2 Mikoka 36 - Tonga Bible 1986

Yeyoyahazi, Yehoyakimu, Yeyoyakini, Zedekiya, ŵakaronga ŵa Yuda

¹ Ndipo ŵanthu ŵamu charu ŵanguto Yehoyahazi mwana waku Josiya ŵangumuŵika karonga mu malo gha awiske mu Yerusalemu.

² Yehoyahazi wenga ndi virimika machumi ghaŵi pachanya vitatu wachamba kuwusa, ndipo wanguwusa myezi yitatu mu Yerusalemu.

³ Ndipo karonga waku Egipiti wangumtuzgamo mu ufumu wake mu Yerusalemu ndi kusonkheska charu matalente gha siliva machumi chumi ndi talente limoza la golide.

⁴ Ndipo karonga waku Egipiti wanguŵika mbali wake Eliyakimu kuwusa mu Yuda ndi Yerusalemu, wangung'anamuwa zina lake kuti liŵe Yehoyakimu. Ndipo wanguto Yehoyahazi mbali wake wanguruta nayo ku Egipiti.

⁵ Yehoyakimu wenga wa virimika machumi ghaŵi pachanya vinkhonde (25) wachamba kuwusa. Ndipo wanguwusa virimika chumi ndi chimoza mu Yerusalemu. Wanguchita uheni paurongo pa Ambuya Chiuta wake.

⁶ Ndipo Nebukadanezara karonga waku Babiloni wanguza kurwana nayo, wangumumanga ndi unyoro kuruta nayo ku Babiloni.

⁷ Nebukadanezara wanguto viyaŵi vyamu nyumba yaku Chiuta kuruta navyo ku Babiloni, wanguviŵika mu kasopi wake ku Babiloni.

⁸ Ndipo zinyake nchitu zaku Yehoyakimu ndi unyakazi wake wo wanguchita, ndivyo vinguoneka vyakumsuska, wonani, vikulembeka mu Buku la Marangu la ŵaKaronga ŵaku Yuda ndi Yisraele; ndipo Yehoyakini mwana wake wanguwusa mu malo ghake.

⁹ Yahoyakini wenga ndi virimika vinkhonde ndi vitatu wachamba kuwusa, ndipo wanguwusa myezi yitatu ndi mazuŵa chumi mu Yerusalemu. Wanguchita uheni pa maso ghaku Chiuta.

¹⁰ Mu nyengo ya chifuku Nebukadanezara wangutuma ŵanthu kuza nayo ku Babiloni pamoza ndi viyaŵi vya nyumba yaku Chiuta, wangumika Zedekiya mbali wake kuŵa karonga mu Yuda ndi mu Yerusalemu.

¹¹ Zedekiya wenga wavirimika machumi ghaŵi ndi chimoza wachamba kuwusa, ndipo wanguwusa virimika chumi ndi chimoza mu Yerusalemu.

¹² Wanguchita uheni pa maso gha Ambuya Chiuta wake. Wengavi kujipepuwa paurongo paku Yeremiya mchimi, yo wakambanga mazu ghakuturiya mu mlomo wa Ambuya.

¹³ Ndipo so wangugarukiya karonga Nebukadanezara yo wangumlapiska ndi Chiuta, wangunonopa khosi lake ndi kunonopeska mtima wake kureka kukwere kwa Ambuya Chiuta waku Yisraele.

¹⁴ Wose ŵara ŵa ŵazukuru, ndi ŵanthu ŵangunanga ukongwa kulingana ndi ukazuzi wa ŵamitundu, ndipo ŵangukazuzga nyumba yaku Chiuta yo iyo wanguyipatuwa mu Yerusalemu.

¹⁵ Ambuya Chiuta wa ŵambuyawo, wanguŵatumiya ma thenga ghake ruta-ruta, chifukwa wenga wachisungusungu pa ŵanthu ŵake ndi pa malo ghake ghakujamo.

¹⁶ Kweni ŵanguseka ndi kuyuyuwa mathenga ghaku Chiuta ndi kuyeya mazu ghake, ŵanguŵa nyoza ŵamchimi ŵake, mpaka kandundu kaku Chiuta kanguŵayukiya ŵanthu ŵake, mpaka kungusoŵa chakupozge.

Yerusalemu wabwangandulika, ŵanthu ŵatoreke ku Babiloni kuŵa ŵaŵanda

¹⁷ Pa chifukwa ichi Chiuta wanguŵaziya ndi karonga wa ŵaKildiya yo wangubaya ŵanyamata ŵawo ndi lipanga mu nyumba yawo yakupaturika, ndipo kuti yinguŵachitiya lisungu cha chingana mbanyamata pamwenga ŵamwali, khongwi pamwenga yo wenga khongwi lakukota ukongwa: wanguŵapereka wose mu janja lake.

¹⁸ Ndipo ndi viyaŵi vyose vya nyumba yaku Chiuta vikuru ndi vimana ndi uromba wamu nyumba ya Ambuya, ndi uromba wa karonga ndi ŵakaronga ŵake, vyose wanguza navyo ku Babiloni.

¹⁹ Wangocha nyumba yaku Chiuta, ndipo wangubwanganduwa linga lose la Yerusalemu, wangocha zinyumba za ŵakaronga ŵake ndi vyose, wangumbininiska viyaŵi vyose vyamtengo wapatali.

²⁰ Wo ŵangupozomoke ku lipanga wanguruta nawo ku Babiloni, ŵangusanduka ŵaŵanda ŵake ndi ŵa ŵana ŵake kufikiya kuwusa kwa ufumu waku Perese,

²¹ kufiska mazu ghaku Chiuta mu mlomo waku Yeremiya mpaka charu chingusekere ndi masabata ghake. Nyengo yose yo chingajariya pasulu chingusungiriya sabata kuruska virimika machumi ghankhonde pachanya ghaŵi.

²² Mu chirimika chakudanga chaku Sirusi karonga waku Perese, mwakuti mazu ghaku Chiuta mu mlomo waku Yeremiya ghafiskike, Chiuta wanguyuska mzimu waku Sirusi karonga waku Perese kuti wawandiske mazu mu ufumu wake wose, ndipo wangughalemba, wanguti,

²³ “Ndimo wakambiya Sirusi karonga waku Perese, ‘Ŵakaronga wose ŵamu charu chapasi ŵandipaska Ambuya Chiuta wakuchanya: ndipo wandinene kuti ndimange nyumba mu Yerusalemu, mwaku Yuda. Yose yo we mukati mwinu wa ŵanthu ŵake wose, Ambuya Chiuta wake waŵenge nayo, warutenge.’ ”