¹⁸ Yehoyashi karonga waku Yuda wanguto vyawulera vyose vyakutemeka vyenivyo Yehosafati, ndi Yehoramu ndi Ahaziya, ŵambuyake, ŵakaronga ŵaku Yuda, ŵangupatuwa, ndi vyawulera vyakutemeka vya pa mtima wake, ndi golide yose yo wangusanirika mu mbiku za nyumba ya Ambuya ndi nyumba ya karonga, wanguvituma kwaku Hazaeli karonga wa Siriya. Sono Hazaeli wanguruta kutuwako ku Yerusalemu.

¹⁹ Sono nchitu zose zaku Yoashi ndi vyose vyo wanguchita, asi vikulembeka mu Buku la Mikoka ya ŵaKaronga ŵakuYuda?

²⁰ Ŵateŵeti ŵake ŵangumuyukiya ndipo ŵangubaya Yoashi mu nyumba yaku Milo, panthowa yakuya ku Sila.

²¹ Yozakara mwana waku Shimeya ndi Yehozabadi mwana waku Shomeri, ŵateŵeti ŵake, ndi wo ŵangumukosole pasi, viyo wangufwa. Ndipo ŵangumuŵika pamoza ndi awiske mu msumba waku Davidi, ndipo Amaziya mwana wake wanguwusa mu malo ghake.