2 Mikoka 27 - Tonga Bible 1986

Yotamu karonga wa Yuda

¹ Yotamu wenga ndi virimika machumi ghaŵi pachanya vinkhonde (25) mu ura po wangwamba kuwusa, ndi wanguwusa virimika chumi pachanya vinkhonde ndi chimoza (16) mu Yerusalemu. Zina la nyina lenga Yerusa mwana waku Zadoki.

² Ndipo wanguchita cho chenga chakurunjika pa maso gha Ambuya kwakuyana ndi vyose vyo wiske Uziya wanguchita, kweni kuti wangusere mu kasopi wa Ambuya cha. Kweni ŵanthu ŵangurutiriya mukuchita uheni.

³ Wanguzenga likomo la pachanya la nyumba ya Ambuya, ndipo so wanguzengapo ukongwa pa linga la Ofeli.

⁴ Ndipo so wanguzenga misumba mu charu chamu mapiri cha Yuda, ndi nyumba za ŵankhondo, ndi vitanthali mu mapiri gha miti yitali.

⁵ Wangurwana ndi karonga wa ŵaAmoni ndi wanguŵapunda. Ndipo ŵaAmoni ŵangumupaska matalente gha siliva machumi pe chumi (100), vikwi chumi vyamyeso ya trigu (10,000) ndi vikwi chumi vya myeso ya barile (10,000) mu chirimika chiya. ŴaAmoni ŵangumpaska kwakuyana mu chirimika cha chiŵi ndi chirimika cha chitatu.

⁶ Viyo Yotamu wanguŵa wanthazi chifukwa wangunozga nthowa zake paurongo pa Ambuya Chiuta wake.

⁷ Milimu yinyake yaku Yotamu, ndi nkhondo zake zose, ndi nthowa zake, wonani zikulembeka mu Buku la ŵaKaronga ŵaku Yisraele ndi Yuda.

⁸ Wenga ndi virimika machumi ghaŵi pachanya vinkhonde po wangwamba kuwusa, ndipo wanguwusa virimika chumi pachanya vinkhonde ndi chimoza mu Yerusalemu.

⁹ Ndipo Yotamu wangugona ndi awiske, ndi ŵangumuŵika mu msumba waku Davidi; Ahazi mwana wake wanguwusa mu malo ghake.