2 Petro 1 - Tonga Bible 1986

¹ Kalata wakutuwa kwaku Simoni Petro, muŵanda ndi wakutumika waku Yesu Kristu, kwaku ŵeniwo ŵaronde chivwanu chakuzirwa chakuyana ndi chidu mu urunji wa ku Chiuta widu ndi wa Mtaski Yesu Kristu:

² Wezi ndi chimangu vyandaniskikiye kwaku imwe mukuziŵiska Chiuta ndi Yesu Ambuyafwe.

Mudanu waku Chiuta ndi kusankha kwake

³ Uli ndimo nthazi yake yauchiuta yatipaskiya vyose vyakukhumbikwa ku umoyo ndi uwopa Chiuta, mu kumziŵa mweniyo watidaniya ku unkhankhu ndi umampha waku yija;

⁴ mwaku vyenivyo watipaska vipanganu vyakuzirwa ndi vikuru ukongwa, alinga kuti mwaku vyenivyo, mwati mwathaŵa chivuzi cho chemu charu mu ulakalaka, muŵe ŵasangazi ŵa kaŵiru kauchiuta.

⁵ Ndipo pa chifwa chenichi nacho pakukuskiyako pamphu lose, sazgiyanipo pachanya mu chivwanu chinu umampha, ndi mu umampha wo mziŵiru,

⁶ ndi mu mziŵiru wo kujitintha, ndi mu kujitintha ko unkhunthiya, ndi mu unkhunthiya wo uwopa Chiuta,

⁷ ndi mu uwopa Chiuta wo kwanja-ŵabali, ndi mu kwanja-ŵabali ko chanju.

⁸ Chifukwa pakuŵa vyenivyo mwinu ndi kuzara, vikukanizgani kuŵa ŵakata ndi ŵambura vipasi kuchiri ku chiziŵisku cha Ambuyafwe Yesu Kristu.

⁹ Ndikweni mweniyo wauravi vyenivi ngwachiburumutiya, wachizimizimi, pakuruwa kuphotoleka kwa vilakwa vyake vyakale.

¹⁰ Viyo na, mwa ŵabali, ukongwako pamphukiyani kwachikhozga mdanu winu ndi kasankhikidu kinu: chifukwa pakuchita vyenivi, kuti muguŵenge kose cha:

¹¹ chifukwa viyo kakuskikiyengeko kwaku imwe kwakusambasa kasereredu kamu ufumu wamuyaya wa Ambuyafwe ndi mtaski Yesu Kristu.

¹² Chifukwa chenichi ndiphwerenge kumkumbuskani rutaruta ndi vyenivi, chingana muviziŵa, ndipo mukhozgeka mu uneneska wo sono we mwinu.

¹³ Ndipo ndipima kuti nkhwakwenere, po pose ndeche mu hema lenili, kumyuskani ndi kumkumbuskani;

¹⁴ pa kuziŵa kuti nyifwa yaliŵavu langu ye pafupi, uli ndimo so Ambuyafwe Yesu Kristu wangundirongole.

¹⁵ Ndipo so ndesenge kuti pavuli pa kuruta kwangu mwenda-mchita nyengo zose chinkhumbo chaku vyenivi.

Ukaboni wakuwona wa unkhankhu waku Kristu

¹⁶ Chifukwa tengavi kurondo nthanu zakunyengere, tichimziŵiskani nthazi yake ndi uzi wa Mbuyafwe Yesu Kristu, kweni tenga ŵakutimu ndi maso ukuru wake.

¹⁷ Chifukwa kwaku Chiuta Dada wanguronde thamu ndi unkhankhu, penipo kutuliya ku unkhankhu wo wakuzungura ghangumziya mazu ghakuti, “Mwenuyu ndi Mwana wangu wakwanjiwa, mwaku mweniyo ndikondwere ine.”

¹⁸ Ndipo mazu ghenigho tinguvwa ifwe ghachiza kutuliya kuchanya, pakuŵa pamoza nayo mu phiri lo lakupaturika.

¹⁹ Ndipo te nalo nenedu lo la umchimi lakukhozgeka: kwaku lenilo mutenere kuphwere, uli nkhu lumbuni lakuŵaliya mu malo ghamunkhorwi, mpaka lichenge zuŵa, ndi thondu lituwenge mu mitima yinu.

²⁰ Pakuziŵa chenichi danga, kuti palive lembo la umchimi lo lijing'anamuwa lija.

²¹ Chifukwa kuti umchimi wengavi kuza kali ndi khumbo la munthu: kweni ŵanthu ŵakambanga gho ghatuliyanga kwaku Chiuta, pakututuzgika ndi Mzimu Wakupaturika.