2 Samuele 5 - Tonga Bible 1986

Davidi watuŵa karonga wa Yisraele ndi Yuda

¹ Penipo mafuku ghose ghaku Yisraele ghanguza kwaku Davidi pa Hebroni wangunena nayo, “Ehe, ifwe techiwanga chinu ndi nyama yinu.

² Mu nyengo zaruta, po Sauli wenga karonga pachanya pidu, ndimwe mungurongozga Yisraele kutuwa ndi kuwe nayo; Ambuya angukamba namwe, ‘Ukaliskanga khamu langu Yisraele, ndipo ukaŵanga karonga pa ŵaYisraele.’ ”

³ Viyo ŵara wose ŵaYisraele ŵanguza ku karonga pa Hebroni; ndipo karonga Davidi wangupangana nawo phanganu pa Hebroni pa maso pa Ambuya, ndipo ŵangumupaka Davidi kuŵa karonga pa ŵaYisraele,

⁴ Davidi wanguŵa ndi umoyo wa virimika machumi ghatatu (30) wachamba kuwusa, ndipo wanguwusa virimika machumi ghanayi (40).

⁵ Pa Hebroni wanguwusa pa ŵaYuda virimika vinkhonde ndi viŵi ndi myezi yinkhonde ndi umoza; ndipo pa Yerusalemu wanguwusa pa ŵaYisraele wose ndi Yuda virimika machumi ghatatu pachanya vitatu (33).

⁶ Karonga ndi ŵanthu ŵake ŵanguruta ku Yerusalemu kwa chirwana ndi ŵaYebusi, ŵeneko ŵa charu wo ŵangunena ndi Davidi, kuti, “Ukaserenga munu cha, kweni ŵachiburumutiya ndi ŵakupunduka ŵakujarizgiyenge kubwaro,” kughanaghana kuti, “Davidi wangasere munu cha.”

⁷ Kweni ndipuuli Davidi wangupoka linga la Zioni, lo ndi msumba waku Davidi.

⁸ Ndipo Davidi wanguti pa zuŵa liya, “Yose yo wangapuma ŵaYebusi, wakwere mu mpopi wa maji ŵakupunduka ndi ŵachuburumutiya, ŵakutinkhika ndi mzimu waku Davidi.” Mu chifukwa ichi kukambika, “Ŵachimburumutiya ndi ŵakupunduka kuti ŵakazanga mu nyumba cha.”

⁹ Ndipo Davidi wanguja mu linga, ndi wangulidana linga la msumba waku Davidi, ndipo Davidi wanguzenga msumba zingirizge kutuwa ku Milo mpaka mukati.

¹⁰ Davidi wangurutiliya-rutiliya mukukuwa, chifukwa Ambuya, Chiuta wamaŵanja, wenga nayo.

¹¹ Hiramu karonga waku Turo wangutuma mathenga kwaku Davidi, ndi miti ya milanji, ndipo so ndi ng'ombwa ndi ŵakuzenga wo ŵanguzenge Davidi nyumba.

¹² Davidi wangupanikizga kuti Ambuya amumika kuti waŵe karonga pa ŵa Yisraele, ndikuti wakwezga ufumu wake chifukwa cha ŵanthu ŵake ŵaYisraele.

¹³ Ndipo Davidi wanguto mbiligha zinandi, ndi ŵawoli mu Yerusalemu, wati waza kutuwa ku Hebroni, ndipo ŵana ŵanthurumi ndi ŵana ŵanthukazi ŵangupapika kwaku Davidi.

¹⁴ Yagha ndi mazina ghaku wo wangupapiya mu Yerusalemu; Shobaba, Natani, Solomoni,

¹⁵ Ibahara, Elishua, Nefege, Yifia,

¹⁶ Elishana, Eliada, ndi Elifelete.

ŴaFilisti ŵapundika

¹⁷ ŴaFilisti ŵanguti ŵavwa kuti Davidi wapakika kuŵa karonga pa ŵaYisraele, wose ŵaFilisti wanguruta kwachipenja Davidi; kweni wanguvwa ichi ndipo wangusikiya ku linga.

¹⁸ ŴaFilisti ŵanguza ndi kujindandiska mu dambo la Refaimi.

¹⁹ Ndipo Davidi wangufumba ku Ambuya, “Kumbi ndikwere kurwana ndi ŵaFilisti, kumbi muŵaperekenge mu janja langu?” Ndipo Ambuya angwamuka Davidi anguti, “Rutanga, chifukwa kwakuneneska ndiperekenge ŵaFilisti mu janja lako.”

²⁰ Ndipo Davidi wanguza ku Balperazimi, ndi wanguŵathereska, viyo wanguti, “Ambuya abwanganduwa ŵarwani ŵangu pa maso pangu, nge nkhuphumuwa kwa maji.” Mu chifukwa ichi zina la malo gha ndi Balperazimi.

²¹ Ndipo ŵaFilisti ŵangusiyako ŵangoza ŵawo, Davidi ndi ŵanthu ŵake ŵanguvito.

²² Ndipo ŵaFilisti ŵanguza so, ŵangujindandiska mu dambo Rafaimi.

²³ Davidi wanguti wafumba ku Ambuya, anguti, “Ungakweriyangako cha; zunguliya kuvuli kwawo, uziye paku iwo pakulereskana ndi miti ya balasama.

²⁴ Ndipo asani utuvwa kayowozi wa mchapu muchanya mu miti ya balasama, mbwenu nawe sokiyanga muchanya; chifukwa ndikukuti Ambuya adanjiya paurongo pako kukoso nkhondo ya ŵaFilisti.”

²⁵ Ndipo Davidi wanguchita nge ndimo Ambuya angumulanguliya, wangukoso ŵaFilisti kutuliya ku Geba mpaka ku Gezere.