2 Petro 3 - Tonga Bible 1986

Phanganu lakuza kwa Ambuya

¹ Mwaŵakwanjiwa, ndikulembiyani sono kalata uyu wachiŵi; ndipo mu makalata ghose ghaŵi gho, ndichiska chinjeru chinu cheneko ndi kumkumbuskani,

² kuti mukumbukedi manenedu gho ghangukambikiya limu ndi ŵamchimi ŵakupaturika, ndi langulu so la Ambuya ndi Mtaski lakukambika ndi ŵakutumika ŵinu.

³ Ziŵani danga chenichi, kuti mu mazuŵa ghakumariya ŵakutoza ŵakaziyanga mu mtonyoru, ŵakwenda kwakuyana ndi malikhumbira gha ŵenecho, ndi kunena,

⁴ “Le pani phanganu la uzi wake? Chifukwa, kwanda ku zuŵa lenilo ŵangulariya ŵaseku, vinthu vyose vichajaririya viyo pe kutuwa ku chiyambo cha ulengi.”

⁵ Chifukwa ŵaruwiya dara chenichi, chakuti ndi mazu ghaku Chiuta machanya ghanguŵako ku mwaka, ndi mtunda ungutuwa ku maji,

⁶ ndipo ndi maji mtunda wo unguŵapo penipo, ungunangika ndi ungubira, maji gho ghangutighasapatiya:

⁷ kweni machanya gho ghasono, ndi mtunda nawo, ndi mazu ghenigho pe vyaŵikikiya ku moto, vyalindizgikiya ku zuŵa la cheruzgu ndi la chanangiku cha ŵanthu ŵambura uwopa Chiuta.

⁸ Kweni kenaka, kamoza kangamsoŵani, mwaŵakwanjiwa, kuti zuŵa limoza ku Mbuya le nge ndi virimika chikwi, ndi virimika chikwi nge ndi zuŵa limoza.

⁹ Mbuya walive kuziulika pa phanganu lake, uli ndimo ŵanyake ŵapimiya chiziu; kweni ngwakulekerezga kuchiri kwaku imwe, wambura kukhumba kuti yumoza wanangike, kweni kuti wose ŵazichipe.

¹⁰ Kweni zuŵa lo la Mbuya likazanga uli ndi munkhungu, mwaku lenilo zuŵa machanya gho ghamkungunuka ndi mphomu yikuru, ndi visina vyakunyeka vyamsongonoka, ndipo charu ndi nchitu zamwake vyazamukufya.

¹¹ Pakuti vinthu ivi vyose vyazamsongonoka, kutenere imwe kuŵa ŵakutinji mu mendedu ghakhovu ndi mauwopa Chiuta,

¹² kulereze ndi kupamphukiya ku uzi wa zuŵa lo laku Chiuta, mwenimo machanya, ghakujykole moto, ghakasongonokanga, ndipo visina vyakunyeka vikafyanga?

¹³ Kweni, kwakulingana ndi phanganu lake, tilereze machanya ghafya ndi charu chifya mwenimo muja urunji.

¹⁴ Viyo, mwaŵakwanjiwa, pakulereze vyenivi, pamphukiyani kusanirika ndi iyo mu chimangu, ŵambura banga ndi ŵambura kalema.

¹⁵ Ndipo pimani chelekerezga cha Ambuyafwe kuti mbutaski; uli ndimo so mbali widu wakwanjiwa, Paulo, kwakuyana ndi zeru yo yapaskika kwaku iyo, wangukulembiyani;

¹⁶ mwenimo so mu makalata ghake ghose wakambiya mwaku gho ndi vinthu vyenivi; mwenimo mwe vinyake vinononu kuteskeka, vyenivyo ŵambura kusambira ndi ŵambura kukho ŵanyongoro, uli ndimo so ŵachitiya ndi malembo ghakujapo, ku chanangiku chaku ŵija.

¹⁷ Viyo imwe, mwaŵakwanjiwa, pakuziŵiya limu vyenivi, jikhazgiyeni vinu, pakugumizgika ndi urandizgi wa ŵazira-marangu, mungadezukako ku ukhozgi waku mwija.

¹⁸ Kweni kuliyanimu wezi ndi mziŵiru wa Ambuyafwe ndi Mtaski Yesu Kristu. Mwaku iyo kuŵiye unkhankhu wo sono ndi ku zuŵa lamuyaya. Ameni.