2 Timote 3 - Tonga Bible 1986

Mazuŵa ghakumariya

¹ Kweni ziŵiska chenichi, kuti mu mazuŵa ghakumariya zikabukanga nyengo zizitu.

² Chifukwa paŵengepo ŵanthu ŵakujanja, ŵakwanja ndrama, ŵakujiŵikamu, ŵakujikuzga, ŵakutondowo, ŵakutafuliya ŵapapi ŵawo, wambura kuwonga, ŵambura ukhovu, ŵazira chanju chakawi,

³ ŵambura matunizgika, ŵapharamulu, ŵambura kujitintha, ŵakari, ŵazira kwanja umampha,

⁴ zimphachi, ŵakujivwiya, ŵakututumuka, ŵakwanja kadara kwakuruska kumwanja Chiuta;

⁵ ŵakuŵa ndi chikozgu cha uwopa Chiuta kweni ŵakukana nthazi yake; kwaku ŵeniwo nawo gaukako.

⁶ Chifukwa mbamwaku ŵeniwo wo ŵanyete mu zinyumba, ndi ŵakole mikoli ŵanthukazi ŵakupusa ŵakuzitiskika ndi vilakwa, ŵakugumizgika ndi maulakalaka ghamtundumtundu,

⁷ ŵakusambira rutaruta, ndi ŵambura kuziŵa kosekose kufikapo pa uziŵiska wa uneneska,

⁸ kweni uli ndimo Janese ndi Jambrese ŵangumikirana ndi mosese, viyo iwo nawo ŵamikana ndi uneneska wo, pakuŵa ŵanthu ŵakuwo mu chinjeru, ŵakupatika kuchiri ku chivwanu.

⁹ Kweni kuti ŵakarutiriyanga cha; chifukwa uzereza wawo uwonekenge kwaku wose, uli ndimo unguwoneke wo waku ŵa.

Visambizgu vyakumariya

¹⁰ Kweni iwe ungurondo chisambizgu changu, kendedu, khumbu, chivwanu, chilekerezga, chanju, unkhunthiya,

¹¹ mayuzgu, maukomwa; vyenivyo vinthu vingundiwiya mu Antioke, mu Ikonio, mu Lustra, mayuzgu ghenigho ndinguyirika: ndipo mwaku vyose wangundizuwuwa Mbuya.

¹² Nadidi, ndipo wose ŵakukhumba kujariya kwauwopa Chiuta mvyaku Kristu Yesu ŵayuzgikenge.

¹³ Kweni ŵanthu ŵaheni ndi ŵafuzi ŵakarutiriyanga ku uheni, ŵakurandizga ndi ŵakurandizgika,

¹⁴ kweni iwe jariya mwaku ghenigho wasambira ndi wasimikizgika nagho, pakumuziŵa mweniyo ungughasambirako

¹⁵ ndikuti kutuwa ku ulitema waghaziŵiriya malembo ghakupaturika ghenigho nganthazi kukusanduska wazeru kutaskikiya mu chivwanu chamwaku Kristu Yesu.

¹⁶ Lembo lose lakuuzirika ndi Chiuta ndakwanduliya so ku chisambizgu, ku chipanikizga, ku chinyoroska, ku chilangwa chamu urunji:

¹⁷ alinga kuti munthu waku Chiuta waŵe wakufiskika, wakuphatiskikiya limu ku nchitu yose yamampha.