2 Samuele 4 - Tonga Bible 1986

Ishiboshete wabayika

¹ Wanguti wavwa Ishiboshete, mwana waku Sauli, kuti Abnere wakufwa pa Hebroni, nthazi yake yingumara, ndi ŵaYisraele wose ŵangutethema.

² Mwana waku Sauli wenga ndi ŵanthu ŵaŵi ŵarongozgi ŵa maŵanja gha ŵaskoŵi, zina la yumoza lenga Bana, la munyake lenga Rekaba, ŵana ŵaku Rimoni mwina Benjamini waku Beroto (pakuti Beroto wangupimikiya kwaku Benjamini;

³ ŵaBeroto ŵanguthaŵiya ku Gitaimi, ndipo ŵaŵa ŵalendo kuwa mpaka zuŵa linu).

⁴ Jonafani mwana waku Sauli, wenga ndi mwana yo wangupunduka marundi. Wenga wa umoyo wa virimika vinkhonde po makani ghaku Sauli ndi Jonafani ghanguza kutuliya ku Yezerele; mlezi wake wangumunyamuwa, wanguthaŵa nayo, ndipo pakuchimbiya kwakuthaŵiriya, wanguwa, ndipo wanguŵa wakupunduka, zina lake lenga Mefiboshete.

⁵ Sono ŵana ŵaku Rimoni mwina Beroto, Rekaba ndi Bana, ŵanguruta, ndipo akhumba ndi msana pakati ŵangufika ku nyumba yaku Ishiboshete, po iyo wangugona kupumuwa ndi msana.

⁶ Ndipo wonani, mulinda wa nyumba wapepetanga trigu, kweni wasiwanga ndi kugona turo; viyo Rekaba ndi mbali wake Bana ŵangusere chisisi.

⁷ Ŵanguti ŵasere mu nyumba, iyo wagona pachita chake mu chipinda chakugona, ŵangumupuma, ndi ŵangumubaya, ndipo ŵangumudumuwa mutu, ŵanguti ŵato mutu wake, ŵangwenda usiku wose nthowa yaku Araba.

⁸ Ndipo ŵanguza ndi mutu waku Ishiboshete kwaku Davidi pa Hebroni. Sono wangunena ndi karonga, “Ndi uwu mutu waku Ishiboshete, mwana waku Sauli, murwani winu, yo wapenjanga umoyo winu; Ambuya awezge nduzga mbuyangu karonga zuŵa linu paku Sauli ndi mphapu yake.”

⁹ Kweni Davidi wanguti kwaku Rekaba ndi mbali wake Bana, ŵana ŵaku Rinoni mu Beroto, “Ndarapa Ambuya wamoyo, yo wawombo umoyo wangu mu visuzgu vinandi,

¹⁰ po yumoza wakambanga nane kuti, ‘Awonani, Sauli wafwa’, kughanaghana kuti wangundipingiya makani ghamampha, ndingumuko ndi kumubaya pa Ziklaga, ndiyo yenga mphoto yo ndingumupaska pa makani ghake.

¹¹ Iku uli ukongwako, po ŵanthu ŵaheni ŵabaya munthu wakurunjika mu nyumba yake pa chita chake, kumbi sono asi ndipenjenge ndopa zake pa janja linu ndi kumutuzganiko imwe ku charu cha pasi?”

¹² Ndipo Davidi wangulanguliya ŵateŵeti ŵake, ndipo ŵanguŵabaya ŵangudumuwa manja ndi marundi ghawo, ndipo ŵanguŵapayika pa mphepete pa chiziŵi pa Hebroni. Kweni ŵanguto mutu waku Ishiboshete, ŵanguwuŵika mu muunda waku Abnere pa Hebroni.