2 Mikoka 33 - Tonga Bible 1986

Manase waŵika chisopo cha ŵachiuta ŵangoza

¹ Manase wenga ndi virimika chumi ndi viŵi wachamba kuwusa, ndipo wanguwusa virimika machumi ghankhonde pachanya vinkhonde (55) mu Yerusalemu.

² Wanguchita cho chenga chiheni mu maso gha Ambuya kuringana ndi unyakazi wa ŵamitundu wo Ambuya anguŵadikiska paurongo pa ŵaYisraele.

³ Pakuti wanguzenga so malo gha pachanya gho Hezekiya awiske ŵangudumuriya pasi, ndi kumzenge Bala viguŵa ndi viuyi, wangusopa vya kuchanya vyose ndi kuvitatariya.

⁴ Ndipo wanguzenga majochero mu nyumba ya Ambuya, yo Ambuya angunena, kuti, “Mu Yerusalemu mujenge zina langu muyaya.”

⁵ Wanguzenge maliŵanja gha kuchanya, majochero ghose mu mabwalo ghaŵi gha nyumba ya Ambuya.

⁶ Wangocha ŵana ŵake mu moto nge ndi mpasku mu dambo la mwana waku Hinomu, wanguchita maula ndi ufwiti, ndi kupenja viŵanda ndi ŵakuwombeza. Wanguchita ulakwi unandi pamoso gha Ambuya, kuyuskaukari wawo.

⁷ Ndipo ngoza wakusema chikozgo cho wanguchita, wanguŵika mu nyumba yaku Chiuta yeniyo Chiuta wangukamba kwaku Davidi ndi kwaku Solomoni mwana wake, “Mu nyumba iyi ndi mu Yerusalemu yo ndasankha mukati mu mafuko ghose ghaku Yisraele, ndiŵikengemo zina langu muyaya;

⁸ ndipo kuti ndinderezgenge cha rundi laku Yisraele mu charu cho ndaŵikiya ambuyamwe, asani iwo ŵaphwerenge kuchita vyose vyo ndaŵalanguliya kwakuyana ndi dangu vilayizgu ndi vyakutemeka vyaku Mosese.”

⁹ Manase wangupuruska Yuda ndiwo ŵajanga mu Yerusalemu, wanguchita viheni kuruska ŵamitundu wo Chiuta wanguparghang'a pa maso ghaku Yisraele.

¹⁰ Ndipo Ambuya angukamba ndi Manase ndi ku ŵanthu ŵake, kweni kuti ŵanguvwiya cha.

¹¹ Ndipo Ambuya pa chifukwa ichi, anguŵaziya ndi ŵachirongozgi ŵankhondo ŵa karonga wa Asiriya, ŵangumuko Manase ndi kumumanga ndi maunyoro, wanguruta nayo ku Babiloni.

¹² Ndipo pakuŵa mu suzgu wanguŵeyere Ambuya Chiuta wake, ndi kujiyuyuwa ukongwa pa maso paku Chiuta wa ambuyake.

¹³ Wanguromba ndipo Chiuta wanguronde kuŵeyere kwake, wangumwezge so mu ufumu wake. Sono ndipo Manase wanguwamo kuti Ambuya ndiwo Chiuta.

¹⁴ Ndipo pavuli paku ichi wanguzenga linga kubwalo ku muzi waku Davidi kuchiri kukuserere dazi ku Gihoni, kufika ndi ku likomo zina lake Somba ndi kuzingirizga Ofeli, wangulikwezga msinkhu utali ukongwa, wanguŵika ŵachirongozgi ŵankhondo mu mizi yose ya malinga ghaku Yuda.

¹⁵ Wangutuzgamo ŵachiuta ŵalendo, ndi vikozgu mu nyumba ya Ambuya, ndi majochero ghose gho wanguzenga mu phiri po penga nyumba ya Ambuya, ndimu Yerusalemu, wanguvitaya kubwalo kwa msumba.

¹⁶ Wangunozga so jochero la Ambuya, wangubayiyapo sembe za chimangu, ndi za kuwonga, ndipo wangupangizga Yuda kuŵatatariya Ambuya Chiuta waku Yisraele.

¹⁷ Kweni pavuli ŵanthu ŵenga ŵeche kubaya sembe mu malo gha pachanya, kweni ŵabayiya nga chiuta wawo.

¹⁸ Nchitu zinyake zaku Manase, ndi kuromba kwake kwaku Chiuta wake, ndi mazu gha ŵawona wo ŵakambanga nayo muzina la Ambuya Chiuta waku Yisraele, ehe, vikulembeka mu Buku la ŵaKaronga ŵaku Yisraele.

¹⁹ Kuromba kwake naku so, ndi mo Chiuta wanguŵeyereke ndi iyo, ndi maulakwi ghake ghose ndi ubendezi wake, ndi malo mo wanguzenga malo gha pachanya, ndi kuŵika Ashera, ndi vikozgo vya kusema, wenga wandape; ehe, vikulembeka mukati mu Makani gha Ŵamchimi.

²⁰ Ndipo Manase wangura ndi ambuyake, ŵangumuŵika mu nyumba yake. Ndipo Amoni mwana wake wanguwusa mu malo ghake.

Amoni karonga waku Yuda

²¹ Amoni wenga wa virimika machumi ghaŵi pachanya viŵi wachamba kuwusa, ndipo wanguwusa virimika viŵi mu Yerusalemu.

²² Kweni wanguchita cho nchiheni mu maso ghaku Chiuta nge ndimo wanguchitiya wiske wake, chifukwa Amoni wangubayiya sembe ku vikozgu vyose vyakusema vyo Manase awiske wanguchita ndi kuvitatariya.

²³ Kweni kuti wangujiyuyuwa cha pa maso ghaku Chiuta nge ndimo Manase awiske ŵangujiyuyuliya, kweni Amoni wanangiyanga-nangiyanga.

²⁴ Ndipo ŵateŵeti ŵake ŵangumchitiya chiwembu, ŵangumbayiya mu nyumba yake.

²⁵ Kweni ŵanthu ŵamu charu ŵangubaya wose wo ŵanguchitiya chiŵembu karonga Amoni, ndipo ŵanthu ŵamu charu ŵanguko Josiya mwana wake kuŵa karonga mu malo ghake.