2 Timote 1 - Tonga Bible 1986

¹ Kalata wakutuwa kwaku Paulo wakutumika waku Kristu mu khumbu laku Chiuta, uli ndi phanganu la umoyo wa mwaku Kristu Yesu,

² kwaku Timote, mwana wangu wakwanjiwa: Wezi, lisungu, chimangu, kutuliya kwaku Chiuta Dada ndi kwaku Kristu Yesu Ambuyafwe.

Viwongo ndi kukhwimiska

³ Ndimwonga Chiuta mweniyo nditeŵete kutuliya ku ŵaseku mu njuŵi yikhovu, kuti kwambura kulekezga ndikumbuka iwe mu maniniziku ghangu, ndawakunweka usiku ndi msama kukuwona,

⁴ pakukumbuka masozi ghako, alinga kuti ndizazike ndi chimwemwe.

⁵ Ndichikumbuka chivwanu chamwako chamburafuzi, chenicho chinguja danga mu ambuyako Loisi, ndi mu anyoko Enike, ndipo ndiziŵa kuti che mwako so.

⁶ Chifukwa chenicho ndikukumbuska kuti ukhozge chaulera cho chaku Chiuta, chenicho che mwako mu kuŵikapo kwa manja ghangu.

⁷ Chifukwa Chiuta wengavi kutipaska mzimu wa chitenthe, kweni wa nthazi ndi wa chanju ndi wa chilangwa.

⁸ Viyo na, ungakanyariya cha pa ukaboni wa Ambuyafwe, chingana mphaku ine ndamkoli wake: kweni vwiyangapo maukomwa ghaheni pamoza ndi evangeli uli ndi nthazi yaku Chiuta;

⁹ mweniyo wangutitaska ndi kutidana ndi mdanu wakupaturika, kwakuyana ndi nchitu zidu cha, kweni uli ndi chiteme chaku yija ndi wezi, wo ungupaskika kwaku ifwe mwaku Kristu Yesu penipo zindambe nyengo zamuyaya,

¹⁰ kweni warongoleka sono mu chiwoneka cha Mtaski widu Yesu Kristu, mweniyo wakoto nyifwa, ndi wawoneska umoyo ndi uzirachivuzi mu evangeli,

¹¹ kwaku weniwo ndingumikikiya ine mumemeza ndi wakutumika ndi msambizgi.

¹² Chifukwa chaku chenicho ndikomwe so vyenivi: kweni kuti ndikanyara cha; chifukwa ndimziŵa mweniyo ndigomezga, ndipo ndiziŵa kuti ngwanthazi kusungirizgiya zuŵa liya chakupazgika changu.

¹³ Koreskanga chandiru cha mazu ghazirima ghenigho wavwa kwangu, mu chivwanu ndi chanju chamwaku Kristu Yesu.

¹⁴ Chakuzgika cheneko cho sungirizgiya mu Mzimu Wakupaturika mweniyo waja mwaku ifwe.

¹⁵ Uziŵa chenichi, kuti ŵapambukako kwangu wose ŵamu Asia; ŵaku ŵeniwo ndi Fugelo ndi Hermogene.

¹⁶ Mbuya wapaske lisungu ku nyumba yaku Onesiforo: pakuti panandi wangundisisipuska, ndipo kuti wangukanyara cha ndi unyoru wangu:

¹⁷ kweni, pakuŵa mu Roma, wangundilembe kwakupamphuka, ndipo wangundibowozga.

¹⁸ (Mbuya wampaske kusaniya lisungu ku Mbuya mu zuŵa liya!) Ndipo vyenivyo vyose wanguteŵeta mu Efeso, iwe uziŵa umamphavi.