2 Samuele 24 - Tonga Bible 1986

Kaŵerengedu ka ŵanthu

¹ Ndipo ukari wa Ambuya ungukore so pa ŵaYisraele, angusoska Davidi kumikana nayo, akuti, “Ruta, ukaŵerenge ŵaYisraele ndi ŵaYuda.”

² Sono karonga wangunena ndi Yoabu ndi zinduna za maliŵanja gha nkhondo, wo ŵenga pamoza nayo, “Rutani mu mafuku ghose gha ŵaYisraele, kutuliya mu Dani mpaka ku Beresheba, ndipo muŵerengi ŵanthu mwakuti ndiziŵe unandi wawo.”

³ Yoabu wangunena ndi karonga, “Ambuya Chiuta winu wasazgiyeko ŵanthu manyi ŵangaŵa unandi wauli, kusazgiyako ndi machumi pe chumi penipo maso gha mbuyangu karonga ghalereska; kweni chifukwa nchine mbuyangu karonga wakondwere ndi chinthu ichi?”

⁴ Kweni mazu gha karonga ghangumuruska Yoabu ndi zinduna za nkhondo, viyo Yoabu ndi zinduna za nkhondo wangutuwa pa maso pa karonga kwachiŵerenga ŵaYisraele.

⁵ Ŵangwambuka Yordane, ndipo ŵangwamba pa Aroere ndi kutuwa mu muzi wo we pakati pa dambo, kulereska ku Gada mpaka ku Yizere.

⁶ Ndipo wangufika ku Gileada, ndi ku Kadeshe mu charu cha ŵaHiti, ŵanguza ku Dani kutuwa ku Dani ŵanguruta kuzunguliya ku Sidoni,

⁷ ŵanguza ku linga la Turo ndi mizi yose ya ŵaHivi ndi ŵaKanani; ŵangurutiliya ku Negebu waku Yuda pa Beresheba.

⁸ Sono ŵanguti ŵenda kuporota mu charu chose, ŵanguza ku Yerusalemu pa umari wa myezi yinkhonde ndi yinayi ndi mazuŵa machumi ghaŵi.

⁹ Ndipo Yoabu wangupereka unandi wa ŵanthu ku karonga: mu Yisraele mwenga ŵanthurumi vinkhara ŵakuko lipanga vikwi machumi pe chumi ghankhonde ndi ghatatu, (800,000) ŵaku Yuda ŵenga vikwi machumi pe chumi ghankhonde (500,000).

¹⁰ Kweni mtima waku Davidi ungulasika pavuli pakuŵerenga ŵanthu. Ndipo Davidi wanguti ku Ambuya, “Ndalakwa ukongwa mwaku ichi ndachita. Kweni sono Ambuya ndimupemphani, tuzgani uheni waku ndamteŵeti winu; pakuti ndachita kwakupusa ukongwa.”

¹¹ Ndi mlenji wanguti wayuka Davidi, mazu gha Ambuya ghanguza ku mchimi Gadi, mwana waku Davidi, kuti,

¹² “Ruta kakambi ndi Davidi, ‘Viyo atiti Ambuya, nditukupaska vinthu vitatu; usankhepo chimoza chaku vyo mwakuti ndicho ndikuchitiye.’ ”

¹³ Gadi wanguza kwa ku Davidi ndi kumukambiya, wangunena nayo, “Kumbi vikuziye iwe virimika vitatu vya chilala mu charu chako? Pamwenga kumbi ungathaŵa myezi yitatu paurongo pa ŵarwani ŵako, iwo ŵachikudikiska? Pamwenga asi kungaŵa chideru pa charu chako kwa mazuŵa ghatatu? Ndipo ughanaghane, ufikepo nkhwamuka uli ko ndiwezgiyenge ku ŵakundituma.”

¹⁴ Penipo Davidi wangunena ndi Gadi, “Ndafinyikizgika ukongwa; mphanyi tawa waka mu janja la Ambuya, pakuti ngukuru ukongwa wezi wawo; kweni kuti ndiwe mu janja la munthu cha.”

¹⁵ Viyo Ambuya angutuma chideru pa ŵaYisraele kutuwa ndi mlenji mpaka pa nyengo yakutemeka; ndipo ŵangufwa ŵanthu vikwi machumi ghankhonde ndi ghaŵi (70,000) kutuliya ku Dani mpaka ku Beresheba.

¹⁶ Ndipo mungelo wa Ambuya wanguti watambasuliya janja lake pa Yerusalemu ku ŵaparghang'a, Ambuya anguchita chitima ndi uheni uwu, ndipo angunena ndi mungelo wa nchitu ya kuparghang'a ŵanthu, “Mbwenu kwa kwana sono gowozga janja lako.” Ndipo mungelo wa Ambuya wenga pa mbuli waku Arauna muYebusi.

¹⁷ Davidi wanguti wawona mungelo yo wakosonga ŵanthu wangunena ndi Ambuya, wanguti, “Wonani, ndananga, ndipo ndachita uheni; kweni nanga mberere izi, kumbi zachitanji? Janja linu, ndi murombani, limikani ndi ine ndipo limikani ndi nyumba ya ada.”

¹⁸ Ndipo zuŵa liya Gadi wanguza kwaku Davidi, wanguti, “Kwerani mukazenge jochero la sembe Ambuya pa mbuli waku Arauna muYebusi.”

¹⁹ Viyo pa mazu ghaku Gadi nge ndimo Ambuya angumulanguliya, Davidi wanguruta.

²⁰ Wachilereska Arauna, wanguwona karonga ndi ŵateŵeti ŵake ŵatuza kwakuthoŵezgana nayo, Arauna wangutuwa wangulambiya karonga wangukotama chisku chake pasi.

²¹ Wanguti, “Mwapukwanji mbuyangu karonga kwaku ndamteŵeti winu?” Davidi wanguti, “Kuzachigula mbuli wako, mwakuti ndiŵazengeyepo chiguŵa Ambuya, mwakuti nthenda ya chideru yimare mu ŵanthu.”

²² Ndipo Arauna wanguti, “Mbuyangu karonga toni, mchite cho nchamampha mu maso ghinu; ehe pano pe ng'ombe zakuchitiya mpasku wakocha, vyakubuliya ndi magoŵa gha ng'ombe viŵi nkhuni zake.

²³ Vyose ivi, karonga ndipereka kwinu”; ndipo Arauna wangunena ndi karonga, “Ambuya Chiuta winu wamurondiyeni imwe.”

²⁴ Kweni karonga wanguti kwaku Arauna, “Awa ndigurenge kwako pa mtengo wake; kuti ndiperekenge cha mipasku ya kocha ku Ambuya Chiuta wangu po ndareka kutayiyapo kanthu.” Viyo Davidi wangugula mbuli ndi ng'ombe pa mtengo wa mashekelo gha siliva machumi ghankhonde (50).

²⁵ Ndipo Davidi wanguzenga jochero la Ambuya, ndi kupereka mipasku yakocha ndi mipasku ya chimangu. Viyo Ambuya anguvwa kuŵeyere pa chifukwa cha charu, ndipo chideru chingukanizgika mu ŵaYisraele.