2 Mikoka 5 - Tonga Bible 1986

Kaperekedu ka kasopi

¹ Viyo nchitu yose yo Solomoni wanguchitiya nyumba ya Ambuya yingumara, viyo Solomoni wanguserezga vinthu vyose vyo awiske Davidi wanguvipatuwa, wanguŵika siliva ndi golide ndi viyaŵi vyose mukati mu nkhokwe za nyumba yaku Chiuta.

² Viyo Solomoni wanguwungang'a ŵaraŵara ŵaku Yisraele ndi ŵara wose ŵa mafuku, ndi wose ŵara ŵa nyumba za auskeu za ŵaYisraele ku Yerusalemu kwachito bokosi la phanganu la Ambuya, kulituzga mu msumba waku Davidi; wo ndi Zioni.

³ Ndipo ŵanthurumi wose ŵaku Yisraele ŵanguwungana ku karonga pa dghera lo lengako mu mwezi wa chinkhonde ndi chiŵi.

⁴ Ndipo ŵara wose ŵaku Yisraele ŵanguza, ndipo ŵaLevi ŵangunyamuwa bokosi;

⁵ ŵanguto bokosi, hema lakuwunganamo, ndi viyaŵi vyose vyakupaturika vyo vyenga mu hema; ŵazukuru ndi ŵaLevi ŵanguza navyo.

⁶ Ndipo karonga Solomoni ndi mzinda wose wa ŵaYisraele wo ŵanguwungana kwaku iyo ŵenga paurongo pa bokosi, ŵangubaya sembe za mberere ndi ng'ombe zinandi zambura maŵerengeka.

⁷ Viyo ŵazukuru wanguserezga bokosi la phanganu mu malo ghakupaturika gha mukati mu nyumba mu malo ghatuŵa ukongwa, kusi ku mapapa gha makerubi.

⁸ Pakuti makerubi ghangutandauliya mapapa ghawo pachanya pa malo gha bokosi, ghangubenekere bokosi ndi minthambi yake.

⁹ Ndipo minthambi yenga yitaliko ndi kuti songo zawo zawonekanga kutuliya ku malo ghakupaturika paurongo pa malo ghakupaturika gha mukati; kweni kuti yawonekanga kubwalo cha, yekweniko mpaka zuŵa lino.

¹⁰ Mwengavi kanthu mu bokosi kweni mya yiŵi ya vipapati yo Mosese wanguŵika ku Horebu penipo Ambuya angupangana phanganu ndi ŵaYisraele ŵachituwa ku Egipiti.

¹¹ Sono ŵazukuru ŵanguti ŵatuwa mu malo ghatuŵa (pakuti ŵazukuru wose wo ŵengapo ŵangujipatuliya limu kuti ŵangughanaghanako cha kusunga vigaŵa vyawo,

¹² ndipo wose ŵaLevi ŵakumba, Asafi, Hemani, ndi Yedutuni ŵana ŵawo ŵanthurumi ndi ŵana ŵanyawo ŵanguvwara saru za bafuta, ŵenga ndi ŵabangwe, ndi ŵazeze ndi ŵafyoliro, ŵanguma ku vuma kwa jochero pamoza ndi ŵazukuru machumi pe chumi pachanya machumi ghaŵi ŵakumba mbata.

¹³ Wenga mlimu wawo wakumba mbata ndi wakumba ndi mlomo pe kuti ŵavwikenge nge ndi munthu yumoza kutumbika ndi kuwonga Ambuya). Ndipo ŵangutumphuska sumu ndi zimbata, ndi ŵabangwe ndi vinthu vinyake vyakumbiya sumu ŵangukankhuska Ambuya, ŵatinge: “Pakuti iwo mbamampha, chifukwa nchamuyaya chifundu chawo.” Ndipo nyumba ya Ambuya yinguzazika ndi mtambo.

¹⁴ Viyo kuti ŵazukuru ŵanguziŵa kuma cha kuteŵeta chifukwa cha mtambo, pakuti unkhankhu wa Ambuya unguzaza nyumba yaku Chiuta.