2 Mikoka 21 - Tonga Bible 1986

Yoramu karonga muheni wa ŵaYuda

¹ Viyo Yehosafati wangura ndi ŵambuyake, wanguŵikika pamoza ndi ŵambuyake mu muzi waku Davidi. Ndipo Yehoramu, mwana wake wanguwusa mu malo ghake.

² Ndipo wenga ndi ŵabali ŵake, ŵana ŵaku Yehosafati; Azariya, ndi Yehieli, ndi Zekariya ndi Azariya, ndi Mikaeli ndi Shefatiya, wose yaŵa ŵenga ŵana ŵaku Yehosafati karonga waku Yuda.

³ Uskeu wanguŵapaska vyawezi vikuru vya siliva ndi golide, ndi vyuma vya mtengo wapatali, ndi mizi ya malinga mwaku Yuda, kweni ufumu wangupaska Yehoramu chifukwa wenga waumwali.

⁴ Wanguti wakwera Yehoramu pachitengo cha awiske, ndikukhozgeka, wangubaya ŵabali ŵake wose ndi lipanga, ndi ŵakaronga ŵanyake viyo mwaku Yisraele.

⁵ Yehoramu wenga wavirimika machumi ghatatu pachanya viŵi wachamba kuwusa, ndipo wanguwusa virimika vinkhonde ndi vitatu mu Yerusalemu.

⁶ Ndipo wangwenda mu nthowa za mafumu ghaku Yisraele, mo yinguchitiya nyumba yaku Ahabu, chifukwa muwoli wake wenga mwana waku Ahabu, ndipo wanguchita cho nchiheni pa maso ghaku Chiuta.

⁷ Chingana kwenga viyo, Chiuta wengavi kukhumba kupankhuwa nyumba yaku Davidi chifukwa cha chipanganu cho wangupangana ndi Davidi, ndipo chifukwa wangupangana kuti wampaskenge limbuni ndi ku ŵana ŵake muyaya.

⁸ Mu mazuŵa ghake ŵaEdomu ŵangugaruka ku ufumu waku Yuda ndipo ŵangujivwarikiya fumu yaku ŵija.

⁹ Ndipo Yehoramu wanguruta ndi ŵakaronga ŵake, ndi magareta ghake ghose pamoza nayo; ŵangusoka ndi usiku ndi ŵangukoso ŵaEdomu po iwo ŵangumzinga ndi ŵachirongozgi ŵake ŵa magareta.

¹⁰ Kweni ŵaEdomu ŵangugaruka mbwenu kuti ŵareke kuwa pasi paku Yuda mpaka kunu kule. Nyengo yo Libina nayo wangugaruka kutuwa mu muwusu wake, chifukwa iyo wangujo wo Ambuya Chiuta wa ŵambuyake.

¹¹ Ndipo so napu wanguzenga so malo gha pachanya mu mapiri ghaku Yuda, wanguchitiska ŵamu Yerusalemu kuchita ureŵi ndi kuchichizga ŵaYuda kuti nawo ŵachitenge viyo pe.

¹² Ndipo kunguza kalata kwake kuturiya kwaku Eliya mchimi, wakuti, “Ndimo viyo anene Ambuya Chiuta wa ausu, kuti ‘Chifukwa ulivi kwenda mu nthowa yaku Yehosafati ausu, pamwenga mu nthowa zaku Asa karonga waku Yuda,

¹³ kweni wenda mu nthowa za ŵakaronga ŵaku Yisraele, ndipo wa chitiska Yuda ndi ŵakuja mu Yerusalemu uheni kuyana ndi ureŵi wa nyumba yaku Ahabu, ndipo so wakoso ŵabali ŵako ŵamu nyumba ya ausu wo ŵenga wamampha kuruska iwe;

¹⁴ ona, Ambuya akosonge ŵanthu ŵako ndi nthenda yikuru ndi ŵana ŵako ndi ŵawoli ŵako ndi vyuma vyako vyose;

¹⁵ ndipo iwe wamwene utamenge ukongwa ndi nthenda ya matumbo, mpaka ghatuwe chifukwa cha nthenda iyi zuŵa ndi zuŵa.’ ”

¹⁶ Ndipo Chiuta wangumyuskiya Yehoramu ndewu ndi ŵaFilisti ndi ŵaArabu wo ŵenga pafupi ndi ŵaEtiopia;

¹⁷ ndipo ŵanguza kwaku Yuda ndi kumuswa, ŵanguto ndikuruta navyo vyuma vyose vyo vingusanirika mu nyumba ya karonga, ŵana ndi ŵawoli ŵake viyo, viyo kuti kungujako mwana cha kweni Yehoyahazi pe kwangu.

¹⁸ Ndipo pavuli paku ivi vyose Chiuta wangumkoso mu matumbo ghake nthenda yambura machizgika.

¹⁹ Ndipo kunguŵa yati yarutapo nyengo pakumara virimika viŵi, matumbo ghatuwanga chifukwa cha nthenda yo, wangufwa ndi urwirwi ukuru. Ndipo ŵanthu ŵake kuti ŵangumpembe moto nge ndiwo ŵapembiyanga awiske cha.

²⁰ Wenga ndi virimika machumi ghatatu pachanya viŵi pakwamba kuwusa, wanguwusa mu Yerusalemu virimika vinkhonde ndi vitatu; wanguruta kwambura yumoza wakumtenje. Kuŵika ŵangumŵika mu muzi waku Davidi kweni ku malo gha ŵakaronga cha.