2 Samuele 1 - Tonga Bible 1986

Davidi watuvwa nyifwa yaku Sauli

¹ Pavuli pa nyifwa yaku Sauli, Davidi wanguti wawe kukubaya Amaleke, wanguja mazuŵe ghaŵi mu Ziklaga;

² ndipo pa zuŵa la chitatu, wonani, munthu wanguza kutuliya ku ugoŵi waku Sauli, ndi vyakuvwara vyakuparuka ndi fuvu ku mutu wake. Wanguti wafika kwaku Davidi, wanguwa pasi wangumulambiya.

³ Davidi wangumufumba, “Utuliya pani?” Iyo wanguti, “Ndapozomoka ku ugoŵi wa ŵaYisraele.”

⁴ Davidi wanguti kwaku iyo, “Kumbo kukuchitikanji? Ndinene.” Iyo wanguti, “Ŵanthu ŵathaŵa ku nkhondo ndipo ŵanandi so ŵawa ndi mbakufwa, Sauli ndi mwana wake Jonafani nawo ŵafwa.”

⁵ Ndipo Davidi wangunena ndi munyamata yo wamukambiyanga makani yagha, “Uziŵa uli kuti Sauli ndi mwana wake Jonafani ŵafwa?”

⁶ Munyamata yo wanguti, “Mwa mwaŵi ndenga pa phiri la Gilboa; ndinguwona Sauli wagona pa mkondo wake; ndipo ehe, magareta ndi ŵakukwera pa ŵakavalo ŵangufinyirizga.

⁷ Ndipo wanguti walereska kuvuli kwake, wangundiwona ndi wangundidana, ine ndingwamuka, ‘Ndine pano,’

⁸ Wangunena, ‘Ndiwe yani?’ Ndingumwamuka, ‘Ndine muAmaleke.’

⁹ Wangunena nane, ‘Iza pafupi nane undibayi; pakuti urwirwi wandifyeka, kweni ndeche wamoyo.’

¹⁰ Viyo ndinguma pafupi nayo ndingumugwaza, chifukwa ndenga muneneska kuti, kuti wakaŵanga so ndi umoyo cha po wawa pasi; ndipo ndinguto mphumphu yo yenga ku mutu wake ndi goza lo lenga pa janja lake, ivi ndapinga kuzachipaska mbuyangu.”

¹¹ Penipo Davidi wanguko, ndi kuparuwa vivwalo vyake; ndipo wose ŵakuŵa nayo pamoza ŵanguchita ichi;

¹² ndipo ŵangutenje ndi kuliya ndi kukana kurgha mpaka mazuru chifukwa chaku Sauli ndi mwana wake Jonafani ndi khamu lose la Ambuya ndi nyumba yaku Yisraele, chifukwa wangubayika ndi lipanga.

¹³ Sono Davidi wangunena ndi munyamata yuwa wangumunene makani, wanguti, “Utuwa nunkhu?” Iyo wangwamuka, “Nde mwana wa mlendo muAmaleke.”

¹⁴ Davidi wanguti, “Chifukwa nchine wengavi mantha kutambasuriya janja lako kunanga wakupakika wa Ambuya?”

¹⁵ Penipo Davidi wangudana yumoza wa ŵanyamata wanguti, “Kanga, kamubaye.” Ndipo wangumupuma wangufwa.

¹⁶ Davidi wangunena nayo, “Ndopa zako ziŵi pa mutu wako; pakuti mlomo wako wakuŵiya kaboni wamweni, kuti, ‘Ndabaya wakupakika wa Ambuya.’ ”

Davidi waliriya Sauli ndi Jonafani

¹⁷ Ndipo Davidi wanguliriya Sauli ndi mwana wake Jonafani ndi chitenje ichi,

¹⁸ ndipo wanguti chisambizgike ku khamu laku Yuda; awonani, chikurembeka mu buku laku Yashara, wanguti:

¹⁹ “Unkhankhu wako, Yisraele, wabayikiya pa malo ghako ghapachanya! Vyawa uli vinkhara!

²⁰ Mungataulanga ichi mu Gata cha, rekani kuchimemeza mu miseu ya Ashikeloni; vinu ŵangakondwere ŵana ŵanthukazi ŵa ŵaFilisti vinu ŵana ŵanthukazi ŵa mbura kuchinjika ŵangalankhanga.

²¹ “Imwe mapiri ghaku Gilboa, pareke kuŵa dungwi pamwengavuwa paku imwe, nanga ndi minda yakutoko mipasku! Chifukwa kwenikuwa yingukazuzgikiya nguru ya chinkhara, nguru yaku Sauli yambura kupakika mafuta.

²² “Ku Ndopa za wakubayika, ku mafuta gha vinkhara, uta waku Jonafani kuti unguwerere vuli cha, ndi lipanga laku Sauli kuti linguwe waka cha.

²³ “Sauli ndi Jonafani wakwanjana ndiŵamampha! Mu umoyo ndi mu nyifwa kuti ŵangupatukana cha; ŵenga ŵamankharu kuruska nombo, ŵenga ŵanthazi kuruska zinkharamu.

²⁴ “Imwe mwa ŵana ŵanthukazi ŵaku Yisraele, liriyani Sauli, yo wangumuvwarikani vya kujeduka ndi vyakuworofoka, yo wanguŵika vyakutoweska vya golide pa vyakuvwara vinu.

²⁵ “Vyawa uli vinkhara mukati mu nkhondo! Jonafani wagona wafwa pa malo ghako gha pachanya.

²⁶ “Ndalasika mtima chifukwa chako, mbali Jonafani; waŵa wakundikondweska ukongwa; kwanja kwako kungundiziziswa, kunguruska kwanja kwa ŵanthukazi.

²⁷ “Vyawa uli vinkhara, vidya vya nkhondo vyabwanganduka!”